姊妹裙定款 @ Plovee

2009 年 5 月 23 日（星期六）

呢日約咗我班姊妹團去 firm 姊妹裙。呢件事本來上個月已經講咗話搞，但因為小女子嗰排工作比較繁忙，結果要改期！好揀唔揀，揀咗日落狗屎先去 firm 款，真黑仔！好在各位姊妹都「義」字當頭，寧願做落湯雞都照出嚟，錫晒你哋！！！

Plovee 宜家搬咗去百利附近，我都係第一次上去。不過地方一 d 都唔難搵，點都好過之前嘅尖東堡吖！而且地方都闊落咗好多，5 個姊妹 + 伴娘 + 本人上到去都仲有大把地方玩！衰就衰在冇 chairs 比人坐，又只得兩個 fitting room，我班姊妹試嗰陣，其他人就唯有企喺度等！

由於呢間舖之前喺 esdlife 有 bad comments，所以我想逐樣講吓：

款式 --- 其實我覺得真係算唔錯，但千祈唔好 expect 佢會好靚好特別，但係做姊妹裙的話就綽綽有餘！

價錢 --- $198 一條短裙，$298 一條長裙，仲想點？不過要留意係唔包改裙，唔包披肩！改裙：改闊窄 $50，改長短 $30，披肩如果係買開姊妹裙的話，每條 $20，齋買披肩唔買裙唔知點收錢。所以保守估計，我宜家每條姊妹裙係 $198 + $50 + $20 = $268 <-- 呢個係買走價，絕對 ok 啦！

服務 --- esdlife 之前嘅 bad comments 都係改裙時出事，我未拎裙，所以唔知佢哋有冇改善咗，不過嗰日上去試衫時，我 d 姊妹都滿意佢哋嘅服務態度！一上去個老闆娘都同我講咗咩款可以揀，咩款要加錢，都好勻真好清楚。之後有一個服務員專係 serve 我哋，而且個服務員都好鼓勵姊妹們睇啱就試上身睇效果。有時拉鍊拉唔上或者要 pin 針，個服務員一叫即到，仲會喺門口 standby 等你嗌佢。再者，我班姊妹差唔多試晒所有款咁滯，一個人會試幾件（正常吖，幾件都睇中嘛），有時又會花心試完又試，但係上至老闆，下至服務員都冇黑面，臨走時仲好聲好氣 say goodbye 又提大家要拎齊嘢，抵讚！但我要再強調... 我未拎裙，話唔定好戲在後頭架！

質素 --- 呢樣好難講，因為我對呢 d 裙嘅質料唔係太熟，不過我一早表明要同色唔同款，老闆娘都 remind 咗我，如果要同色，姊妹裙嘅質料一定要一致紗款或者一致麻丁款，否則點都會有少少色差！呢個唔知點評論，大家都係睇相吧啦！

P.S. 各位，我偷影架咋，識 do 啦，咪公開 d 相呀，嚴懲！！！

姊妹 Angel firm 咗左邊嗰條，將掛頸帶轉做吊帶 --- 免費！

姊妹 Fion firm 咗右邊嗰條！

姊妹 Anita firm 咗呢條，但係短裙款 --- 免費！

呢條本來有兩位姊妹試上身都著得好靚，比我哋成班叫咗呢條裙叫「皇牌裙」！可能因為款式夠大路，個個著都 carry 得好好！但另一方面又一致認為比較普通似旺角款，所以個個都話唔 firm 呢條，要揀 d 特別 d 喎！

姊妹 Loki 本來想 confirm 呢條，不過最後都係放棄咗，firm 咗掛喺後面嗰條，大家不妨用少少想像力諗吓！我就覺得個款幾靚幾特別，我呢個做主角嘅，只要佢開心就得！

最後姊妹 Cat 嗰條就偷影失敗......

至於顏色方面，本來我好堅持唔要香檳金／白色，因為我覺得包得姊妹裙就要特別少少，但係眼見 5 位姊妹都試得好開心，而且 Plovee 掛出嚟嘅好多都係香檳金色，姊妹們見有現成色就先入為主咗...... 咁是但啦，香檳金個個都 carry 到，佢哋著得開心又放心，我已經冇理由再堅持啦，出嚟嘅制成品亦係上面第三張相嘅顏色！不過返到屋企男朋友就話我應該堅持囉......

5 個女人仔試裙試咗 2.5 hours，所以 Plovee 唔發火真係抵讚！玩完就一行 7 人去咗隔離嘅霸王山莊食飯灌水。席上有 2-3 位係甩底王／飛機王，今次真係比面，我都估唔到竟然一約就齊腳，希望大家 keep 住！

其實我成個姊妹團都係我嘅中學同學，一直以嚟我都希望我嘅姊妹團係由呢 6 位人士（連伴娘）組成，非常開心喺我向佢哋 6 位提出時都即刻應承做我嘅阿四，多謝你哋圓咗我呢個心願！晚飯期間個個都有傾有講，講吓大家讀書時 d 趣事，講吓大家嘅事業觀、愛情觀、甚至有已經榮升咗媽咪級嘅陀 BB、生仔痛楚及湊仔分享！大家你一句我一句，好似傾極都傾唔完，最終又係 11 點幾先捨得埋單！而且仲已經鐵定咗兩個抵死絕核嘅接新娘遊戲，所以我想講：欣欣，如果你咁不幸要幫歐陽做兄弟，希望你唔好介意。不過放心，唔係核突嘢，亦唔係咸濕嘢，不過會令你妝容盡失，哈哈！

講到呢度其實有少少肉麻嘢想講，我知道某部份嘅姊妹會睇到呢篇 blog，容許我真情流露少少～

致眾姊妹：

識到你哋我真係覺得好開心，有你哋一路陪住我渡過咗 5 年嘅中學生活，大家一齊喺學校發癲，一齊玩，諗諗吓，原來大家都識咗有 15 年 lu，好懷念以前嘅生活。席間喺大家傾計嘅時候，我諗返轉頭，我知道在座 7 位（包括我）以前都試過同呢個姊妹唔啱，同嗰個姊妹不和，不過大家最終都冰釋前嫌。今晚見到大家聚首一堂，傾計講笑，我又窒吓你，你又串吓我，貫徹一如以往嘅生活方式，真係覺得大家都成熟咗，關心大家多咗，嗰一刻感覺好 warm！各位姊妹，真係多謝你哋願意喺 1121 做我嘅隨從，我會好好咁報答你哋，第時要我做牛做馬我都制！

相信歐陽生都未見過我咁感性，所以我想同你講一句，我哋 d 女仔嘢你識乜吖！