2009 年 10 月 17 日（星期六）
過大禮前夕
過大禮前一日得我同歐陽生兩個去換唐餅 + 借禮盒，唔好睇少呢個禮盒，我已經早咗成個星期去 hold，但係結果都要問咗 8 間奇華分店先借到返嚟，好搶手亦好重，一個女仔唔好旨意會拎得到。
用咗 3 張餅咭換返嚟嘅囍餅，拎到大家死死下，因為當日仲要買埋部份嫁妝，總之仲攰過做苦工啦！返到屋企抖咗陣就執下過大禮要嘅物品。呢盆唐餅我都花咗少少時間去擺得靚靚架～
玩完唐餅就玩紅酒，由於屋企冇酒袋可以一次過放晒 4 支酒，所以用咗個膠袋代替，仲貼咗兩個囍字貼紙喺面。
四大長老都好鐘意飲呢隻紅酒。話說有一次老闆娘送咗一支呢隻紅酒比我，我拎返去同四大長老 share 嚟飲，佢哋個個都話正，所以過大禮都向老闆娘買咗 4 枝。乜年份乜酒莊乜葡萄我都唔知，淨係知係法國 Lafite 酒莊嘅酒，老闆娘真係冇介紹錯，向佢買都係 $110/支咋～ 抵飲，據悉老闆娘屋企有 1x 箱！
2009 年 10 月 18 日（星期日）
過大禮
今日係歐陽趙過大禮嘅日子，吉時係 3:30 - 5:30，男女兩家嘅親戚一早已經準備就緒。
3:45 左右，歐陽家一行 5 人殺到，我奉命入房迴避一陣，只係聽到出面嘈喧巴閉，聽得最多嘅說話係「坐吖，唔好客氣」。
可憐嘅歐陽生亦因為要迴避，所以佢就喺我屋企門口等，只係少少時間都不甘寂寞要打機.... -_-"
我屋企唔算全部跟足傳統，所以唔算太多物品。
呢個時候當然要嚟幾張合照，不過男家親友唔係咁願意上鏡，所以只有我喺度影呀影。
(下左) My lovely family
(下右) 白頭髮嗰個係婆婆，另一位老人家係嫲嫲
話說男家拎完 d 禮入女家後，婆婆一馬當先要 in charge 整個大局，嫲嫲都冇睬佢咁多，自顧自同男家親友 social
雖然我已經解釋咗 N 咁多次比媽咪聽 d 嘢要點回比男家，不過因為利是眾多，最終都係要靠自己提點下媽咪，呢一刻嘅我其實係好忙碌。
接收晒每樣禮品之後，要擇返封利是比男家，呢個儀式就由男女兩家至高無上嘅阿姨及我老豆負責。
最後就係頒發各式各樣利是：
禮金大利是 + 包羅萬有大利是，你睇我媽咪笑到佢吖......
女婿金，即係嗰 d 咩咩女婿褲、女婿鞋、皮帶、銀包等等。（大家可以留意到我嫲嫲仲係 social 中...）
奇華個網站仲話要有 4 封利是，寫住「五代同堂、百子千孫」交比準女婿，雖然唔知有冇根據，不過是但啦，利利是是嘛。
最後就係舅仔鞋，都係以利是代替。頒發舅仔鞋利是時，歐陽生兩個細佬即刻起哄：「點解冇細佬鞋利是？」
呢個叫做禮金盒，顧名思義就係放禮金，而且裡面仲要有蓮子、百合、紅豆、綠豆、芝蔴、紅棗、合桃乾、龍眼乾、扁柏、檳榔、紅繩等等。個盒宜家已經變得好 "痴 lup lup"，不過婆婆話唔可以扔，起碼要擺一個月...
最後大約 4:30 左右就結束，因為男家要盡快拎返 d 禮返男家，趕住要喺天黑前拜神。
沒有留言:
張貼留言