試衫篇 の 預告 @ 法國婚紗

我已經去咗法國婚紗 confirm 晒我同男朋友大日子當日嘅所有服飾啦！

喺度真係要好好多謝兩位幫我揀衫嘅 blog 友。係，你哋冇睇錯，我係搵咗兩位 blog 友去。或者大家可能估都估唔到，confirm 大日子服飾竟然搵 blog 友去？其實...... 雖然同呢兩位 blog 友係透過寫 wedding blog 而相識，但係唔知點解我哋識咗之後，好快變咗好好嘅朋友，我諗我哋婚後都一樣會出嚟食飯傾計，傾吓身邊個男人鼻鼾聲有幾大，傾吓超級市場近期有咩減價貨品，傾吓點樣打苦頭儲私己錢，交流御夫術......哈哈！小高及 Ci Ci，雖然今次請你哋去食咗 cheap cheap 嘢，不過同你哋 share 資料真係超開心，而且仲可以先睹為快小高喺台灣 Catherine 嘅婚照，簡直流晒口水呀！

三位美女的合照：

約咗 12:00 去法國婚紗，我同男朋友 + 2 位 blog 友一行四人向法國婚紗出發。一入門口，試衫姐姐阿 Mi 已經好好招呼我哋，安頓我哋坐好，再等佢推 d 衫出嚟。其實...... 我都唔算好多衫啫，只有 2 車，仲要排得唔係好密，我睇到後面嗰 pair couple，淨係個女仔都有 3 車啦（試衫影婚紗相咋喎），我諗我唔算過份啩？

試完我 d 衫，再試埋男朋友 d 禮服，真係估唔到，原來一玩，我嘅個人 fashion show 試咗 35 件衫，玩咗 5 個鐘！你冇睇錯，係 5 個鐘！法國婚紗有樣嘢好，就係唔會對你黑面，冇限定試幾多件衫，冇限試幾多個鐘，係任玩唔嬲嗰隻，不過衰就衰在只可以玩一次，冇得轉款！呵呵，真係難為咗阿 Mi 幫我走嚟走去。有 d 衫我心大心細，前後試咗兩次，佢又唔介意，仲喺試衫房同我換衫時比咗唔少意見我。唔知係咪因為怕比我 d 朋友聽到，佢鑊鑊比意見我時都係喺換衫時講，哈哈！

其實，真係要好多謝小高及 Ci Ci 幫我比意見之餘仲偷影咗好多相。佢哋好厲害呀，件件都有影到相，要比十個叻佢哋，等我可以同大家分享，不過限於係偷影相，又為免令阿 Mi 難做（因為阿 Mi 係我個朋友嘅朋友嚟架），今次我要 private 我幾篇嘅試衫 post，Blog 友限定呀！抱歉抱歉！