主婚人、兄弟姊妹團的襟花手花

距離結婚日淨返 2 個多月，都係時候揀定主婚人及兄弟姊妹團襟花手花啦。本來諗住貪方便全部上網買絲花，不過既然我細佬話包我呢項 item，我就唔同佢客氣，即刻將主婚人襟花轉做鮮花，仲搵埋我 book 咗花球嗰間童話佈置做，方便婚前一日一次過拎。

至於兄弟姊妹團方面，N 個月前打算自己 DIY，但係見到自己 d 水準之後真係不敢恭維，就打消念頭諗住上網買。不過更估唔到嘅係...... 我會決定 DIY 返囉，不過唔係出自我手，係我細佬個女朋友拍晒心口幫我 DIY。

我真係要多謝我呢個未來弟婦...... 聽我細佬講，原來因為我結婚，佢特登洗咗皮幾兩皮嘢報名讀 Wedding Planner 課程，仲成日好客氣咁問有咩需要佢幫手，呢樣真係好意外。雖然宜家佢仲讀緊，不過好似話今個月就讀完，而且睇佢嘅功課都 有板有眼，襟花手花呢 d 咁小兒科，一於就交比佢搞啦！

主婚人襟花

其實當初心儀右邊嘅蝴蝶蘭，不過望望下又覺得左邊嘅馬蹄蘭都好高貴，兩款花都好有主人家嘅感覺。但係另一邊箱擔心兩種都係白色花，驚四大長老會唔鐘意。好在，佢哋四個都係好開通嘅人，最後仲一致決定用馬蹄蘭，不過就會叫花店改用一朵就夠啦！

兄弟姊妹襟花手花

其實呢款有好多顏色比我揀，但係唔知點解一睇就睇中呢個顏色，或者可能潛意識想做晒紫 + 白呢個 theme color 啦！不過某程度上都唔想自己跟得太足呢個 theme color，我驚物極必反......

至於我呢位未來弟婦，既然佢咁大手筆去上 wedding planner，我當然唔會咁易放過佢啦！醒起麒麟閣張 reception table 咁樣衰，我就叫佢幫我佈置下！

當然會再同佢夾下我嘅 ideas 啦，希望到時好好睇睇啦！阿未來弟婦咁認真，睇嚟我細佬都走唔甩架啦，哈哈！