2009 年 4 月 5 日（星期日）
元朗雅麗揀衫
趁住呢一日係清明節翌日，早於兩星期前已經約定兩位媽咪去元朗雅麗揀衫，貪佢呢日 d 衫會最齊款。
未來老爺都有陪未來奶奶入嚟揀衫，佢哋晏晝先過嚟同我哋飲下午茶，之後再上嚟新居睇晒 3 輯婚紗相。由於我同男朋友一向都唔多打理間屋，但係未來老爺奶奶殺到，當然要執吓屋啦！執完屋，飲完茶，再上嚟睇埋婚紗相後，就過元朗 join 埋我 daddy mummy 一齊去雅麗揀衫，而兩位老豆級男士就出任評判一職。
5:00 去到雅麗，未來奶奶以 9 秒 9 時間揀好心水款式。由於佢覺得自己屬於「有肉地型」，經 sales 講兩講就揀咗 3 款衫出嚟去試身。至於我媽咪...... 奶奶試完衫出嚟佢都仲未搵到自己心水款，真係失禮死人，女人（包括我自己）係咪真係見到多靚衫時就會六神無主呢？究竟著吊帶晚裝款好吖？定係旗袍款好呢？側邊條叉開幾高好呢？結果 sales 幫完未來奶奶之後就出馬幫媽咪揀衫，再根據媽咪嘅身型三爬兩撥就揀咗兩件旗袍款出嚟比佢試。sales 真係 sales，兩件媽咪都好鐘意，不過其中一件係我、老豆及男朋友都覺得較好睇，結果就 hold 咗。前後只係搞咗一個鐘，mark 埋單就閃得。最後未來奶奶 hold 咗件深紫色絨面假兩件款，而媽咪就 hold 咗件珍珠白釘珠片旗袍。Sales 仲話下一次轉款可以等農曆 7 月，而 final confirm 就喺重陽節前後。到時婚前一星期再 final fitting，咁就可以告一段落。我媽咪咁近就冇所謂，至於未來奶奶，我估佢都未必會再入嚟，佢一向都係要求唔高嘅人，睇得多只會花多眼亂，應該都會等 final confirm 時先再入嚟啦！
當日唔比影相，所以冇偷影，返到屋企只係上網搵咗 d 類似嘅相
（左）：係媽咪暫時 hold 咗嘅款
（右）：係奶奶暫時 hold 咗嘅款，不過係絨面紫紅色
**********************************************************************************************
四大長老第二次高峰座談會
四大長老其實喺訂酒席時已經見過一次面，今次係第二次。唔知點解每次佢哋見面我都覺得好似人哋 d 國家首長開高峰會咁......
最估唔到係...... 今次竟然去咗食大排檔。早幾日為咗去邊度食飯煩惱咗好耐，蒲咗 openrice.com 成日都冇 idea，忽然醒起未來老爺其實好鐘意去大排檔食嘢，加上我成家未搬入天水圍之前又係成日食大排檔食大，好似好啱 channal 喎，問過四大長老，原來佢哋個個都唔介意，仲好啦，大家可以無拘無束！
去到大排檔，豉椒炒蜆、京都骨、椒鹽豆腐一定唔少得，老豆知道未來老爺鐘意飲啤酒，所以兩個男人叫咗四支啤酒，我斟比你，你斟比我，又飲勝，場面勁搞笑！講到搞笑，都莫過於以下呢段說話：
老豆：「歐陽生，我硬係覺得咁樣稱呼你有 d 生外。宜家都仲可以，不過第時佢兩個結咗婚，冇理由仲叫你做歐陽生歐陽太嘛...... 」
未來奶奶：「唔好叫襯家喎，好老套呀～」
媽咪附和：「係呀係呀，好老套呀！」
未來老爺：「嗱...... 你當我飲大咗啦，咁我叫你一聲『阿趙』，你又叫我一聲『歐陽』，咁咪幾親切！」
之後我同男朋友細細聲講，如果老豆真係嗌「歐陽」，我估你成家都會應佢，因為佢成家嘅花名都係「歐陽」，哈哈！
唔知點解，坐喺側邊聽到佢四個咁樣講嘢，個感覺好得意。四個人你一句我一句，雖然話題都係圍繞我哋嘅婚事，不過已經覺得好 warm。媽咪知道老爺一向都鐘意入廚，仲問人點樣整咸蛋炒翠玉瓜...... 哈哈～
