緣美傳說 BBQ + Surprise Birthday Cake

2009 年 4 月 25 日（星期六）

當晚打完針就同緣美傳說一班朋友仔去咗 Ci Ci 未來嘅屋企 BBQ。其實打完針都唔應該去 BBQ，因為太熱氣，唔知會唔會發燒。不過一向玩樂大過天嘅我都好少理，病咗最多咪請病假，仲好，可以休息多一日。

首先要介紹下出席嘅人物（左起）：

主人家 -- 王生及 Ci Ci、新婚夫婦及準父母 -- 阿肥及細恩、唔知醜 couple -- 歐陽及小妹、920 準新人 -- 阿晞及 Anna。

其實我想更正好耐，呢一晚根本唔算 BBQ，基本上我都冇埋過個火爐，所有嘅食物都係由 Ci Ci 嘅 Honey 王生燒埋比我哋食，真係勞煩晒大廚王生，要佢燒晒比咁多人食，真係唔好意思。喂，老老實實，你當晚掛住燒，你自己有冇食架？

至於點解大家都唔埋個爐燒呢？原因係上年結婚嘅細恩帶咗佢結婚當日嘅所有 video 比大家睇，所以大家都圍晒喺電視機面前。不過喺呢度要多謝細恩，因為 4 pair 人裡面，只有佢結咗婚，大家狂搵佢做顧問咁問咗好多 practically 嘅問題，真係唔該晒佢教曉咗我咁多嘢！

大家玩吓傾吓，好快就到夜晚 11:00，本應以為個節目去到尾聲，點知王生失驚無神熄燈熄電視，然後有兩個鬼鬼祟崇嘅人出現...... 佢哋就係 Ci Ci & 細恩，每人捧住一個蛋糕出嚟......唔...... 真係衰，原來幫我預祝生日及補祝阿晞生日！

影完相，許埋願，就當然要切蛋糕。阿晞嗰個係近排人氣急升嘅芒果流沙蛋糕，而我嗰個...... 一個朱古力怪魔生日，點可以少咗朱古力蛋糕呢？喺度要多謝 Ci Ci，佢山長水遠咁拎個蛋糕入嚟，仲要係佢公司嘅出品，講真，幾好味喎！

當大家好期待我切蛋糕嗰一刻，點知...... 切唔入...... 因為初頭 Ci Ci 怕個蛋糕會溶，結果雪咗入冰箱，所以切到把刀斷咗都切唔入，最後佢哋叫我成個拎返屋企，聽日再食。

第二日拎返出嚟，又 ok 喎，一切就切得入，真係唔好意思，個蛋糕變咗我同歐陽獨享添～ ^^

1) 四眼村姑食蛋糕，個蛋糕好好味呀，又唔甜！

2) 朱古力嘅蛋糕，賣相好吸引！

3) Ci Ci 好細心，將 Happy Birthday 嘅 B 仔寫成 agnes b. 嘅 b 字，thanks！

4) 個蛋糕唔甜，其實係因為用咗紅桑莓做饀。酸酸地又甜甜地，仲有薄脆添！

5) 食到呢度，其實我同男朋友都掙扎緊好唔好食埋佢，

6) 最終...... 當然食埋啦！

講樣嘢比大家知，食蛋糕時...... 其實係晚餐後。我同男朋友每人都食咗碗幾飯，我都唔明白點解當時大家個胃仲有空間去容納呢個蛋糕！雖則個蛋糕唔係巨型，但係都有 1 磅...... 兩個人，食完正餐後再食一個 1 磅嘅蛋糕，仲要食得晒，會唔會有點兒 unbelivable？相信過埋我生日嗰幾餐飯後，我要正式宣佈啟動我嘅減肥計劃！