all outfits confirmed @ 元朗雅麗

2009 年 10 月 27 日（星期二）

我係特登揀平日去 final confirm 衫，因為 sales 話平日試都試得自在 d，款式亦會齊 d，既然係 final confirm，所以就要勞煩大家收工後入嚟元朗一轉啦！

今次嘅主角分別有兩位媽咪、伴郎及伴娘。

元朗雅麗嘅 fitting area 真係比較細，企多幾個人都要「唔該」前「唔該」後，不過可能因為地方細細先有資金入靚衫及以一個較平嘅售價租衫出街。我都已經醒水，分批約大家入嚟揀衫，先約伴娘及媽咪 6:30 試，奶奶 7:00，伴郎收工先入嚟就約佢 7:30，最後大家都要揀到接近 9:00 先離開。

由於今次係 final confirm，所以揀定咗款就可以光明正大咁影相啦！

伴娘裙：

本來伴娘 hold 咗一條湖水綠色長裙，但係其實佢自己、我及歐陽生都覺得可以再著得靚 d，所以叫伴娘過嚟轉款。試咗大約 6-7 條裙之後，都係呢件最靚！前短後長有 d 款，白色又好啱伴娘嘅身份，加上呢條著得 young d！

奶奶衫：

因為奶奶膚色其實只接受深色衫，其他款佢又唔多鐘意，試多 4 - 5 件之後都係決定唔轉款。

媽咪衫：

媽咪就巴閉啦，hold 咗兩件旗袍，佢貪新鮮想試下著晚裝款，點知試咗 3 件都係麻麻地，我老爹由始至終都強烈建議佢著返旗袍款，加上伴娘嘅認同後，媽咪最後都決定要返旗袍。宜家 confirm 咗之前 hold 嘅其中一件。

伴郎西裝（呢件冇影相）：

由於伴郎先生屋企冇西裝，所以歐陽生就話租一套比佢。宜家伴郎 confirm 咗一套黑色西裝，企領圍邊有少少黑色嘅花領，衫身係銀色鈕，某程度上我覺得佢呢件衫會搶咗歐陽生鏡，因為歐陽生嗰件新郎黑西裝都只係普通嘅關刀圓領，少少類似絲嘅質地（希望大家明白我嘅形容詞 -_-"），宜家咁樣...... 唯有等大家以呔及背心去識認，希望唔好以為我嫁錯郎！

可惡嘅歐陽生喺伴郎先生揀緊西裝時 0 表態！！！

至於 final fitting 會喺 11 月 1x 日前後，希望改衫呢 part 一 take OK！