我的嫁衣 の 選定 Part 2 @ 法國婚紗

2009 年 3 月 29 日（星期日）

最後一篇試衫 post lu！上次睇晒 bell-shaped，今次睇 a-line 款啦！因為我試晒所有婚紗之後都決定唔到 confirm 邊件，所以當時再叫 sales 拎多幾件後備選擇比我試，故此，有 d 款之前係冇 post 過出嚟架，宜家去片～

第一件：

呢件衫整體都唔錯，不過就硬係唔鐘意佢個牛角款 tube，睇 model 張相都唔係咁角，但係我一著上身，嗰對牛角就好突出。

第二件：

其實試衫當日我依然好迷惘，都唔知自己想搵 d 咩款，所以見到好睇少少嘅都要試吓上身，呢件就係其中一件啦！

第三件：

呢一件睇個 model 著真係好靚，一心以為自己著唔到 10 成都可以著到 8 成似啦，結果..... 完全好似著咗另一條裙咁～

係時候要剝大家棚牙，個個都話我瘦，我都話係錯覺架啦！你哋睇我隻麒麟臂？簡直拍得住我偶像郭富城飾演嘅步驚雲呀～

唔知講緊 d 咩笑得咁開心～

第 4 件：

都係嗰句啦，註定自己根本就冇得食 model 呢行飯，著咗出嚟，蘿又大到死～

多謝兩位 blog 友出盡力係咁幫我偷影，呢件衫嘅偷影數量係全部之冠，簡直係多角度、多面睇！

相信係小妹本身蘿柚都唔細，加上 pat pat 位嗰 d lace design，令到我下盤超大，唔知未來奶奶會唔會覺得我勁好生養，^^

第 5 件：

大家有冇發覺我試咁多套衫，總有一 d 款帶有黑色原素？發覺原來自己都幾想突破一下！本來 sales 想幫我落鋼紗，但係我發覺唔落鋼好睇好多喎！

第 6 件：

呢件我覺得幾靚喎～ 雖則依然都係冇 42" 長腿，不過呢件真係可以值得考慮。本來呢件最後列入我考慮名單，但係多謝 blog 友小高一句：「呢件婚紗相信穿著需時，當日全日都會趕到成隻積咁，加上伴娘姊妹們都未必識幫你著，個蝴蝶結要綁得靚都係一種技巧，諗清楚好 d！」就憑佢呢一個 point，即刻諗通咗！

第 7 件：

其實以下呢幾件我自己都有列入考慮名單之中。

著出嚟幾 slim 幾好睇～

而且個尾拖得好靚！

第 8 件：

呢件係唯一一件婚紗我係試咗兩次！第一次著住 girdle 去試，點知前面個 deep V 穿咗崩，後來又換咗 nu bra 試多次，比較吓個結果。

左：著咗 girdle，好明顯地穿咗崩！

右：著返 nu bra，順眼好多啦！

sales 又無端端消失咗啦，好似話有客搵佢，當然又發揮偷影本色係咁影啦！多謝 blog 友仲幫我影得咁近！

左：好清楚地見到原來上身雖然係自己比較抗拒嘅背心款，但係原來釘咗好多石，好閃，之前嘅抗拒感頓然消失晒～

著咗 nu bra 出嚟，個個都話整體感覺唔同晒，nu bra 真係咁神奇？

個拖尾我覺得拖得好靚，march in 時應該唔錯，唔算太長，以 a-line 款嚟講算係唔錯，不過男朋友就話拖出一條血路....哈哈！

第 9 件：

呢件係新款，之前都講過自己比較鐘意釘工重嘅婚紗，當日個個賓客都有機會企喺自己身邊，當然有咁勁得咁勁啦！

又係好鐘意佢個拖尾，成把扇咁，好靚！

所有試衫相都睇晒啦！恕我唔可以公開最後 confirm 咗咩款，因為真係想保持神秘感！但係我可以話比大家聽，你哋大部份都估錯晒！^^

而婚紗方面，比個大貼士大家，我係 confirm 咗 a-line 款。仲記唔記得我講過話試衫 sales 阿 Mi 經常同我換衫時比意見我？

我當時喺房問佢：「你覺得我著 a-line 定 bell-shaped 靚？」

阿 Mi 不止一次喺房度細細聲同我講：「你真係好適合著 a-line，你又高又唔肥，好平均，講真著得 a-line 款又 carry 得到嘅人唔多，你真係著得好好睇！你揀 a-line 啦，如果你揀 bell-shaped 真係 side 咗你，諗清楚，一生人只有一次著婚紗。」

聽完之後我竟然覺得好 warm，普通一個試衫 sales 好似好緊張你 confirm 咩衫，而且佢真係好苦口婆心咁同我講咗好幾次，當時其實我真係好迷惘，突然間覺得佢幫我做咗個重大決定咁～ 加上...... 我每一次試完婚紗出嚟，我有一個小發現，在座評判好似對我著 a-line 婚紗時意見多多，反而 bell-shaped 時就冇乜反應，再諗吓，男朋友亦不止一次同我講，想我著 a-line 多 d，考慮到種種因素，我婚紗方面最後係 confirm 咗 a-line 款架！