陳慧琳 Love Fighters 演唱會 2008 @ 第三場

2008 年 6 月 15 日 （星期日）

男朋友一向都係 Kelly Chen 嘅忠實 fans，差唔多隻隻碟都有買齊，不過就算之前冇買齊都好，我哋通常都會去買返。見 Kelly 有 3 年幾冇開演唱會，今次佢喺紅館裝修前開埋最後一次，所以我都叫男朋友去睇。

佢無我咁顛，我睇 Aaron 一定要睇最貴嗰種飛，而且仲唔只睇一場！不過今次只係睇 Kelly，我哋買咗 HK$200 飛就算！雖則係 HK$200 飛，我都買到第 23 行（由 21 行開始），不過係藍閘（即係左面），但係買到正中位，算唔錯啦！

講返個演唱會，網上好多人鐘意攞佢同 Sammi & Joey 兩個演唱會比較。其實我覺得冇得比，各有各主題及賣點，點比啫？加上我只係睇咗 Kelly，更加唔方便作出評論。所以我攞佢上次「紙醉金迷」演唱會比！講真，諗返起上次紙醉金迷，我覺得有少少悶場架，歌又揀得麻麻地.....不過今次好好多，成個 rundown 幾 smooth，d 歌雖然係大眾化咗 d，不過要照顧非歌迷都好正常！男朋友都不知睇得幾開心，因為揀中晒佢最鐘意嗰幾首歌！其實 Kelly 今次好明顯唔算跳好多快歌，不過我覺得佢幾適合唱中／慢板歌，快歌呢 d 都係留返比 Aaron 啦！

有幾 part 我都幾鐘意：人魚公主 + 換衫（星星太陽月亮雲）+ Sunny Wong 教跳舞

教跳舞嗰 part 全場勁 high，雖然我坐 $200，不過見到台下好多人都企晒起身一齊跳，如果 Aaron 演唱會都可以咁就好啦！至於紀念品，Kelly 個演唱會有少少特別，一向都只係賣演唱會相，佢冇乜紀念品賣架！而男朋友就唔興買演唱會相，所以我 copy 報紙嗰 d 落嚟留念（部相機壞咗，否則我都自己帶相機去影） ~~~

開場衫

加咗件斗蓬，幾型，不過竟然唱慢歌

另一件衫，呢 part 有火噴出嚟，舞台效果幾養眼 ....

再化身為孔雀出場，條裙嘅拖尾係貎似孔雀羽毛

之後 solo 跳扭腰舞，條腰勁都爆燈，我學到佢 3 成已經好好啦！

嘩，你睇佢條腰幾 fit？？？

再嚟一 part 中東舞，仲做埋拱橋添

又換咗另一套衫啦 ~~（呢 part 唱快歌為主）

握手位.....唱咗好多人都唔鐘意聽嘅「希望」（大長今主題曲），山頂嘅朋友去廁所最啱！Aaron 應該好好學吓 Kelly，Kelly 同 d 觀眾真係「握手」架！之前我睇咗 Aaron 六場演唱會（佢開七場），佢場場都只係 give me five 咁拍手，激死！

佢仲化身為人魚公主，連佢自己都話條魚尾好似肥美咗 d！同場仲有好多難以理解嘅海洋生物，真係要好多想像力先諗到 ....

其實 Kelly 都幾襯得起一 d 比較華麗嘅衫 ....... 人魚公主近鏡（有 d 仙女 feel）

呢 part 好搞笑，Kelly 一路唱歌一路換衫，但係 d 衫係一架車仔，會推嚟推去，Kelly 一企上架車度就好似著咗件衫咁！我自己（包括 Kelly）最鐘意都係呢件衫，佢話係代表「雲」喎！佢仲有三件衫，分別係代表星星，月亮，太陽

呢件衫係臨完 show 前最後一件衫，個 idea OK 嘅，應該係想 show 長腿，不過稍嫌同佢上一次演唱會一件用紙做嘅裙相類近（呢 part 唱咗最愛演唱會）

整體嚟講，個 show 值 80 分以上！有華麗衣服，有歌舞表現（當然唔係吓吓跳到行，係輕快為主），有長腿睇，不過冇咗我覺得演唱會中必有嘅「勁歌熱舞」！唔知係咪比 Aaron 縱壞晒，搞到我宜家覺得一個演唱會一定要跳舞！！！所以，容許我偏心講句：我依然覺得 Aaron 嘅演唱會係最好睇！（或者因為我鐘意睇人跳舞啦，舞動奇蹟我都睇一餐嘅）