太興燒肉卷 promotion

早排媽咪問我有關回門乳豬一事，我先開始注意到原來回門當日都有嘢要準備。雖然酒樓都有送一隻回門豬，但由於女家親戚眾多（媽咪有七弟妹，老豆有八兄弟），所以酒樓送嗰隻豬應該都唔夠分。

後來打上去酒樓問，佢哋包嗰隻乳豬其實只係一般去飲時嗰隻「乳豬全體」嘅 size，計埋斬頭斬尾回比男家後，可以分比女家親戚嘅部位真係得好少，結果都係決定要買燒肉卷。

上網做吓資料搜集，睇吓買太興定美心好。一上去太興個網站後，就彈咗個 promotion 視窗出嚟，原來佢哋成立 20 週年，買滿 20 張就有 85 折喎！

http://www.taihingroast.com/hk/chi/news.php

再上上 esdlife 睇吓平時個價係點，原來平時買滿 20 張就有 9 折，講真，今次都唔係平好多咋喎！不過又有網友話佢哋唔係成日有 promotion，今次雖則只有 85 折，都算買得過喎！諗諗吓都啱嘅，呢個時勢，慳到少少都好吖！

不過要留意，推廣期有限，由 17/6 - 23/6，而且一定要 10 張 10 張咁買，呢樣比較麻煩！我都要唔到咁多張呀，宜家唯有周圍問人夾唔夾數～

各位 blog 友，如果有需要買燒肉卷就快快手計吓自己要幾多，17 號開始要 action 啦！

Remarks：

1) 燒肉卷有效期為兩年，由購買當日起計！我仲有半年 Big day，即係話到時我派比親戚後得返一年半有效，但係媽咪話冇問題，一年半都夠人換嘢食喎！

2) 燒肉卷面值 $50，親友唔一定要換乳豬，換其他燒味都可以，情況好似餅咭一樣，買多過 $50 就自己補錢！