2009 年 2 月 24 日（星期二）
見到呢個標題，唔知大家有冇睇到一頭霧水？首先我 recall 返大家嘅記憶先......
P.S. 又或者可返呢條 link 嘅「回應」
http://hk.myblog.yahoo.com/jenny-chiu/article?mid=664
*********************************************************************************
話說喺我初初選擇 mua 時，我好衝動地 confirm 咗一位叫做 Amy 嘅化妝師，當時仲已經落咗 $1,300 deposit hold 佢個期。拎返 d 試妝相後，當然 upload 咗上 blog 同大家分享一吓啦！但係我都極度榮幸地得到各位 blog 友狠評呢位 mua，令我放棄咗筆 deposit 而改選 Shirley Kam 成為我當日嘅 mua。當時我就諗，究竟有咩方法可以退返筆 deposit 呢？改婚期？唔得，萬一佢話可就我咁點算？屋企有事結唔到婚住？唔得，因為曾經聽佢講過佢都有個客係咁，結果佢可以幫佢個客 hold 住 d deposit 長達一年！最後同男友商議後，決定同佢講，我哋分咗手，唔結婚（大吉利是過你），呢個方法我一路以嚟都冇打上 blog，宜家一次過同你哋 share 埋啦！
我哋當時分開打電話，先係男友打比 Amy，話佢聽我哋散咗，想退錢！Amy 聽到都好詑異，但佢就有疑問，點解唔係女方打嚟，係男方打嚟要求退錢呢？所以 Amy 要求我親自打比佢同佢交代一下。OK，咁我都有責任打比佢講聲嘅，結果我就打比佢，用一把有史以來極度冷漠嘅聲線（做戲做全套嘛）同佢講：「無錯，我哋散咗！因為 d deposit 係由男方出錢，宜家分開咗，所以佢打比你要求退錢！」Amy 了解過後，首先當然係一輪安慰啦，後來同我講冇得退錢！OK，咁其實我都預咗，只係諗住一試無妨啫，結果，件事就此完結。
點知，24 號呢一晚，我食食吓飯又收到 Amy 嘅電話......
Amy：我係 Amy 呀，之前你搵過我試妝架。
Jenny：係，咩事呢？
Amy：哦，冇...... 啱啱嗰個婚紗展我有去呀，見到你，你當時同個男仔一齊，我睇你會唔會有轉機，要唔要我當日再幫你手化妝。
Jenny：......（心諗，今次真係大檸樂，唔通穿咗煲？）
Amy：我今次打嚟純粹想關心吓你，睇吓你情況點，因為我驚你可能係冇咗我電話，搵唔返我嘛...
Jenny：哦...... 嗰個男仔係朋友嚟架，我帶佢去睇 d 嘢之嘛，我唔需要呀（指化妝服務）！
Amy：哦，原來係咁，咁唔緊要啦，咁我都祝你快 d 搵返個好嘅男朋友啦！
～～～～ 收線 ～～～～
唉，其實，呃人原來真係唔好玩，仲要呃一個算叫做關心你嘅外人，真係覺得咁樣呃佢有 d 衰！不過希望佢唔好怪我，因為...... 佢化妝嘅手勢同我真係唔夾！So Sor~~~
另一方面好好彩，因為我諗返轉頭，喺婚紗展時由於太多人，我同男友好似真係冇咩親密接觸，連手都唔知有冇拖過添呀～
下次...... 真係要醒水啦！！！
