與父母意見分歧 @ 租大巴

2009 年 2 月 3 日（星期二）

話說我將會喺銅鑼灣區擺酒，而我外婆嗰邊嘅親友（包括我自己）大部份都住屯門元朗區，為咗方便嗰 d 長輩級人馬，我一早都打算租架 60 座旅遊巴車佢哋返入去，仲會喺屯門及元朗區設落客站，方便佢哋返屋企。

見距離婚期仲有半年左右，諗住都係時候搵車，趁父母都喺屋企時問吓佢哋想點，然後再搜集多少少資料就去 book。點知當我一出聲問，我先知道原來老豆所諗嘅同我嘅係完全唔同。

首先，老豆問我預算男女家親戚一共有幾多圍，我答：「如果佢哋逢請必到的話，女家有 8 圍，男家 2 圍唔夠，夾埋 10 圍左右。不過男家唔洗要車，因為 d 親戚住得好散，有沙田，有大角咀，有青衣等等，況且人數唔多，唔洗租比佢哋。」

老豆：「咁點得架，因住一陣比人話你大細超呀！女家有車男家冇車喎......」（繼而覺得我應該租一架 for 女家，再租多一架 for 男家）

我心諗：Oh my god！我邊得閒照顧咁多個人嘅感受呀？所以我答佢：「但係男家人數真係唔多，又住得咁散，個個都送到返屋企，我咪好唔得閒？」

老豆：「你唔怕比人話咩？」

我：「真係唔洗租比佢哋啦，唔洗唔洗唔洗......（下刪數百句『唔洗！』）」

老豆：「咁架車會點行呀？」

我心諗：吓，我宜家咪問你想點行囉，你係一個職業司機，條路應該點行你仲清楚過我啦！我換一換語氣：「我想租架車比 d 親友返入新界，因為遠嘛，咪問吓你想點停站囉。因為要額外停站的話，有 d 租車公司會逐個站收錢，所以我想問定先，再出去 quote 價。」

老豆：「咁呀...... 停一停石硤尾，你『女麻』『女麻』住嗰度嘛，再停大角咀，沙田，青衣 for 男家親戚，之後先入返屯門元朗啦！」

我：「吓？石硤尾都要停？邊有人會停咁多個站呀？都話男家親戚唔洗咯，咁搞法，呢個唔係我嘅原意喎...」

老豆：「咁你嘅原意係想點？」

我：「我只係想問吓你哋，第一，係咪要停一停屯門，再停一停元朗；第二，有冇特別要求停屯門先定係停元朗先，如果冇特別要求，我就叫租車公司自己決定，人哋有晒經驗要點行嘛。」

但係唔知點解老豆仍然覺得男家嗰邊最好都做足...... 我明白你唔想我比人話閒話，不過真係冇人咁做呢...... 個個都送晒返屋企的話，我真係唔知點安排......

***********************************************************************

後記：

經過一餐晚飯嘅熱烈討論之後，我出盡九牛二虎之力去說服老豆，最後終於獲勝........呵呵呵～

宜家已經決定咗，架大巴只會停屯門一個站，連元朗站都慳返，最緊要車晒 d 新界人返入去就 OK 啦！