「R」婚假革命 @ 大成功

2009 年 9 月 30 日（星期三）

聽日開始就係我久違了嘅紅假，唔知係咪因為 holiday mood 特別濃厚，喺公司老早就已經唔想做嘢。見今日公司上上下下心情都唔錯，所以就打算今日進行我嘅《 「R」 婚假大革命》！

其實點解我要「R 」呢？我要講少少 background story 比大家知......

公司無明文規定職員有冇婚假，我亦都睇過自己份 employment contract 係隻字都冇提過「婚假」呢回事，不過我哋公司用開嗰張放假申請表又偏偏有「婚假」一欄比大家剔，咁即係點呢？我做咗呢份工五年，中途只得兩位高層人員結婚，之但係人哋身為高層，我又點可以用自己嘅福利去同佢比較呢？

今日 lunch time 後，咁啱搵開我上司簽文件，我就乘機問埋佢究竟我有冇婚假。

Jenny：嗱，你知我 11 月會結婚啦，我想問下我哋公司有冇婚假架？

上司：噢，呢層真係唔知喎，我要 check 下先知。不過就算冇都好，我都會同老闆講下，照批比你，等你盡量有多 d 假期搞結婚嘢。

Jenny：哦，好吖，如果係的話，我想申請 5 日呀！（其實我想放 7 日囉！）

上司：無問題，幾多日都好，結婚咁大件事，一定要放假，冇問題嘅！

心諗，我上司咁順攤，早知一開口就話要放 7 日啦，結完婚喺屋企抖下都好吖嘛！不過我宜家決定會照申請 7 日，佢唔批的話先放 5 日囉，況且我跟咗佢咁耐都一早睇穿佢，7 日佢都應該會照批架啦！

****************************************************************************************

見自己個膽 warm up 咗，就諗住向老闆交代聲我結婚，因為搞結婚咁耐，我都未正式通知佢一聲，所以決定繼續趁 lunch time 時間入老闆房同佢嗲兩句......

Jenny：（一入房就好唔客氣咁坐低）老闆呀，我有嘢想同你交代聲呀，其實呢... 我 11 月中就會結婚啦！

老闆：（驚奇地）嘩，恭喜晒喎！你想我送 d 咩比你，你講吖！

Jenny：吓？隨心得架啦，你哋自己決定啦！

老闆：唔怕喎，你就當我嫁半個女出去，你爭 d 咩，唔怕出聲喎！

Jenny：真係隨心得架啦！

老闆突然放開手上嘅滑鼠（因為佢玩緊接龍），一臉認真咁講：你講，你爭 d 咩？

Jenny：（見老闆咁誠意拳拳）........ 咁呀，我返屋企諗下先啦，因為宜家都尾聲咁滯，好多嘢都我搞得 7788 架啦！（講真，我梗係想要一個跑馬地嘅單位啦，但其實我想買部 notebook for honeymoon 用就真嘅！）

老闆：好咁你諗下先，諗到隨時話我聽！呀，不如咁吖，我叫老闆娘去買對粗 d 嘅龍鳳鈪比你吖，好冇？

Jenny （心諗：嘩，龍鳳鈪好喎，我溶咗對鈪買部 notebook 之後仲有錢賺，見老闆自投羅網，我已經揞住半邊咀笑緊～～～）但口就講：老細，呢排金價好貴呀！

老闆：唔緊要啦，幾萬蚊冇所謂，都話當嫁女咯！

對話內容大概就咁結束，有時覺得入到呢間公司做，其實真係我嘅福氣！公司個 HR 又廢廢地，永遠都唔 cut off d 大假，我已經累積到有 30 日大假 lu！就算遲 d honeymoon 要請 9 日假，我都仲有 21 日大假淨，實在太令人振奮啦，不過唔可以排除萬一個 HR 發現自己計錯數後會打回原形囉！

***************************************************************************************

2009 年 10 月 2 日（星期五）

今日冇啦啦收到上司電話，原來佢好認真咁同我老闆傾過我婚假嘅問題，佢打嚟正式通知我公司會批 10 日有薪婚假比我（但要計埋星期六、日），比起我心目中嘅假期仲多咗一日！上司仲話，如果覺得唔夠可以再出聲...... 嘩，天呀！正正正！

所以我嘅婚假會係：

17-11-2009 ~ 26-11-2009