一張等了 17 年的合照

2008 年 11 月 16 日（星期日）

地點：觀塘 APM 商場大堂

時間：晚上 7:30

活動：apm 商場聖誕亮燈儀式 + 2007/08 舞林正傳演唱會 DVD 簽唱會

今日嘅心情好激動，因為我終於都圓咗一個等咗 17 年嘅夢 --- 就係同 Aaron 合照啦！大家覺得誇張嗎？其實當我自己同人講時，我都覺得有少少誇，不過真係一個事實，我真係足足等咗 17 年架！

其實我做咗「城迷」都有 17 年，做咗咁耐 fan 屎，其實最想都係可以同偶像合照啫！雖然我都出席咗幾次活動，都叫做有機會近距離接觸佢，但係偏偏合照嘅機會就冇！其實...... 又唔係話完全冇嘅，同類型嘅簽唱會我都去過幾次，不過次次叫身邊嘅 fan 屎幫我影合照時，一係阿郭大爺身邊嘅實 Q 唔合作趕收工趕你走，一係前前後後一齊排隊嘅 fans 話見到郭大爺興奮得滯唔記得幫我「禁」制 <--- 真係想打佢！所以今次呢張合照真係圓咗我 17 年嘅夢！

[越睇越鐘意呢張相，好想晒大佢貼喺屋企呀！緣美傳說...... 你哋好似仲爭我一張油畫，不如...... 你...... 你哋幫我晒呢張吖，嘻嘻！]

我記得就快輪到我時我不斷同自己講：記得要握手！！！之前有一次簽名會我緊張到唔記得同佢握手，淨係掛住望佢嗰對大眼，激氣！好在今次可以握手成功！之後我同佢講咗一句我想講好耐嘅說話：「Aaron，我鐘意咗你 17 年啦！」之後郭大爺用佢嗰對就快跌出嚟嘅眼望住我講：「係？」即時電得我陀陀擰！

今次我得到呢一張合照之餘，我要多謝 ViVi 咁早去幫我哋排隊霸靚位！個活動雖然夜晚 7:30 先開始（之前張宣傳海報仲話 7:00），但係 ViVi 喺中午約 1:20 已經到咗 apm 啦，雖然唔係排第一，但係一定係頭 10 名囉，可想而知排頭位嗰個幾點鐘就到！不過我當日有 d 事，要 4:30 先到！活動喺夜晚 7:30 開始，到我得到個簽名及合照後已經係夜晚 10:00，雖然足足等咗 5.5 小時，不過我完全覺得係值，真係值！ViVi...... 雖然我知你唔會睇我個 blog，不過我都真係好想多謝你呀，thankssssssssssssssssssssssssssss！

郭大爺出場啦！酷愛跑車嘅佢...... 大會竟然安排咗架林寶堅尼比佢揸入場，仲想點呀，全場至型係你啦！

主持亮燈儀式 ~~~~~ 其實你幾時先可以剃返 d 鬚鬚呢？我唔想見到你咁 man 喎！

同場加映......

有個傻婆好興奮咁揸住個牌喺度吶喊支持......（隔離條友仔.....-_-" 你想點呀？搶我鏡？）

仲有件事我好想講...... 我要多謝我男朋友！因為喺我等待活動開始呢 5.5 小時入面，我男朋友係一句怨言都冇咁由朝陪到我晚。當初我話要去 apm 見 Aaron 時佢好贊成不特止，仲挺身而出話陪我一齊去！當然啦，喺我排隊見偶像時佢就一支公咁喺個商場遊遊蕩蕩蕩足 5.5 小時，我仲要 10:00 簽完名先走得，當時大家飯都未食，我知佢實餓到肚都扁架啦，但係佢真係冇出過一句聲話我，你話呢 d 男人去邊樹搵？呵呵！所以........ Aaron 都係擺喺第二位啦，第一位係我男朋友呀！

仲有呀...... 除咗呢件事之外，男朋友仲幫咗我一個好大忙呀！

話說我手頭上有兩個簽名籌，本來打算留比另一位 fans，好可惜佢有事嚟唔到，又冇後備人選喎，我見男朋友等得咁悶，咪膽粗粗問吓佢肯唔肯幫我排一轉囉（即係話我自己簽一轉 2008 年 DVD，佢就幫我排一轉簽 2007 DVD）。其實我估佢多數都唔肯架啦，因為我同 d 朋友排緊頭 10 名，佢點都插唔到入嚟同我一齊排，即係要自己一條友排，點知佢咁都肯喎，真係估都估唔到！

男朋友好叻仔呀，為咗氹我開心，竟然喺 Aaron 簽完一個名之後開聲要求 Aaron 簽多個，嗰日心情大好嘅郭大爺唔知點解又肯喎，所以呢一日我真係大豐收，自己簽咗一個名 + 合照一張，男朋友就幫我 fight 咗 2 個簽名返嚟，呵呵，錫晒你！

（左）：2007 演唱會 DVD　　　（右）：2008 演唱會 DVD

（Close up）：好清楚寫住 "To Jenny" 架！

男朋友幫我 request 返嚟嘅 extra 簽名一個！