廣州婚紗街血拼記 @ 交通篇

2009 年 4 月 11 日至 12 日（星期六、日）

趁住放復活節長期假，就同男朋友兩條友上廣州婚紗街血拼，而佢又可以上去嗰個魚市場買餐飽。由於好多網友都係上深圳笋崗，反而我唔識行深圳，只識得行廣州（行慣嗰個魚市場嘛），所以就決定教吓大家，上廣州嗰邊嘅交通情況啦～

每年嘅復活節，我都會收到男朋友送嘅復活節禮物 --- 復活蛋，啱晒有「朱古力怪魔」稱號嘅我！

其實我已經用最簡單嗰條路線上去，不過始終聽落去都仲好複習....哈！

元朗 > 上水火車站 > 羅湖火車站 > 過關 > 廣深火車 > 廣州市二宮地鐵站

係咪轉到頭到暈呢？？？？哈哈......

點樣喺香港過深圳我唔多講啦，相信好多人都識～ 係之後嘅交通我先解釋一下...

去到深圳，就要搭廣深火車去廣州，只要跟住 d 人一路直行，沿路猛咁見到朱咪咪叫人去整牙......行到咁上下會見到寫住火車站，有好多人排隊，嗰度就係啦！

我哋係搭「和諧號」火車上去，記得買火車票時要買廣州東，唔好買廣州呀～ 至於中途站...... 有 d 車途經樟木頭，有 d 車途經石龍，唔好理佢，總之買最近嗰班，總站開去廣州東就得啦！

到時可以望住呢 d 航程表，就知道大約時間，不過要留意，如果週末上去，係冇可能買到即時嗰班，一般要等 45 mins 以上先有位架！

呢張係我回程車票～ 家下佢哋好潮架啦！張飛有個 bar code，過閘機時要 do 機，而且你唔好上咗火車就扔咗張飛，因為到站時又係要 do 閘機架！

註：回程時我 21:00 買飛，只可以買到 22:15 火車，所以淨係等車都用咗好多時間

去到廣州東，又係跟住 d 人一路直行，但要望住你嘅左手邊，沿路有好多訂酒店嘅 counter...

直至見到「廣州日航酒店」counter 轉入去，就係地鐵站入口啦！

入到地鐵站當然要買飛，佢哋售賣機嘅操作方法同香港嘅差唔多，都係 touch screen

不過張「飛」就特別 d，係一個硬幣。

買咗飛，都係要 do 入閘機及出閘機架！

由廣州東搭地鐵去市二宮站，中途要落車轉車，不過唔難，好易睇，十足十香港一樣～

嚟到市二宮啦～

記得要喺 D 出口出喎，嗰條江南大道北就係我哋開口埋口嘅婚紗街啦！

我哋入住嘅天一酒店，是晚房租 HK$360 一晚，好似係四星級酒店，一位熟悉國內嘅同事話要 HK$3xx 一晚嘅酒店已經係好高級嘅酒店喎！咁又的確好 OK 嘅，冇令人失望！

相片內紅圈就係市二宮地鐵站 D 出口，一出地鐵站向後望就係酒店啦，真係超級方便，而且 ICBC 銀行嗰度就係馳名香港嘅廣州婚紗街啦，方便程度直情係爆燈！

酒店嘅右邊就係「好百年廣場」，等於香港嘅金都商場一樣，不過有三層，又係行到死死吓！但係我喺呢度有好多斬獲呀！