媽咪衫轉款 @ 元朗雅麗

2009 年 9 月 13 日（星期日）

9 月...... 即係農曆七月，媽咪話要去揀吓衫睇下有冇新衫可以轉款，女人始終都係多心！既然係去試衫，就當然叫埋奶奶去睇新衫啦，所以就促成咗今次嘅約會。

先係媽咪試，由於 serve 媽咪個 sales 跟得鬼死咁足，簡直好似貼身保鑣一樣，就快連痾尿就跟埋去架啦，搞到我帶咗部相機都偷影唔到！媽咪今次好滿意 d 衫，仲 hold 咗兩件，佢唔算肥，但頸頗長，所以都係著旗袍款先啱佢要求。

之後到奶奶試，跟開嗰個 sales 咁啱有第二個客人搵佢，所以 pass 咗比另一位 sales serve 我哋，呢個好好多，冇跟得咁足，好多時同我哋講兩句嘢就行開，我都多咗 d 機會偷影！

由於奶奶身型係屬於「有福氣型」，加上膚色偏白，所以佢選擇唔多，都係向「假兩件」落手。

先係試返上次 hold 咗嗰件～

奶奶好似好鐘意咁，不過一場嚟到就叫佢揀吓其他款。唔知佢係咪特別鐘情於紫色，佢自己揀咗三件出嚟試都係紫色。男朋友就叫佢試吓其他色，不過效果麻麻地，最終都係紫色先襯佢。

最後奶奶就 hold 咗呢件絲絨質地連身裙，佢自己都好鐘意，話因為夠暖又夠 grand 喎！

元朗雅麗仲有一次轉款機會，應該會下個月約埋伴郎伴娘睇埋，順便要 final confirm 所有衫，咁就搞掂晒衫嗰 part 啦！