煩惱中 @ Honeymoon

係時候要搜集吓 honeymoon 嘅資料啦！唔知點解一去到呢個 step，我係頭痛 + 煩惱多過 enjoy，點解人哋可以好開心咁 plan，而我就苦口苦面對住個電腦做 research 呢？

其實真係有 d 愁，因為我同歐陽生咁大個人，兩條友都只係搭過一次飛機，就係 2003 年沙士前一齊去咗泰國（自遊行），所以今次真係一個大考驗！

首先，我覺得先要決定咗以下嘅事，我個 honeymoon project 先可以繼續：

1) 幾時出發？

2) 去幾多日？

3) 去邊度？（<-- 呢個都未決定你話死唔死）

4) 跟團定自己去？

(1) & (2) 其實都係睇錢做人，幾時淡季咪幾時去囉；有幾多銀彈咪去幾多日囉，覺得自己真係開呢個 project 個頭開得有 d hea！

(3) 去邊度其實暫時都未有共識。有人提議我去歐洲，其實我又唔係太鐘意，因為我覺得歐洲好悶（對我嚟講），睇建築？No la，我其實唔係好識欣賞！Shopping？No la，我對住 LV、Gucci、Prada 唔會心動，反而見到 agnes b. 先心動。

之後有人建議我去陽光與海灘，e.g. 泰國（已經比歐陽生 ban 咗）、峇里、沙巴，其實沙巴自己都有少少興趣，因為真係幾 relax，不過我由細到大都唔鐘意陽光，我好怕曬，之前去泰國我係要帶帽 + 防曬（好神心地隔兩個鐘補一次），如果唔係因為天氣熱，我可能會著埋長袖衫先行出酒店，所以我已經預計到我去呢 d 地方會一 d 都唔 enjoy！

故此，我諗我都係日本算吧啦！11 月應該凍，冇咁曬啦啩？不過日本咁大，去邊呢？歐陽生話唔想去東京，都啱嘅，因為好似香港嘅銅鑼灣，唔 relax！所以唯有暫定去北海道，反正我都幾想去小樽及札幌！

(4) 呢個真係最頭痛。如果揀跟團，我又好怕係 d 鴨仔團，趕餐死，想買嘢又唔夠時間，又迫我去 d 我唔想去嘅地方。但就叫做有人帶我哋去吃喝玩樂，仲包晒機票酒店交通等等。

自遊行？我同歐陽生兩個都唔識日文，點溝通呢？用 body language？係咪真係得架？而且聽人講北海道比較偏辟，一定要坐巴士先去到某 d 景點，但係人生路不熟，容易乜搞成日都去唔到自己想去嘅地方？至於要自己 plan 行程，我相信唔會太難嘅，反正仲有時間，煲多兩本旅遊書再上網查吓應該不成問題。反而我想知住酒店定住民宿會平 d，買 package 定跟團再自己 stay behind 會著數 d。（救命，真係越嚟越師奶仔啦！）