DIY - 一個值 80 分的花球

自從買咗新嘅絲花返嚟之後，我一得閒冇嘢做就會攞上手研究研究！經過一輪嘅拼搏，新嘅花球已經誕生，個人認為呢個花球好過之前嗰個多多聲！

清清地，唔錯唔錯，個形又夠珠圓玉潤 ~~~

不過，我只會比 80 分佢！因為仲有兩樣要執：

(1) 絲花擺放位置 --- 或者我份人真係毫無美感，d 花永遠都插得唔靚！一係就太多紫玫瑰黐埋晒，一係就太多白色花，一句講晒，d 花插得唔平均，所以，呢個咁艱巨嘅任務都係留返比一向自稱係藝術家嘅男朋友去搞啦！

(2) 花莖 --- 呢個問題一路困擾咗我好耐！由於我係用絲花，d 絲花通常係一紮有幾個頭，我一買就買兩紮，每支花有高有低，但偏偏整花球就係要砌圓佢，所以迫不得已要剪開晒 d 花變成一支花一條花莖，咁先可以將個花球砌得圓架嘛.......結果，紮出嚟就變成咁啦 .....

大佬，有 d 長有 d 短，一岩一忽咁，叫我點揸住佢影相呢？我請教過繽紛嘅職員，佢哋叫我買個絲花泥插住 d 絲花，咁個花球就會自自然然會變圓......不過，我由始至終都想 DIY 一個法式手束形花球嘛，所以唔會買絲花泥啦！繽紛職員話如果唔用絲花泥，就要同個花球駁枝，麻煩好多架喎 ~

唉，咁都冇計架，唯有同佢做駁枝手術啦！但..........我搵咩同佢駁？？？討論區有人教用 Starbucks 嗰 d 綠色飲管，先用熱溶膠槍吱 d 膠入飲管中，再將支花莖慢慢插入飲管內......Oh my god ~ 我點籌到咁多 Starbucks 飲管返嚟呀？好，結果我諗到一條絕世好橋（至少我自己認為係

），就係用呢樣嘢去代替飲管啦 ---- 幼身木筷子

初時都驚 d 筷子會粗過頭，不過拎咗返去左度右度之後，我又覺得可以接受喎！同個花球駁完枝後，再用綠色膠紙包住 d 筷子，咁就唔覺眼之餘又會比用飲管更有承托力啦，係咪？（自作聰明中 .....

）

不過大家可能又會問：你邊得嚟有咁多幼身筷子呢？實不相瞞，小女子喺公司一年 365 日（假期除外）Lunch 都係嗌外賣，但由於自己都覺得太唔環保，所以我一向都係自備筷子，結果就積埋積埋好多木筷子啦，估唔到宜家佢哋對我咁有用喎！

好可惜，以上講嘅一切尚在發 up 風中，成唔成功有待進行試驗！而進行試驗前，又要等成日自認係藝術家嘅男朋友（喂，你個名好長喎）得閒搞搞 d 花嘅擺位先得，不過，趁住呢幾日假期，我會催佢幫我搞架啦！我都希望一個 100 分嘅花球盡快誕生 ~ 滿心期待中 ......