2009 年 6 月 19 日（星期五）
身邊有不少朋友都話我宜家打緊呢份工好鬼好，有時我自己都覺得係。公司不定時提供零食或飲料不特止，閒時又會派吓生果，好似近期咁就興派荔枝，隔日就有得拎一袋返屋企慢慢嘆。有時再離譜 d（冇錯，我係用「離譜」呢個 term），公司係會派埋年貨，包括紅黑瓜子、糖蓮耦、糖蓮子、糖果朱古力、煎堆、罐頭鮑片、冬菇、蠔豉、榣柱、臘味、蝦乾、臘腸潤腸等等不能盡錄，我媽咪已經好幾年冇自己辦年貨啦！
今日返到公司，竟然比我見到以下嘅嘢......
嘩，我數過，一共有 45 個印花，肯定係唔知邊個同事去咗萬寧掃奶粉紙尿片得返嚟嘅成果啦！不過最奇怪嘅係，公司咁多人，唔明點解 d 印花會比咗我，唔通大家都認為我已經成為咗半個師奶，我先至係最有需要用上呢 d coupon？但，anyway，我呢 d 人當然都唔放過呢個機會啦，拿拿聲就貼晒成張印花表，貼完都仲有 15 個剩，轉個頭就送埋比朋友 lu！
有時我喺度諗，呢間公司真係差少少就做到 100 分，我真係喺呢度打死一世工都願。點解我咁講呢？部份好處之前已經提過，加上我份工係少許清閒（唔敢講到自己好得閒），因為工作性質，我每年嘅 3 月及 9 月先會最忙，其他時間就可以準時收工。上班時間更一度令人羡慕，我明明係一個普通嘅 OL，但我返 10:00，放 5:30，只要你唔好遲過 d 高層出現喺 office，話之你當日返 11:00 都冇問題！遲到、早退從來冇人過問，申請放大假可以即日提出即日生效。我曾經試過因為想去跳舞而早一個鐘閃人，仲要唔洗扣假，單聲就得....真係正！
（講到唔捨得收筆）仲有仲有，公司三年前請咗個無鬼用嘅人事部返嚟，佢唔識扣人大假，明明 d 大假冇得累積，佢就唔理，所以宜家公司每個人閒閒地都有十幾二十日大假。我啱啱先 check 過，截至今日為止，我竟然有 23 日大假未放，仲要冇 deadline....我有一個同事仲累積到 47 日添....
當然，一間公司有利亦有弊。公司裡面總共有 17 個人，但有 5 個人都係吸煙者。本來有 7 個架，但因為一個身體出現咗毛病、另一個因為生咗個仔，所以兩個都戒咗。對於我呢個討厭煙味嘅人嚟講，要抵受佢哋嘅二手煙的確有 d 難頂。雖然，政府已經推行咗無煙工作間，但公司嘅人一於少理，照喺自己房食煙，仲有時會叫你入房傾公事，間接被迫食二手煙。我本身已經有鼻敏感，真係好難想像他朝我懷胎十月時個 b 仔點算！
呢份工，你願意打死一世嗎？
沒有留言:
張貼留言