2009 年 3 月 12 日（星期四）
每年嘅 3 月 12 日，都係我同男朋友拍拖紀念日，不經不覺，原來我哋已經走入第 10 個年頭啦！時間好似過得好快，諗返我同你走埋一齊時，我只係一個只有 17 歲，啱啱讀完中五嘅黃毛丫頭。
3 月 12 日，對我嚟講有雙重意義。除咗係拍拖紀念日之外，其實仲係男朋友求婚週年...... 求婚都去紀念...... 好似好白痴咁，所以我完全冇諗過將個慶祝著眼點放喺「求婚」上，我只係想同你繼續慶祝「拍拖週年紀念日」，但係估唔到，原來你又再次比驚喜我！
記得今日 lunch time 時，你打比我話你下午要喺公司開會，唔知開到幾點鐘，叫我放工後喺公司一邊 hea 一邊等你電話，好在你派咗粒定心丸比我話唔會開得太晏，咁我唯有做一個安靜小女人咁等你電話。
我嘅放工時間 5:30 到啦...... 未有／亦冇諗過咁快收到你 call；
你嘅放工時間 6:00 到啦...... 應該都唔會咁快收到你 call；
6:30 到啦...... 仲未有電話到嘅？我前前後後又喺公司 hea 咗 1 個鐘。我當時仲諗，點解我成日都要等、等、等；
6:40 到啦...... 仲未收到電話，我同自己講，如果你 7:00 都仲未比電話我，我就自己出去旺角行街先；
10 分鐘後，你終於打嚟，好嘢，走得啦！一落到樓下，我發覺有人跟住我，擰轉頭一望，哈哈，有個傻佬拎住一紮花喺度接我放工。原來你根本唔係要開會，只係去咗花店買花。我...... 當然好 surprise 啦，完全冇諗過有花收！係，我承認我係口不對心，之前我話過唔收花，不過原來喺特別日子收花，個感覺係好唔同，所以情人節就唔好送，特別日子送吓比吓驚喜就冇問題！
收咗紮花後我就諗...... 好在我冇一個人出旺角先，否則你就樣衰啦，哈哈！之後再浮現多一個問題：死啦，拎住咁大紮花，仲點出旺角食飯？後來男朋友提議改地點，不如近近地喺返銅鑼灣食啦！我當初都想堅持去返旺角，因為每年拍拖紀念日我哋都會去返同一間餐廳食飯（所以嗰間餐廳都做咗我 9 年生意啦），我唔想為咗紮花而破壞咗 9 年嚟嘅堅持。行到去巴士站，我當然企喺度等巴士出旺角啦，不過你拉咗我走，叫我喺銅鑼灣食，咁好啦...... 拎住紮花又的確礙眼咗 d，咁...... 下次補返啦！
估唔到...... 原來你又帶我去一年前求婚時嘅 agnes b. 餐廳食飯，仲一早 book 咗枱添，原來你早有預謀！！！我人生入面又有多咗一個晚上係有好多 agnes b. 陪住我啦！
每次見到 agnes b. 嘅餐具，我都好想據為己有！
侍應安排咗我哋坐一張 4 人枱，我哋打對面坐，而我隔離就坐咗我嘅好朋友：紫玫瑰花一紮！
我都知你呢排好忙架啦，1 個人要做 4 個人嘅工作，加上你 d 手足唔聽話，所以一坐低你嘅電話就不停響，我一個人無無聊聊，就影吓呢樣，影吓嗰樣咁囉！（餐廳氣氛唔錯，而且仲見到冇乜人食飯添，哈哈！）
食完一餐好完滿嘅晚飯之後，我哋就返屋企 lu！本來等巴士返入元朗時無無聊聊咁影咗好多靚相，可惜唔知屋企部電腦係咪同我搞對抗，一插張咭入去，竟然乜相都冇晒！好在喺唔見相之前我捉住男朋友同我影咗幾張啫！而我自己拎住紮花嘅獨照，就只係得返呢張...... 「在廁所中的自拍照」！
我數過啦，一紮有 11 枝紫玫瑰，連條蝴蝶絲帶都係紫色架，仲有其他嘅襯花......
