婆婆嫲嫲大激鬥

下星期日就係我過大禮嘅大日子啦，所以呢兩個星期都開始做 d 準備功夫。因為男女兩家都係首次辦喜事，對呢 d 禮儀一竅不通，奶奶嗰邊乜都冇所謂，比晒媽咪話事，所以媽咪就向我嘅婆婆、嫲嫲求救。一搵佢哋求救就出事啦...... 雙方各有自己嘅睇法，真係難為咗媽咪同埋我......

婆婆話：

1) 過大禮當日，女家收完禮要回禮之餘，仲要每樣嘢都擇返封利是比男家，但由於禮品眾多，所以每封 HK$1 就夠啦！但係要雙封，成雙成對喎！<-- 我同媽咪即時反應：HK$1？封帛金咩？即時耍手擰頭，寧願封兩封 HK$10 好過，廢事咁核突！

《話題一轉，突然講咗去上頭儀式......》

2) 媽咪唔可以同我上頭，因為婆婆問咗 10 個人，10 個人都話唔可以由父母上頭。<-- 我同媽咪聽到都 R 晒頭，我見好多人都係父母上架喎......

3) 上完頭要食湯丸，但婆婆強調要食無餡嘅湯丸，因為我宜家唔係買大送細，意頭唔好喎！<-- 聽完成家都笑到收唔到聲，而我第一個反應：無餡湯丸好難食架喎！

《話題再轉，講咗去結婚當日......》

4) 新娘入門時要派利是比人，但只係派比呢兩類人，(1) 老爺奶奶，(2) 企喺門口湊熱鬧嗰 d 三姑六婆，隔離鄰舍。<-- 我同媽咪立刻露出奇異嘅眼光，第一，我未聽過新娘入門要派利是，第二，派比老爺奶奶？我係後輩佢哋係長輩喎...... 啱規矩咩？第三，連企喺門口 d 二打六都要派，我多多錢都唔夠派喎？

婆婆講完之後，我同媽咪都有唔係太信佢講嘅嘢，所以打電話比嫲嫲問，果然...... 得到另一套詮釋！

嫲嫲話：

1) 女家回禮的確係要擇返封利是比男家，但係一封 HK$20 就得啦，邊有人封 HK$1 咁核突架！<-- 呢個媽咪啱聽，因為佢一早就諗住封 HK$20 一封！

2) 嫲嫲話佢有 8 個仔，8 個仔都係由佢上頭，邊個話父母唔可以同自己仔女上頭？總之父母雙存就可以，得返一個先唔得！<-- 呢個我啱聽，因為我好想好想由媽咪同我上頭，況且我之前上網做資料搜集睇過一段文章，都話如果搵唔到好命婆／好命佬的話，可以由父母上頭！

3) 嫲嫲聽到呢個湯丸理論之後，佢都笑到反肚，仲話婆婆思想古老...... 個世界都轉咗好多次啦，仲拎返 d 舊思想叫後生一輩跟住做等等嘅說話！嫲嫲仲話可以用另一個方法詮釋呢個湯丸理論：喻意食完湯丸之後快 d 有餡，宜家有好多人肯生仔都冇得生啦！<-- 呢樣我 buy 嫲嫲，終於有得食有餡湯丸啦，yeah！

4) 嫲嫲都話新娘入門的確係要派利是，但係只有老爺奶奶及門口 d 二打六唔洗派，其他人都要派！<-- 呢個我同媽咪都 buy，起碼收利是嗰班人真係我／老公 d 親戚嘛！

經過一整晚查證、討論後，最後決定跟我嫲嫲嗰套，除咗因為我哋 buy 之餘，亦因為六個字：「我　　跟　　老　　豆　　姓　　趙！」既然歐陽家唔洗我跟習俗做，咁當然跟返趙氏家族嗰套啦！

不過其實都有 d 驚驚地，因為無論我過大禮當日及上頭當日，兩位老人家都會在場，到時真係唔知聽邊個講好！