姊妹裙 joined @ Plovee

2009 年 2 月 12 日（星期四）

一早就已經好擔心唔知喺邊度買／租姊妹裙好！因為金都嗰 d 又信唔過，百利更加不在話下，本來有諗過去旺角中心買，但係選擇又唔多。醒起之前睇 d blog 友嘅 blog 時，有幾位都 join 咗尖東堡地庫一間叫 Plovee 嘅舖頭，知道佢哋做緊 promotion，短裙 $198，長裙 $298。價錢極之吸引，而且數數吓都有三位 blog 友 join 咗呢間，就即管去睇睇咩環境。

去到佢哋間舖，好似好 up dup 咁，OK 啦，一個無人流嘅商場嚟講的確係馬虎咗 d，但唔理咁多，d 貨唔 ok 的話，門面金碧輝煌都冇用啦！

舖面大大隻字寫住價錢，呢個價係唔包披肩，唔包改裙等等，唔緊要，呢 d 嘢自己出去搞都 OK。至於款式，嗰度數數埋埋都有 around 20 款嘅，都係 standard 姊妹裙款啦，但有幾個款我一望都已經幾鐘意，而且仲可以免費改 design（當然唔可以大改啦）。顏色選擇方面都好 ok，個 sales 比咗好多色版我揀，初時睇紫色，淨係紫色都已經有好多隻紫比我揀。男朋友都話 ok，我哋嘅結論係雖然款式唔叫好突出，但係買嚟做姊妹裙就絕對出得場面，結果就梗係乖乖比錢 hold 價啦！

初時個老闆問我要幾多條，我話要 5 條短裙，佢夠膽死竟然叫我 full paid，我當然唔制啦，咪同佢講，我都有 3 個網友 join 咗，佢哋都唔洗 full paid 喎，結果佢好快就叫我比住 2 條裙訂金先，hold 住 $198 呢個價，之後再買幾多條裙都好，都係比返舊價我，咁都合理 d，好啦，成交！

宜家就同男朋友有以下幾隻顏色嘅心水，最終當然要問吓我班好姊妹想著咩色啦！

P.S. 以下圖片並非 Plovee 嘅圖片，我只係喺廣多姊妹裙網站 copy 出嚟做個參考。

(1) 粉紫色

最終揀紫色嘅機會應該唔大，雖然我嘅 theme color 係紫色，但發覺原來我班姊妹唔係咁接受紫色喎！咁都 OK 嘅，我唔會 force 佢哋著 d 佢哋唔鐘意嘅顏色，雖然我係主人家，但我唔係大晒架嘛！

(2) 粉黃色

粉黃色其實幾討好，大部份人都可以 carry 到，姊妹們應該會著得幾 happy，但係考慮到酒樓 backdrop 極有可能都係粉黃，所以暫時都係再諗吓先。

(3) 粉藍色

本來幾有衝動想決定用粉藍色，因為我覺得較少人著，而且唔會同我撞色，又唔會撞 backdrop，但係當我同班姊妹講時，佢哋又好似唔係咁接受喎，ok，咁好啦，條裙係你哋著，當然要順你哋意啦！到時再試吓，真係接受藍色就再改囉！

(4) 湖水綠

家下極有可能會揀湖水綠，因為已經有 2 個姊妹最大反應，話湖水綠 good 喎！都好吖！湖水綠一定唔會同我撞，我都冇湖水綠晚裝。而且 Plovee 嗰隻湖水綠好順眼，望落去都好舒服，應該都係 good choice！

(5) 蘋果綠

既然姊妹們咁 buy 綠色，蘋果綠都不失為一個好選擇，到時再比佢哋自行決定啦。因為講真，其實我對姊妹裙呢項 item 要求唔高，裙係佢哋著，當然等佢哋自己揀啦，只不過我唔想要香檳金／白色，好似普通咗少少！如果我唔包裙，我先會選擇呢兩隻色，等佢哋易 d 買裙嘛；既然我包埋裙比佢哋，梗係想佢哋揀 d 呢兩隻色以外嘅顏色啦！

至於伴娘裙方面，我都係冇所謂，只要唔好同我撞色就 OK！Zoe，你應該收到啦？長裙又好，短裙又好，你完全可以自由選擇。8 月啦，8 月我同你去元朗揀裙吖！