24-12-2008 Keiko & Dicky Wedding @ 緣美傳說

2008 年 12 月 24 日（星期三）

呢日係平安夜，我都要繼續返工，公司例牌有 Christmas Lunch Party，然後有得放早。

除此之外，呢一日亦都係 blogger 幸福小恩子嘅大囍日子，佢一早邀請咗我出席，不過因為夜晚會同男朋友迎接最後一個單身聖誕節，晚宴就一早推咗啦，只可以出席中午嘅註冊儀式，加上我同佢喺緣美傳說嘅 gathering 做咗朋友仔，當然一定要出席支持吓佢，順便留意吓緣美傳說有冇需要改善嘅地方啦！

佢嘅註冊儀式喺中午 12:45 開始，我喺公司要 12:15 先走得，因為我要搵機會偷走出去呀！哈！結果時間好趕好趕...... 我即刻跑去地鐵站，妝又唔得閒化，諗住都係影 1-2 張相，樣衰就樣衰啦！最後我出晒汗咁終於喺 12:40 左右去到緣美傳說，時間真係啱啱好！

喺樓下已經見到呢張易拉架，其實真係有需要掛出嚟，因為冇去過緣美傳說嘅朋友仔真係會比較難搵到個地方，放張大海報出嚟比大家認吓都好吖！好在我都有幅 50" 海報，到時都要放出嚟呀！

上到去已經見到 Keiko 同佢 d 親戚朋友影緊相，同佢打咗個眼色 say Hi 先，Keiko 好似又瘦咗，不過佢成個妝好靚！我見未輪到我，就同 Zita / Sam / Doris 打吓牙佼先，其實佢哋都好忙要準備，我好似阻住人添！傾傾吓計，突然聽到大會攝影師叫 Keiko 去整頭紗進備進場.... 喂喂喂，我都未影相，即刻捉住 Keiko & 阿肥影返張先啦！ 

素顏 Jenny + 索爆 Keiko（我真係要行埋一邊）

影多 2 張相，Keiko 真係要去整理吓個頭紗啦，Zita 都宣佈叫大家可以入場坐低，因為註冊儀式要開始啦！我望一望個鐘，12:47 左右咋！！！！原來緣美傳說係好準時開始架，所以喺緣美傳說行禮嘅朋友仔，記得記得記得，叫你 d 賓客準時到呀，遲咗就唔好啦！

我都趁呢個機會影吓個禮堂先，大約 11 個月之後我都會成為呢個禮堂嘅主角！呢個禮堂真係好靚，氣氛又夠莊嚴！

然後各位兄弟姊妹就埋位準備向一對新人拋花辦！

d 賓客坐定定之後，禮堂度門就閂埋先，一陣一開門，Keiko & 阿肥就會 march in 架啦！

司儀 Zita 就提醒各位賓客要熄手機 / 震機，因為要尊重返雙方兩家架嘛！不過好搞笑，整個儀式差唔多到尾聲時，依然有手機響起...... 鈴聲係囍帖街，機主係兄弟團中某一人！連大會攝影師都笑笑口咁睇唔過眼，走去影呢位兄弟相，哈！

熄燈啦熄燈啦，大會攝影師都 get ready 啦！新人要進場啦！

婚禮進行曲響起，我就見到 Keiko & 阿肥一步一步咁行入個禮堂，好幸福呀！

入到場，律師講少少開場白～ 跟住其實已經會問一對新人願唔願意，大家答完「我願意」之後先開始宣讀誓辭。我鐘意呢 d 安排呀，可以有機會講「我願意」！

交換戒指啦！

一對新人同佢哋對戒指影吓相先～

之後當然要錫錫啦，冇得走雞～

大筆一揮，從今之後多咗個老襯，又多咗位靚太啦！

禮成！！！雙方家長影張相先啦！

最後當然輪到我啦！

總結：

整個過程都好 smooth！Keiko 好叻女，全程冇喊到，不過我見到佢宣誓時有少少眼濕濕啦，但係都好叻女架啦！安排合照時都好順暢，佢哋編排得幾好，逐家逐家咁排隊影相，先係男家親戚 --> 女家親戚 --> 男家朋友 --> 女家朋友咁，好好！

而且個律師都好好人，適當時候會講少少笑話等 Keiko & 阿肥冇咁緊張！阿肥都好識做吖，佢都有講笑，睇佢都幾輕鬆吖，唔知佢內心緊唔緊張呢？

儀式進行時其實我坐喺班兄弟團前面，當一對新人交換完戒指之後，個律師好醒目咁叫佢哋舉高戒指向住鏡頭影相，後面某個兄弟就同另一位兄弟講：「呀，呢個律師幾好喎，講嘢都幾專業，又唔會甩甩 cut cut，仲比機會佢哋影相，一 d 都唔急住收工，我曾經見過有 d 律師搞掂之後真係走人，都唔會講咁多嘢！」聽到 d 賓客咁講，其實真係好開心。所以喺緣美傳說行禮真係十萬個放心呀！

我認為緣美傳說只有一個地方需要改善：就係新人 march in 時首婚禮進行曲可以大聲返少少，咁就最好啦！值得一讚嘅係佢哋有埋 background music，完全唔洗自己操心，good！

Keiko & Dicky：

祝你哋新婚快樂呀！以後都恩恩愛愛啦！