廣州婚紗街血拼記 @ 行程篇

2009 年 4 月 11 日至 12 日（星期六、日）

DAY 1 @ GUANGZHOU

為期兩日嘅血拼之旅，話咁快就完晒，皆因行程非常之充實。由於酒店要下晝 3:00 先可以 check in，所以我同男朋友到埗後就行一次婚紗街先，索吓料，知道佢哋大約嘅價錢後先上房從長計議點買嘢可以慳得最多！

我哋食完 lunch 開始行，行完一轉婚紗街（即江南大道北）都接近 4:00，係時候 check in。交低 $300 按金（當然比港紙，d 人仔留返嚟血拼用嘛），問埋 reception 拎地圖後，就上房 plan 路線啦！

先介紹我入住嘅酒店先！強烈建議各位 blog 友，如果上廣州，真係 book 天一酒店最方便！

酒店房都幾大，一張床都可以訓到兩個人而唔覺迫！

只係個衣櫃怪怪地，有塊全身鏡對住兩張床，所以我哋長期都打開隻衣櫃門！

settle down 後都四點幾，把握最後時間行埋隔離嘅好百年廣場。發覺呢個商場都有好多香港人行，而且有某 d 物品平過江南大道北，所以都買咗少少嘢。本來想買埋利是封先收手，但由於未計掂數要買幾多，而且又接近晚飯時間，所以決定先返酒店放低 d 嘢，plan 吓數量，聽日再買過。

上到房睇吓電視抖吓，望望隻錶，9:xx 啦，係時候出去搵食！Oh my god！10 間有 9 間食肆 d 嘢都賣得 7788，後來先知原來廣州人好早食晚飯，佢哋嘅 8:00 打後已經算係宵夜時段 -_-"，結果求其搵咗間食店食 d 嘢...... 但好明顯係唔滿足，結果又走去附近一個大型商場入面行家樂福（喺香港執咗笠好耐 lu，搬晒上大陸）。男朋友提議得去行家樂福，當然知道佢一定係唔夠飽啦！而且廣州 d 嘢食真係好平：一碟即炒嘅揚州炒飯 RMB5、三肉一菜飯 RMB6、一隻雞脾 RMB3、20 隻餃子 RMB5、一支可樂 RMB2.5（size 仲要比香港嘅大），加上佢哋就快收舖，係咁倒 d 食物，真係好浪費...... 嗰一刻我覺得自己拯救咗好多食物，呵呵！

行完都已經係夜晚十點幾十一點啦，係時候要返酒店 plan 吓第二日嘅血拼路線！

***********************************************************************

DAY 2 @ GUANGZHOU

之前一日問定幾間會幫襯嘅舖頭睇吓佢哋幾點開工，原來都係開九點幾十點，所以我哋都唔可以偷懶，都要早起身！

離開酒店第一樣嘢當然又係搵食啦，唔知點解好想食粥...... 廣州人果然生活好有規律，我搵咗幾間粥舖都已經賣晒，當時只係朝早十點幾咋......

食完早餐就再掃多次婚紗街及好百年商場，買埋未買嘅物品，今次主攻會買嘢嘅舖頭先入去問價。一問之下，真係幾平，可能因為朝早第一單生意，問咗幾間，幾間開出嚟嘅價竟然平過尋晚問嘅價，我套靚靚茶具只係 RMB68 添咋，當然扑鎚買埋啦！搞兩搞，又搞到中午時間......望望錶，係時候要 check out，不過又未買晒嘢喎，見自己拎住咁大箱茶具，諗住返酒店執少少嘢先（因為真係太近啦，可以成日返去），再 request 遲 d 先交房。酒店都好好，比我 extend 到 13:30 先交房。

行多兩行，買埋最後嘅利是封，婚紗街之旅就完滿結束。嗰時啱啱好係 13:30，呢個時候，當然要 check out 及慰勞吓男朋友，陪佢過埋去魚市場買水族用品，而且我都要買個玻璃缸佈置酒樓 reception table。所以今次真係要 check out，但係突然醒起酒店有寄存服務（免費，最長可以寄存 15 日），所以 check out 時就寄存我哋 4 袋戰利品，只係帶一個背囊就去睇魚啦！

我奉勸大家，如果你身邊嗰個都有養魚習慣，千祈唔好比佢知道有呢個水族市場嘅存在，因為真係可以行好耐...... 好耐...... 架！周圍都係呢 d 大檔細檔......

除咗水族用品，另外一邊仲有貓、狗、雀仔，雞仔、鴨仔、烏龜、植物、造景......太多太多...

其中一檔仲有得賣孔雀...... 期間有人問價，我聽到老闆開價 RMB300 一隻～ 真係冇天理～

最後，睇到黃朝白晏，再食埋個晚飯先返酒店拎返 d 行李，真真正正為我哋嘅旅程劃上句號。

返到屋企，已經係零晨 1:xx，但係男朋友仲要第一時間處理咗佢 d 寶貝魚仔先可以訓.... 結果我哋係 03:15 先上床訓覺，不過我覺得咁癲倒先似放假架嘛...

男朋友個魚缸...... 超大呢，有成幅牆咁大，足足有 4 呎...... 添加咗好多新成員！