非一般的驚喜 @ 尖沙咀花滿樓

2009 年 9 月 6 日（星期日）

早兩日係我好朋友 CiCi（即寶妮）嘅正日生日，我呢個做老友嘅係佢生日當天已經送上生日禮物，希望 CiCi 你冇笑到碌地啦，喺呢度都講多句：生日快樂！

正日當然要留返比錫到佢燶嘅未來老公王生同佢慶祝啦，知道佢哋過咗大海...... CiCi，手信手信手信！不過，我同另一位好朋友小高就密謀同壽星女提早慶祝生日。

由於呢位壽星女平時成日都比驚喜人（簡直同小高一模一樣），所以我同小高都認為要同 CiCi 慶祝，唔可以隨隨便便約出嚟食飯，然後由 waiter 捧個蛋糕出嚟咁平凡...... 結果，我同小高 + 三位男士嚟個非一般嘅驚喜！

話說之前王生 email 過有關去日本 honeymoon 嘅資料比我，所以我就寫返個 email 比佢，叫佢交出佢嘅電話號碼，好等我同小高諗好個驚喜之後同佢配合配合。經過 2-3 日嘅電話來往，我哋就決定個驚喜係咁嘅......

王生用佢自己嘅方法約 CiCi 去尖沙咀嘅花滿樓食飯，而我、小高、歐陽生同主任就一早喺餐廳 standby，放定個蛋糕喺枱面，當王生帶 CiCi 到達餐廳後就發現竟然我哋幾個都喺度...... 至於個生日蛋糕...... 堂堂寶妮大人生日，當然要搵返個有代表性嘅蛋糕啦！記得某日同 CiCi msn 時佢比咗呢個蛋糕我睇，我就即刻諗到今年生日要買呢個蛋糕比佢食！

王生話唔好比佢知太多，因為佢都驚 CiCi 太醒目，佢越知得多穿煲嘅機會就越高！知道 CiCi 呢日要返工，起碼都要放 9:00，行到過餐廳到要 9:20 左右，所以小高都 book 咗餐廳 8:45。我當日仲 sms 小高我會 8:30 先到達尖沙咀，呢個計劃原本都進行得好順利...... 點知 8:00 左右收到小高來電，話 CiCi 提早放工，好在...... 嗰晚我都早咗出尖咀，8:00 就到咗，真係一額汗！

Meet 咗小高及主任後就立即上餐廳 standby，小高仲好叻女，喺 reception 度同帶位嘅職員訂多張枱，寫住：「王生，兩位，8:30」，但吩咐帶位員記得帶佢兩個嚟我哋張枱，唔好真係開一張二人枱比佢喎！

等呀等，等呀等，由 8:00 左右等到 8:30 都未見人...... 點解咁耐呢？結果有少少忍唔住，小高就打比王生，接通咗後小高就話：「王生，我宜家扮係傳銷人員打嚟，你乜都唔好講，一陣收線就答：『唔洗啦唔該』就得！」，向王生交代咗我哋 ready 嘅情況之後都只好喺餐廳繼續等......

等待中又心驚膽跳嘅三位人兄...

9:15 左右，餐廳職員提醒我哋有個「王生兩位」（← 呢個其實係暗號嚟架）上緊樓啦...... 我同小高都好緊張，手仲好不其然咁震，原來比驚喜人係咁驚架！

職員一路引領住 CiCi 及王生行近我哋張枱（一條直路），我同小高就越嚟越驚，驚佢老遠就望到我同小高嘅存在！好在 CiCi 當時周圍望，冇留意到！我同小高就利用枱上嘅轉盤轉出生日蛋糕，一路唱生日歌，CiCi 當然嚇一跳啦，個傻妹仲感動都喊添呀！

之後我哋都係食飯吹水，不過係好多嘢講...... 唔知點解我哋三個一聚埋一齊 d 口水就一發不可收拾！

晚飯期間，CiCi 好努力咁去諗破綻...... 原來王生都有好多破綻架，不過真係好好彩，CiCi 嗰刻又冇懷疑喎！

破綻一：之前嗰晚王生同 CiCi 講第二日收咗工後要食飯，因為王媽媽約咗人食飯，佢兩個都要出席。不過當晚 CiCi 收工後王生話約咗佢嘅同事食飯喎......

破綻二：話到明同王生嘅同事食飯，但係唔知點解當王生喺樓下同帶位員講：王生，兩位，8:30 時，CiCi 又冇懷疑......

破綻三：平時都係 CiCi 做主導話食咩就食咩，今次竟然係王生出聲，仲話 book 咗枱，不過唔知點解 CiCi 又冇懷疑 d 咩喎！

CiCi，其實王生都係冇心呃你架，佢都係受我同小高指使，希望你唔好罰佢跪玻璃頂榴槤啦，wakakakaaa！

其實喺飯局嘅後段仲有另一個驚喜架，就係壽包啦！因為王生嘅生日只係遲 CiCi 10 日，所以我同小高都想同王生一拼慶祝埋，但又覺得一日食兩個蛋糕有 d 過份，所以就以壽包代替啦。當職員捧上壽包時，我哋又唱生日歌，不過係中文版，希望王生唔好嫌棄只有壽包食啦！

壽星女開始失控，但係王生好似好想玩埋一份喎，wakakakak！

寶妮蛋糕再次出場，不過我哋就無緣食啦，因為喺花滿樓切蛋糕要收 HK$60 切餅費，而且個個都飽啦，個蛋糕就比 CiCi 拎返去同王生分享啦！

CiCi，希望你今年最後一年單身生日過得難忘啦！

我都預祝王生生日快樂，今年終於可以娶得美人歸啦，記住唔好蝦 CiCi，我同小高唔會放過你架！

最後送上大合照一張，相中個個都笑，係得歐陽生苦瓜乾咁嘅面口，你好快 d 練習點笑啦，次次影親相都係呢 d 表情嘅！