最後「女朋友」身份的情人節 @ 2009

2009 年 2 月 14 日（星期六）

今年嘅情人節，節目上安排其實係有些少遺憾，不過，歐陽生，我想同你講我都滿意架啦！講起上嚟真係一匹布咁長～ 奉勸真係有心機睇嘅朋友先好繼續睇落去... ^^

星期六，我照例放半日，男朋友本來可以偷懶放到半日，點知喺星期三晚有單工程有突發事故，佢估計星期六當日冇得放半日不特止，由嗰個星期三起佢連續開咗兩晚 OT，星期四由 10:00 做到 01:xx，星期五由 10:00 做到 03:xx，所以我其實都一早有心理準備星期六當日佢要返全日，甚至再 OT 都唔出奇，幸好，到最後佢放 18:00！亦因為放工時間突然有變，結果佢早一星期前安排好嘅慶祝節目一一告吹。而我，就由放 13:00 等到佢 18:00，有時都好佩服自己點解可以喺條街 hea 咁耐！

我哋 join 埋後，佢帶我去咗中環碼頭，其實當時我都仲未知會去邊。我男友就係咁架啦，永遠唔會話你知下一步做咩～ 好在我一早知你唔係金魚佬啫，哈！行吓行吓，原來佢帶我搭船入愉景灣食飯。

搭船途中，佢叫我揀去邊間餐廳食晚飯，我當時問佢：「乜你冇訂位架？」佢：「冇呀，原本我唔係諗住咁樣安排，所以臨時臨急冇訂到位！」我心諗：「咁就趴街啦，今日係情人節，唔訂位咪要食風？」佢：「唔緊要，我諗唔會好多人入去架，第一 round 食唔到咪食第二 round 囉！」咁...... 唯有係咁囉，都冇計架！但心裡面暗暗諗，你識入愉景灣，都有其他人識入去架嘛，唔好比我批中，第二 round 都可能會 full！

落船後大約係 7:15 左右，我哋周圍搵餐廳食飯！講真，到埗後人唔算多，但餐廳都唔係多，要搵位都有一定難度。後來好彩搵到一間餐廳有位，不過男友要求坐 outside，可惜 outside full 咗，結果男友話唔去呢間食，當時我都唔知點解，不過算啦，佢係老闆，唔喺度食咪唔食囉，咁繼續行啦！之後又搵到另一間大家都有興趣，都知佢第一 round 肯定 full 硬，諗住 book 第二 round 9:00 啦，點知個姐姐話 second round 都 full，當時個姐姐仲用一個好疑問嘅眼神望住我男友問：「你冇 book 位呀？」男友：「冇呀！」姐姐：「今日係情人節你都唔 book 位？我哋好 full 架，閒日入嚟都最好 book 定！」咁......唯有離開啦，等晏 d 再睇睇咩環境。但係我就覺得超搞笑，個姐姐係善意嘅，但暗地裡好似串男友做咩咁唔細心冇訂位食飯。

離開餐廳後，男友話不如落去沙灘行吓啦，因為見嗰度都人頭湧湧，好似有搞作。原來點咗 d 假蠟燭喺沙灘，所以都影咗幾張相！

隱約都見到 14.2 呢個字啩？

仲有好多個心心～

影完一輪相，其實我個肚都開始投訴...... 當時大約係 8:00 左右，我建議不如再去摷吓餐廳食飯，但男友堅持話唔好，話想喺沙灘留多陣...... 我當時心諗，佢係咪有咩搞作呀？咁好啦..... 等呀等，等呀等，等到 9:00 都冇嘢發生喎......

我問佢：「其實你係咪有嘢 prepare 咗架？」

佢：「唉，我都唔知點解咁耐都唔開始嘅！」

我：「咁即係咩啫？」

佢見勢色唔對就和盤托出：「唉，其實本來我今日放半日係想同你入嚟，先喺沙灘行一陣，再去一間 cafe 食你至愛嘅朱古力 cake + 飲吓咖啡，我聽 openrice d 人話間 cafe 可以睇到日落架！之後我諗你都會飽飽地，所以先冇訂位食飯！夜晚就再出嚟沙灘睇煙花，因為個沙灘望到迪士尼架嘛！仲有呀，你本來今日會有一紮 agnes b. 玫瑰花收架，仲會送去你 office！因為我之前睇中咗隻錶，買錶的話會有一紮 agnes b. 玫瑰，如果所有嘢都可以按計劃進行，我諗今個情人節係你最冧嘅情人節啦！」

我聽晒成個 preparation 先知係咩一回事，其實個心當堂冧晒，肚餓都唔記得 lu！結果我提議不如等到 9:30 啦，如果 9:30 迪士尼都仲唔放煙花，就去醫肚啦！最後...... 當然等到 9:30 都冇煙花睇啦！之後我哋兩條友就走去買 d 嘢食坐返去沙灘食，hea 吓 hea 吓，咁就 11:00，都係時候要走啦，否則驚冇車返入元朗呀！

***********************************************************************

返到屋企，我一入門口，就見到成間屋都貼咗 d 黃色 post-it 貼紙，上面寫咗字噃...

細看之下先發覺原來每張 post-it 貼都寫咗拍拖 9 年以嚟男友 send 過比我嘅一 d 精選 sweet sweet 手機 sms，總共有 12 張，最後一張除咗有 sms 外，仲叫我打開個櫃桶，原來裡面收埋咗一份情人節禮物 --- Apple 16G ipod Touch <--- 冇影相，當然仲有唔少得...... 我至愛嘅朱古力兩大盒啦！

多謝老公！！！可憐嘅佢，我乜都冇送比佢呀...... 只係送咗一個壞消息比佢......

因為我後來先知道...... 原來 214 當晚...... 迪士尼喺 7:00 放煙花...... 當時我哋仲喺船上面，miss 咗 lu！！！佢好唔甘心呀...... 哈哈！