與司儀開會 @ 峇里園

2009 年 10 月 14 日（星期三）

踏入婚禮倒數階段，陸陸續續要同各方人士開會，時間好似越嚟越唔夠用。宜家就算放假，我都係喺屋企打點婚禮嘅嘢，有時會諗，點解我會冇晒 d 私人時間？我好似好耐都冇放過真正嘅假，究竟幾時先可以一邊嘆住朱古力一邊睇畢打自己人？

呻完..... 入正題！

今晚要同兩位婚宴司儀開會，約咗去旺角新世紀廣場峇里園食飯，呢間餐廳格調唔錯，氣氛 ok，傾計一流！而且裝修都幾得，喺 openrice copy 咗 d 相出嚟，有機會我想 encore！

唯一缺點係 d 侍應塊面黑咗 d，仲黑過近排嘅郭富城吖～

其實兩位司儀係歐陽生識咗 1x 年嘅朋友，兩位亦係兄弟之一。佢兩個真係唔話得，尤其是女司儀欣欣，搵佢幫手時佢仲緊張過我哋，喺上個月尾已經 remind 我要同佢哋開會傾細節。欣欣，真係好多謝你！

由於佢兩位擁有豐富嘅兄弟姊妹及座上客經驗，所以佢哋對 rundown 都幾瞭如指掌，完全知道晒應該幾時播片，幾時行出嚟敬酒，上翅前後要做 d 乜，影相、斟茶次序等等。我就完全一無所知，所以都係聽佢哋教我點做點做。

傾完 rundown 就要了解下當晚我哋要 d 咩感覺。我就梗係唔想太感人啦，因為盡可能我都唔想喊，所以記得啦，要生動 d，唔好要我喊呀～ 失禮死人！

之後就係要問埋有冇禁忌係四大長老唔知得、司儀唔講得！結果係：無，咩都可以講！

最後就係要知道埋我同歐陽生嘅相識及拍拖經過。司儀們仲 pro 到用電話錄音，drop 晒 notes。哈哈哈，好驚，記得唔好跌咗部電話，我唔想比人 upload 上 youtube 呀！

會議結束後，我得到嘅就係新增三樣工作：(1) revise rundown (2) 席前影相 list (3) 席前斟茶 list。

不過，有 d 嘢真係唔可以唔講，就係多謝兩位司儀欣欣及阿豪，d 意見真係好有用，有你哋做司儀我好放心，要你哋 side 時間做份司儀稿及夾 speech 真係非常之唔好意思。欣欣 & 阿豪：我期待你哋落台之後去折磨歐陽架，come on go go go！