突如其來的小禮物

呢排要摶命晒，「燦」死你哋至得，哈～

2008 年 10 月 25 日（星期六）

星期六我例牌放半日，放工走咗去旺角配 con，之後就返男朋友屋企做煮飯婆。

男朋友大約 7:30 返到嚟，我餐飯都煮得 7788 就快食得。咁開飯啦，食呀食，食呀食，我有一個壞習慣，就係正餐食好少嘢，甚至一粒飯都唔食只食餸，但係之後又要搵零食食喎，男朋友都見慣不怪。所以今次食完飯之後我又提議去摷朱古力食（無懼三聚氰氨），平時男朋友通常都會話我兩句先比我去摷嘢嚟食，不過今晚竟然主動叫我去開雪櫃喎，仲叫我去摷冰箱睇吓有冇雪糕食添。我都不以為已，以為佢自己都想食雪糕之嘛，點知，我一打開冰箱，發現有一盒嘢嘅？我以為係我最鐘情嘅朱古力.... 點知打開...... 係一對耳環！！！！！

傻佬呀！做咩雪對耳環入冰箱呀？？？不過...... 好大粒石喎，對耳環仲係心型添！

當時我口裡面就話：「唔好 side 錢買嘢比我啦，我影婚紗相都用咗好多錢，有排都儲唔返呀，唔洗啦唔洗啦！連聖誕節禮物都唔好買比我啦，法國嗰輯婚紗相就當係禮物啦！」但係其實心裡面好開心嘅，仲諗定下星期一返工時即刻帶呢對耳環添 ～

再夜 d，要沖涼準備訓覺啦，咁我去開衣櫃攞衫啦，一打開衣櫃門，又有一盒似曾相識嘅禮物盒放咗喺入面，我即刻大嗌：「咦...... 又有一盒嘅？」原來係同對耳環一 set 嘅頸鍊.......呢個傻佬真係吖！

老公，多謝你呀！下次唔洗再買呢 d 嘢比我架啦，我記得由我第一日同你拍拖開始就同你講，唔洗買咁多呢 d 鑽石比我，因為我成日都認為只要有一隻求婚戒指及一隻結婚戒指已經夠晒！手我就只得兩隻，雖然我有 10 隻手指，但係我唔會帶晒上手架嘛 ～ 頸鍊更加啦，我只有一條頸，你之前送比我嗰條我都帶咗 8 年，我唔捨得除，唔捨得換，我寧願你留返 d 錢遲 d 同我去 honeymoon 玩餐飽！

仲有一段小插曲，話說男朋友星期六特登早少少走，佢嘅女同事問佢去邊，男朋友話想去行吓街，想買 d 小禮物送比我，因為好似好耐都冇送小禮物喎，之後佢個同事話可唔可以叫男朋友講多次嗰句說話，因為佢想錄起呢段說話比佢自己老公聽喎，哈！

喂，講時講，老老實實啦，無啦啦我有得收禮物，出手仲好似幾重添，你係咪做咗 d 對唔住我嘅事呀？吓？？？