拆利是啦 @ 牛年年初十

2009 年 2 月 4 日（星期三）

大年初十啦，都係時候要拆利是，點算一下最後逗利是嘅一年嘅成績啦。

自從拍咗拖之後，我嘅利是成績都有明顯嘅進步，不過最得益當然係我男朋友啦！本身佢自己親戚唔多，聽返佢講，佢未同我一齊之前，每年嘅利是錢只得 $700-800 左右，但係同我拍拖之後，逗埋逗埋 d 利是係 $1,500-1,700 啦，一個 double 呀！今年佢仲好叻添，好似已經突破咗 $2,000 啦！

今年我逗到 $2,500 左右，比起上年多咗幾舊水，不過不失啦！遇上金融海嘯，有 d 長輩都縮水，但係喺公司所收嘅利是反而有加無減，唔通佢哋今年份花紅好大份？無論如何，都要多謝各位同事！

哈哈，人民幣利是都收到一封，因為開工當日有位國內嘅同事上咗嚟呀，咁又有得逗埋，好嘢！

大家會唔會奇怪邊個咁大手筆封 $1,000 比我？其實我想話比大家聽，呢封 $1,000 係唔需要理會！查實我同男朋友每年都會互派一封開工利是比大家，呢一封就係男朋友封比我嘅開工利是！大家唔好以為佢咁闊佬，哈哈...... 其實係佢新年前出咗花紅（現金），佢一時之間冇散紙，所以先原原本本咁封一張比我咋！不過，呢 $1,000 已經存入咗我哋嘅結婚基金入面啦！

下年...... 我估我都要派好多錢出街～ 最記得某一位長輩派利是比我時同我講：「嗱...... 我年年都封嗰個銀碼比你，下年你要派比我個女架啦...... 識做啦？」（補充：佢年年派兩封 $50 比我）Oh my god！