婚前檢查 + 預防子宮頸癌第一針

2009 年 4 月 25 日（星期六）

早早喺 book 婚前檢查時就約咗呢一日，因為平日診所收 4:00，冇理由特登請假去架嘛，星期日又休息喎！

上到診所登記後，姑娘比咗膠樽我同男朋友，我先知道原來要留小便樣本... 哎吔，我臨上嚟之前咁啱去咗次廁所，邊有貨再留比你呀？不過算啦，爛船都有三斤釘，都痾到 d 嘅...... hahahaaaa！搞掂後就等姑娘幫我抽血，可能因為我吼佢臨收工先上去，坐都未坐低已經叫我名入去，good！

入到房，度高磅重唔少得，再了解吓我之前嘅病歷就開始抽血。其實呢，我由細到大都唔知自己咩血型，我冇捐過血，又冇做過身體檢查架，所以比姑娘話咗我兩嘢... -_-"

人哋成日話睇住姑娘幫自己抽咗一支針筒嘅血會好驚，不過我又唔怕呢 d 嘢，見難得有機會，我當然牛咁眼望住，因為覺得好新奇！（事後諗返就覺得自己好白痴）。抽完血，止咗血，就要喺另一隻手打針。由於姑娘話打完針隻手會痺，所以幫我打左手。打完之後，姑娘仲比返個紙盒我叫我拎走，我都唔知要 keep 嚟做乜，所以返到屋企就扔咗。

以下係我打完針嘅感覺，準備打嘅朋友仔要考慮過先好睇呀（將以下嘅字反白就可以睇到...） 不過放心，唔係痛囉，亦都唔算好恐佈！

打針前，姑娘話：嗱，有少少痺架，不過好快就冇事！

我：OK！

於是姑娘就幫我打針，拮入去嗰吓都唔係好痛，係佢吱 d 疫苗入嚟時我真係覺得好痺，係好好好痺，當時痺到我皺晒眉頭... 姑娘抆返支針出嚟時我同佢講：

我：都唔係少少痺啦，係好好好痺喎～

姑娘：唉，我都知，我自己都打咗，但係你知啦，我打之前唔可以同你哋講真話架嘛...

哈哈.....老實講，痛就真係唔痛，只係痺...... 姑娘話有人會發燒，但幸好我就冇乜事，只係個人比較攰 d，姑娘都話係正常反應。至於痺嗰方面，一般會痺 2 日至一個星期，我呢...... 痺咗三日幾，不過唔會阻礙日常活動，但係打完針嗰一晚及第二日，真係痺到好多嘢都唔做得，所以大家準備打的話，要好好咁選擇日子呀！

另外我喺 blog 友夫人嘅 blog 度見到以下嘅資料，相信大家都想做個比較：

現時市面上有兩種子宮頸癌疫苗，分別由默沙東藥廠研製之加衛苗及由葛蘭素史克藥廠研製之卉妍康。

疫苗	加衛苗	卉妍康
藥廠	默沙東	葛蘭素史克
獨具配方	傳統鋁鹽	ASO4免疫力加強劑
適用年齡	9至26歲女性*	香港 10至25歲女性* 澳門 10至45歲女性 澳洲 10至45歲女性 馬來西亞 10至45歲女性
功效	100%預防高危致癌的HPV16、18型 可減低70%患上子宮頸癌的風險 減低引致俗稱「椰菜花」的HPV6、11型的感染機會率	100%預防高危致癌的HPV16、18型 可減低70%患上子宮頸癌的風險 減低另外兩種可引致子宮頸癌的HPV31、45 型的感染機會率
常見副作用	注射位置紅腫及痛、輕微發燒和頭痛	注射位置紅腫及痛、輕微發燒和頭痛，至今未有嚴重副作用紀錄
維持年期	抗體水平比較低，暫時未有可時需要加強劑指引	可持續提升抗體水平達至九倍及可維持六年半以上。有專家估計抗體可維持長達二十年以上。暫時未有可時需要加強劑指引

註* 各國的年齡指引有所不同，接受任何預防子宮頸癌疫苗前，請先向醫生查詢。

怎樣接種子宮頸癌疫苗？

女性需於六個月內接受三劑疫苗注射。理想地，疫苗應按以下時間注射︰

	加衛苗	卉妍康
第一劑︰	醫生和你所選擇的日期	醫生和你所選擇的日期
第二劑︰	第一劑後二個月	第一劑後一個月
第三劑︰	第一劑後六個月	第一劑後六個月

***********************************************************************************

其實上面個比較表「功效」嗰一欄我想補充少少。記得我 join 時都有考慮過打加衛苗（阿 Sa 針）定卉妍康，不過當時個姑娘幫我做咗個分析：

「兩隻疫苗其實都可以 100% 預防 HPV 16 及 18 型，不過卉妍康就可以預防埋 HPV 31 及 45 型子宮頸癌。雖然阿 Sa 針都可以預防另外兩隻 HPV 6 及 11，不過 HPV 6 及 11 只係椰菜花 = 性病嘅一種，既然決定要打，點解唔打卉妍康，預防子宮頸癌 rather than 性病呢？要預防性病，最多自己小心 d，注意多 d 個人衛生仲好啦！」

結果，就憑住姑娘呢個分析，我就 join 咗卉妍康！