2009 年 10 月 23 日（星期五）
今日好準時放工，目的就係要帶 5 位漂亮嘅小姐上 Plovee 試姊妹裙。
先同其中兩位姊妹試裙......一條太長，一條太短，起初以為係個別人士身高問題，點知等其他姊妹試晒時先發覺嗰兩條係做得特別長及做得特別短。長咗嗰條可以改短，短嗰條真係冇得改，本來以為要被迫接受，點知醒目嘅姊妹著上身後發覺車功出咗問題，老闆娘都好醒目，自動自覺話做過條比我。好在重新做一條只需要兩個星期，改裙要 4 日，自問都仲有少少時間，所以接受呢個安排，最後條裙要 remark 加長 4 吋，勁！！！
第一次度身後，10 月尾就有得攞，但等埋重做嗰條，即係要 11 月頭 d 裙先齊貨，重做嗰條仲要再 fit，應該都仲趕得切啩？
fitting 完後，其中一位姊妹因為有急事需要離開，咁剩低嗰 6 位 young ladies 就去食飯，順便傾傾 rundown 及大家都勁期待嘅接新娘遊戲！
傾 rundown 我唔多講，總之又係要改啦，都慣架啦。但係一傾到接新娘遊戲就大件事咯！我哋進入餐廳嗰刻係 7:45，離開竟然係 11:45，如果唔係大家嘅男朋友打電話嚟催返屋企，根本冇人知時間......
講到我嘅接新娘遊戲，冇體能，冇核突嘢食，冇智力可言，咁玩 d 咩呢？當然我係唔會講住啦！不過惟一可以透露嘅係，我 d 姊妹原來好殘忍架！傾完 6 個遊戲之後，姊妹們都有唔同嘅 comments：
「嘩，好殘忍呀！」
「嘩，咁都唔放過佢哋呀？」
「娶你呢個老婆真係慘！」
「乜都唔理，最緊要有『視覺效果』！」
「玩緊嗰陣唔好比嘢我做，因為我應該企埋一邊笑到肚痛！」
好在各位兄弟姊妹團都係玩得之人，雖然我冇份玩，但見佢哋傾得咁開心我都好期待！唔排除到時我會喺房嗌出聲..... ^^
離開餐廳時仲遇到 3 位 bloggers，分別係 Anna、小小丸子及 CarCar，比佢哋發現咗我哋係全餐廳最大聲，最失儀嘅一枱，佢哋亦都應該聽到我呢 d 機密遊戲，殊！唔好爆出嚟呀～
特別鳴謝環節：
接新娘遊戲會議舉行得咁順利，都係多謝各姊妹嘅通力協助及 brainstorming！
多謝好伴娘 Zoe 為我（唔知係咪？）買咗一本專門玩新郎嘅書，所有嘅遊戲差不多全部喺呢本書搵到，等大家當晚唔洗頭顎顎。
多謝好姊妹 Anita 義不容辭，攬晒上身咁幫我買所有遊戲道具，仲提供咗一個人人都好期待嘅遊戲環節，當日我將個遊戲時間就交比你 in charge 啦，只有你一個最忍得笑！
多謝好姊妹 Angel，Loki，Fion 提供咗好多有用嘅意見，Angel 記得要投入 d 咁玩埋一份，如果你淨係識得企喺側邊笑，罰你要幫兄弟受難架！
好姊妹 Cat 亦走唔甩，雖然你未能出席我哋呢個殘忍會議，但係下個月初拎裙時我哋會同你 brief 一次，相信你都笑到標眼水！呢 d 遊戲，你多謝 Anita & Zoe 啦！
沒有留言:
張貼留言