呢個就係男朋友平時影相個樣，木木獨獨咁，所以佢影婚紗相時算係表現得好好架啦！
其實...... 我咁大個女，今次只係第二次收花，所以心情仍然好興奮！第一次就係求婚時收嗰紮，兩次都係 11 枝紫玫瑰。故此...... 請原諒我...... 少機會收花嘅人就係咁無聊，係咁影、影、影...... 男朋友比我捉咗嚟充當臨記，佢都好無奈！
玩咗咁耐，幾唔捨得都好，始終都要將 d 花拆開放入花樽。一路以嚟都好想將整個過程影低，但係因為拆花程序繁複，我中途都要幫手，所以只係影到呢兩張咋！
大功告成啦！我同男朋友都唔識插花，所以完全係毫無美感，點樣拆就點樣插！
將個花樽放返喺廳，好讓我多 d 對住 d 紫玫瑰並且索吓 d 花香味，不過我發覺，原來會阻住我睇電視架，wakakakakaaaaa！隔離嗰盤紫蘭花（又係紫色 -_-"）就由新年時擺到宜家～
當我搞掂晒紮花後坐低回想返呢 9 年情，再望望自己一雙手，原來心裡面一早被呢個男人佔據......
呢隻戒指，係第一年同呢個男人拍拖後佢送比我嘅第一份生日禮物。當年我記得佢講過會喺我 25 歲前娶我（當時我只有 18 歲），然後就將隻戒指戴喺我左手中指上，我嗰刻仲諗：第一年就講埋 d 咁嘅嘢？不經不覺間，原來我都戴咗呢隻戒指 9 年咁耐啦！婚後，呢隻戒指將會卸任，而喺我嘅無名指上將會被套上一隻屬於我倆嘅結婚戒指。
至於右手嘅中指，就戴咗呢隻求婚戒指。原來，呢隻戒指都暗暗地陪我走咗一年嘅愛情路。婚後，我都會依然戴住佢，永遠、永遠。
多謝男朋友為我預備咗一晚神秘驚喜！雖然冇話特別有一份禮物，但係我已經極之開心！至於我...... 我都唔係坐享其成嘅人，大家可以喺埋一齊 9 年，當然係雙方都有付出努力，我都要做返 d 嘢～
上個月情人節男朋友送咗部 ipod touch 比我，我當時仲好衰咁乜都冇送比佢。其實我一早諗定會回返部 ipod touch 比佢，因為我知道佢比我更加有需要用。而且，我今次唔係就咁送比佢架！我都有花少少心思...... 話說我知佢好鐘意聽某一個電台節目，但因為播放時間係 13:00 - 15:00，所以永遠都冇機會聽得齊咁多集。咁我都好識做嘅... 一早幫佢 download 晒之前一個月嘅集數，放晒入去比佢聽，等佢可以慢慢聽返...... 一個月咁多啦～ 希望 honey 你鐘意啦！宜家我哋一人一部啦，記得要將你部 ipod touch 嘅 wallpaper 轉做婚紗相，知冇？
尋晚，我真係非常開心，因為真係冇諗過會去 agnes b. 食飯，更加冇諗過會有得收花！下次唔洗咁安排啦，我都係想出返去旺角食飯慶祝多 d！因為...... 下年你要花心思慶祝 11 月 21 日嘛，^^，唔知咁樣諗法，你會唔會好快有好多白頭髮呢？
Honey，多謝你再次送我一屋玫瑰花香味！原來喺呢種花香味之中生活，係會令人覺得好開心，好幸福，好心甜架！
好sweet呀!你bf好好呀成日都會比surprise你~ 如果我個個醒目d就好啦
回覆刪除[版主回覆03/13/2009 17:51:00]haha, 今次真係大爆冷! 我以為佢過咗情人節後就會回復正常, 點知原來佢都有悉心安排!
有冇放粒panadol 去個花樽度呀~~
回覆刪除[版主回覆03/13/2009 18:10:00]我之前都聽收音機咁教呀~ 不過我就冇放 panadol 落去, 但係放咗砂糖, work 唔 work 架?
好sweet 呀.........好老實 ,拎住扎花係街都幾論盡 , 又麻煩架 , 你地去左agnes b都算有意義啦 , 呢間野都幾貴下 , 可能就係禁 , 所以禁少人law........haha.........
回覆刪除10年長跑 , 好犀利呀......祝福你地有無限個10年........
