第一份結婚禮物???

2008 年 6 月 14 日 (星期六)

今日男朋友同佢阿爸提早慶祝父親節，雖然佢未正式係我半個父親，不過年年都有份去食飯，今年都唔例外。上到男朋友屋企，鞋都未除，未來老爺已經走過嚟同我哋講話買咗 d 嘢送比我哋兩個。一望，原來係兩大箱嘅花炮（其實.......根本用唔晒咁多）。

其實都冇諗住咁快就要買呢 d 周邊用品，而且都打算返上大陸行婚紗街時先一次過買，不過未來老爺一番心意，點都要收咗佢嘅！其實，呢份都唔知算唔算係自公佈結婚後嘅第一份結婚禮物，但無論點都好，我自己都會當係！雖然呢份禮物唔係 d 咩名貴首飾，亦唔係一大筆可觀嘅首期比我哋買樓等等，不過對於我嚟講係有特別嘅意思，我其實已經好開心啦！

話說當我同男朋友宣佈打算結婚時，男方父母一直都唔太熱衷於呢件事，亦完全唔覺佢哋開心！或者因為佢覺得自己個仔太早結婚啩？所以由籌備婚禮開始，除咗擇日子，book 酒席呢兩件大事有詢問過佢哋長輩嘅意見之外，其他嘢我全部都冇向佢哋提過。當初擇日子／book 酒席，佢哋都冇比過意見咁滯，全部都係由我一個人去搜集資料，再問佢哋意思，不過，佢哋一直表現得好冷漠，但冷漠得嚟又帶正面嘅！所以有時都會諗，話晒都係搞囍事，而且仲係佢哋家中第一單囍事，點解佢哋好似一 d 都唔高興？唔通佢哋唔鐘意我呢個未來新抱？所以一路以嚟我都覺得冇人支持，搵到好嘢又冇人可以分享得到。令我最印象深刻嘅係，當時 book 酒席要交個大約嘅圍數比酒樓，我哋略略計數時，曾經問過男方父母會要幾多圍請親戚朋友，點知，得返嚟嘅答案係：只會請至親，其餘一律唔請。我當時都好奇怪，未來奶奶係家庭主婦，唔請朋友唔出奇，但係未來老爺有打工，同事／老闆都會請啩？不過佢哋覺得唔請就唔請囉，始終都要尊重佢哋意思。但無可奈何有時會諗，佢哋係咪唔想比人知自己個仔結婚，點解好似咁鬼祟咁？諗諗吓往往又會向壞嗰方面諗，最後唯有安慰自己咁諗：或者佢哋想搞得低調 d 啫，但呢 d 事嘅種種令我好深刻，更加觸發我會鑽牛角尖。

不過宜家收到呢箱花炮，其實自己覺得幾 warm，至少，原來未來老爺奶奶一直都記得呢件事，而且仲會買嘢送比自己添！