My last single birthday @ honey 篇 (Part 2)

2009 年 5 月 9 日（星期五）

睇完咁大個咸蛋黃之後，都係時候返屋企洗個面，休息吓就落去 The Bay 食晚飯。見到個天紅紅地，又再影，因為我哋平時真係冇咩機會見到呢 d 天空。

夠鐘落去食飯啦！餐廳依舊係水靜鵝飛，不過咁仲好，感覺上好似包咗成間餐廳去慶祝，而且陣陣海浪聲，真係好正！

是晚晚餐已經 set 死咗，聽聞話長年不變，唔知下次再入嚟係咪又食呢幾味？

(1) 周打海鮮忌廉湯，足料到爆燈，而且裡面嘅蜆係老闆自己養，真係勁！

(2) 凱撒沙律，份量超大份，食到去呢度都已經飽咗七成

(3) 我哋 order 咗兩杯嘢飲，但係食到咁上下冇端端有侍應問我哋飲咩餐茶，我先知道原來個餐仲有餐茶包，不過真係投晒降，飽到上心口，唔飲啦！

(4) 男朋友 order 嘅羊膝

(5) 我 order 嘅西冷牛扒，估唔到佢哋係燒出嚟，唔係煎喎！

喺晚飯期間，餐廳老闆耐唔耐就走埋我身邊不斷咁叫我努力加油，食晒佢哋個餐 d 嘢。不過佢竟然一開口就叫我 Jenny，我就知道之後有事會發生啦！

餐廳本來播緊 d 好 relax 嘅英文歌，就喺我哋食完 main course 收晒碟之後，我有一刻留意到首歌播播吓停咗，不過當時好似同緊男朋友傾緊計，所以冇為意。事情發展到呢到，相信各位都知之後發生咩事啦...... 英文歌換上生日歌，然後餐廳老闆推住架車出嚟，車上面有個生日蛋糕及蠟燭，呢個蛋糕就成為我今年生日第 5 個蛋糕，係朱古力黑森林呀！

結果當然都係食唔晒啦！因為嗰時我哋兩個都應該有 11 成飽！所以叉咗兩啖之後就放棄，情願拎上房雪住佢，留返聽日當早餐算吧啦！

待續...