[版主回覆03/14/2009 10:21:00]多謝呀, 我都祝福你同你 honey 有數之不盡嘅 10 年....
係啦, 其實呢間餐廳都幾貴, 我哋嗌咗兩份 main dish + 一份青口已經要 $8xx....
好sweet啊~
回覆刪除妳們好浪漫~
妳唔傻咖,我同男友個個拍拖週"月"都會慶祝吓,嘻嘻~
[版主回覆03/14/2009 10:22:00]哈哈.....其實....我哋都有慶祝拍拖週月架~ 我哋仲無聊, 每月嗰一日都會去返嗰間餐廳食飯~
好甜、好冧、好浪漫 ，真係唔好睇輕你男友外表好似木獨d(別要介意)，其實內裡極溫柔、體貼，見你男友對你咁好、咁婸你，仲咁有心思，真係替你開心，好幸福！
回覆刪除十年，十年的時間真不容易，日後要向你好好請教兩人的相處之道！
[版主回覆03/14/2009 10:25:00]你一味讚佢, 其實主任都好錫你! 有時我覺得主任外表好硬 (或者係好 man 去形容), 但佢其實都係好照顧你, 對你一樣體貼! ^^
其實我諗相處之道......都係包容多 d 囉, 唔好成日放 d 心事喺心唔講出嚟, 我呢 9 年嚟都係一路學緊架咋~
真係好鬼sweet呀~!!!
回覆刪除[版主回覆03/14/2009 10:22:00]耐唔耐先一次咋嘛.....唔好笑人啦~
你bf真係好錫你呀﹗成日比驚喜你^^
回覆刪除[版主回覆03/14/2009 10:26:00]呵呵....算 ok 啦! 或者因為呢一日有雙重意義, 所以先咁悉心安排啫~ 以前嘅拍拖週年...我哋都係互送禮物, 去返同一間餐廳食飯架咋~ 好簡單!
你男朋友真係好錫你~ 真係好浪漫呀~ 成日都會俾咁多驚喜你~ 你真係好幸福呀!!
回覆刪除[版主回覆03/14/2009 10:27:00]我都覺得今年佢表現好出色, 但係....其實以往嗰幾年我哋都係就咁食飯慶祝, 冇乜特別架咋~ 或者因為今年搞緊結婚, 心態唔同咗啦!
你地真係好甜呀...^^
回覆刪除[版主回覆03/14/2009 10:27:00]^^, 我希望婚後都一樣甜, 直到大家變咗伯爺公, 伯爺婆, 哈!
好sweet呀....wow......你未來老公真係好錫你呀~~~~
回覆刪除[版主回覆03/14/2009 10:28:00]哈.....佢今年先搞咁多小動作咋....以往,.....唔係咁架, ^^
10年啦~~~好勁呀!!!
回覆刪除你同男友幾時都咁sweet~佢又成日有surprise 比你~真係好錫你呢~
不過你都好有心思~dl一個月既節目落ipod度～好細心呀！！！
d 花咁靚~唔知你有冇諗過將佢整成乾花呢?
[版主回覆03/14/2009 10:31:00]冇錯呀, 唔驚唔覺原來踏入第 10 年, 時間真係過得好快!
佢呀....真係唔知點解今年咁 sweet, 以前都唔係咁架...嘻~
其實我都想將 d 花做成花乾, 紀念吓都好嘛! 不過唔知點做呀, 等我一陣上網 check 吓先~, thanks for your idea!
十年真係好難得, 一齊渡過十年真的不容易, 恭喜你哋又可以共同渡過第十一....十二年......三十年 每月拍拖紀念日我都要同男友一齊去慶祝一下!! 收到花後真的吾捨得拆出來呀...我都會把握未拆的時候係咁影, 插咗落花樽都要影
回覆刪除[版主回覆03/14/2009 10:33:00]^^ 多謝, 我都祝你同你 honey 有無限個 10 年....直到永遠!
我發覺原來好多人都有慶祝週月紀念喎...原來....我同 honey 都唔係怪人, ^^
好鬼sweet, 我老公都係拍拖週年同我求婚, 佢話唔使記多一個日子...男人都係咁...
回覆刪除[版主回覆03/16/2009 10:38:00]haha, 因為佢哋全部都懶!!!!
