鮮花花球宜家已經 fully booked???

2009 年 3 月 9 日（星期一）

係咪癲架？係咪癲架？

本來諗住今個星期去 wedding expo 搜集多少少有關花球嘅資料就 take action 去 join package，之前已經睇中一間叫做 JM Flower Workshop，見佢價錢都合理，款式又 OK，喺 esdlife 又有好 comments，打算打電話去問資料啦，點知已經 full 咗，唔再接鮮花 order！咁我唯有退而求其次話只要一個鮮花花球，其他襟花手花嗰 d 要絲花啦，佢都唔接我生意，唉！！！！！

我 11 月尾先結婚，今日都係 3 月頭啫，早咗成 8 個月打去問都 full，一路都以為自己算快手快腳，點知仲有人比我快 N 倍！個老闆都同我講：「無錯，你都算快，但仲有好多人快過你，因為你嗰日真係好好日子，我唯有睇吓有冇行家介紹比你啦！」

所以話呢，喺雙春兼潤月年，又擇中旺日結婚，真係未必係好事！

各位擇咗好日子結婚嘅 blog 友們，要加把勁啦！