My last single birthday @ honey 篇 (Part 1)

2009 年 5 月 9 日（星期六）

嚟到正日生日，當然就係同男朋友過啦！大家都估咗好耐究竟佢比咗咩驚喜我...... 我可以形容為......

我哋去咗 pre-honeymoon！

點解我咁講呢？因為嗰度嘅環境十足十去咗泰國一樣，海天一色，而我哋住嗰間房又對住大大嘅沙灘，超級心曠神怡！講咁耐，其實我哋係去咗南丫島裡面一個叫「模達灣」嘅地方。

我哋先喺銅鑼灣會合，然後搭巴士去香港仔坐街渡。其實我咁大個女都唔知何謂「街渡」，今次有機會試坐啦！我一向都會暈船浪，估唔到平時一臉不正經嘅男朋友咁細心，識得買埋暈浪丸 + 水比我，等我食咗藥先上船，抵讚喎！

好在時間都啱啱好，一班船普遍要等 1.5 個鐘左右，當時距離我哋下一班船只需等多半個鐘，唔洗發吽豆！唔通壽星女真係旺 d？

(1) 天氣非常咁好，好到去完南丫島返嚟晒紅咗我一隻手臂...... 咁多年美白嘅心機被呢一趟旅程化為烏有......

(2) 原來呢 d 就叫街渡，我哋就係坐呢隻嘢入南丫島啦

(3) 等船途中仲有水母出現，我起初仲以為一 pat 魚絲...

船到啦，其實吹住海風望吓風景都幾寫意。一向自命清高嘅歐陽生仲聽住 Jazz 添！

船程好快，只係 25 mins 左右就入到去～

入到呢個模達灣，先去攞咗房。其實我一路都以為歐陽生只係 book 咗一般嘅渡假屋，估唔到原來......

(1) 有個露台可以望住一望無際嘅大海

(2) 而個 view 就係咁架啦，係咪真係似去咗 honeymoon？

(3) 門口前面仲有一張枱仔，第二朝可以對住個海嘆早餐

(4) 不過房入面就 yap 咗少少，一張白 side side 嘅雙人床，一張梳化，一部電視，一個廁所，但係就勝在設備齊全，連風筒都有！

我哋仲話如果自己屋企有個咁嘅 view，真係嘆到暈！

擺低晒所有隨身物品喺房後，當然走落沙灘行吓啦！行行吓男朋友仲唔知喺邊執到舊心形石頭出嚟（下圖照片左下角），我哋最後仲帶埋返屋企！

又無無聊聊咁學人影下腳印啦...

呢度就係我哋住嘅地方，個名叫 "The Bay"

見未有耐食晚飯，又知道呢度可以睇到日落，所以即刻入去餐廳飲嘢 hea 吓，等睇日落！餐廳今日好靜，更加令我覺得我哋去咗 honeymoon，因為真係好 relax！

嘩，個 view 真係無得彈！

無聊人影埋 d 相都係無聊 d... 請見諒！

睇吓男朋友幾嘆，衰就衰在冇三點式女郎比佢欣賞啦...

hea 吓 hea 吓就 6 點幾，開始日落啦...... 好大個咸蛋黃喺我面前出現，所以不斷咁影影影

呢張我覺得最靚！

待續...