真係好鬼SWEET 呀!!! 好開心啊...
回覆刪除[版主回覆03/16/2009 10:39:00]嘻, 我嗰日都好開心, 有少少估佢唔到囉~
woo~ 你地一齊已經 10 年喇~ ^^ 你honey 好浪漫呀~ ^^ sweet sweet
回覆刪除[版主回覆03/16/2009 10:40:00]係呀, 踏入第 10 年啦......仲.....覺得自己開始老啦
歐陽生又一浪漫之作！好羨慕啊~~ 不過妳都係一個好細心、窩心o既女朋友，果然係天生一對呀！好 sweet 呀！
回覆刪除[版主回覆03/16/2009 10:40:00]其實講 surprise 我就真係唔夠佢啦~ 我捉唔到佢路, 唔知佢想要乜, 所以成日都係佢比人讚啦.....哼!
嘩~~~歐陽生....好sweet呀!! 又俾驚喜你la~~~~太幸福la~!!
回覆刪除[版主回覆03/16/2009 10:41:00]多謝! 今次真係估佢唔到~ 佢又威咗啦, 哈哈!
又一個愛情故事啦！
回覆刪除十年......感受到你哋依段路程，好恩愛，好touching呀！
[版主回覆03/16/2009 10:58:00]多謝喎~ 比你咁形容一吓, 覺得好 warm 添~
唉吔....你見你冧到o個個樣呢....
回覆刪除見到佢對你o甘細心同o甘有心思真係替你覺得幸福ar. 我相信你地一定會有一個好甜蜜好温暖o既將來!
最后...要恭喜你ar....揾到個超愛你同勁錫你o既老公!!
[版主回覆03/16/2009 12:33:00]haha.....乜我個樣好離譜咩? ^^
咁....咁歐陽平時木木獨獨, 今次真係有 surprise 嘅~
好替你開心. 係呢,我星期六去了婚展,今日下午會放d相在blog.你想看就去啦
回覆刪除[版主回覆03/16/2009 14:11:00]係咪 fb d 新衫相? 我都整咗啦! ^^
回覆刪除我從來未見過歐陽咁正經影相, 佢對住你至咁man咁認真, 呢d至係阿嫂既專利! 我地呢d朋友仔只可以見到佢輕挑篾視既一面!!!
見到你地啜啜照真煙韌 + 凍死!!!
[版主回覆03/16/2009 14:11:00]都唔係架, 你唔好以為呢張合照好簡單, 其實都得來不易! 我起碼影咗 3 張先收貨! 一係企到路人甲乙咁, 一係就吱都唔笑, 同佢影相都幾攞命!
好彩係煙韌 + 凍死, 我驚嘔死你...哈哈!
你男友真係好好，十年都咁有心思﹗﹗ 好幸福呀﹗~b
回覆刪除[版主回覆03/16/2009 14:11:00]多謝呀! 佢真係冇乜幾何!
嘩， 歐陽生 好ＳＷＥＥＴ同好有心思啊～！ 抵讚！ 紫色玫瑰花好靚啊～～～ 好羨慕
回覆刪除[版主回覆03/16/2009 14:12:00]haha....唔洗羡慕, 你一出聲, hei hei 會包起成間花店嘅紫玫瑰比你, hohoho~
好幸福!!! =)
回覆刪除10年真係唔容易呀!~~ 我相信黎緊既 20年 30年.....都會睇到你既SWEEEET 周年報告!!! ^O^
[版主回覆03/16/2009 14:13:00]承你貴言! 我驚歐陽生見遲吓都係自家人.....落大排檔食當慶祝就算呀
羡慕死我啦!好sweet呀!
回覆刪除[版主回覆03/16/2009 15:12:00]我唔相....平時你 honey 對你咁好, 我羡慕你就真啦!
唔會啦~ 當佢記起我會敏感時, 行expo都唔睇花球了, haha ^o^
回覆刪除[版主回覆03/16/2009 16:16:00]哦...原來你對花敏感, 咁就無辦法啦! 不過我知道你 bf 都錫你啦! 可以喺 fb 買咁多相...哈!
羡慕死人呀
回覆刪除[版主回覆03/17/2009 11:39:00]^^, 唔好咁講啦~