28 座花車佈置 @ 金都

2009 年 9 月 12 日（星期六）

呢日因為出咗去緣美傳說做擬結婚通知書，所以就順便去咗金都一轉買埋花車蝴蝶，打算佈置下架 28 座。平時真係好少喺星期六下午呢 d 咁旺丁嘅時間行金都，真係有少少水洩不通。

本來諗住買 6 個蝴蝶，每邊車身 3 個啱啱好，點知買 6 個嘅價錢（HK$38）仲貴過買 2 包 4 個（HK$10/包 X 2 = HK$20），可能因為用料及設計緣故啦！結果就是是但但咁買咗兩包 4 個紫色蝴蝶（又係紫色...... 不過今次唔關我事，男友話紫色襯我哋架 28 座喎）。

宜家呢款係用網底 + 紙做成蝴蝶，格價嗰時問咗 10 間舖頭，10 間都話呢 d 只啱用喺主花車，因為有網底呢 d 比較重，如果用喺 28 座就怕吹甩，不過我哋都一於少理，到時叫班兄弟痴得穩陣 d 就冇問題！

我會再痴 d 上次喺婚紗街買嘅囍字貼紙（下圖右下）上 28 座車身，咁就靚晒！