結婚主花車 - 英國古董車 MG

呢個 topic 已經出咗好多次，不過今次應該真真正正 confirmed 啦！

P.S. 發覺自己越嚟越懶，宜家先記錄返一個月前發生嘅事，「懶鬼」非我莫屬。

2008 年 11 月 25 日（星期二）

收到車主阿達嘅通知，佢部英國古董車 MG 已經搞掂晒，所以我就約埋 blog 友「璋惠妹」一齊去睇花車。其實我同小惠都識咗好耐架啦，佢係我 yahoo blog 第一個 blog 友，原因都係因為大家一齊睇中咗同一款花車，又一樣住屯門元朗區，所以梗係約埋一齊睇啦。小惠上星期連婚都結埋啦，我宜家先寫返呢件事出嚟，所以話自己懶真係無錯嘅！

當晚約咗車主阿達、小惠 + 佢老公、我男朋友喺元朗睇車。所以放咗工之後，我同男朋友即刻仆返入元朗，好在返到入去佢哋都未到，所以拿拿臨喺 M 記啃咗個餐醫肚先。食食吓收到小惠電話...... 架車嚟緊啦，快快趣質埋 d 食物入肚，要起程啦！

見到架車嘅真身啦...... 好靚呀！阿達自己一手包辦去砌架車出嚟（冇錯，唔係現成買，係自己砌），連埋後期制作（e.g. 噴油，訂零件），講真，架車真係合晒格！

見到架車嘅真身，當然要仔細 d 檢驗吓啦！先睇睇車箱內籠... 紅色絨布梳化，OK 呀，我試坐過，好舒服！

仲有司機位嘅軚盤，我覺得好舊式，好得意。

仲有之前一路都好好奇嘅橙色指揮旗仔，原來係咁樣架！

當架車要轉左，左邊支旗仔就會「嗒」一聲彈起，轉右時右邊嗰支就會彈起，而且支旗仔入面仲有燈嘅添！超搞笑！

仲有呢舊唔知咩嚟嘅，不過真係好有 MG 特色。

仲有架車嘅 pat pat，連個車牌都係 MG 頭英文字母

我哋驗完一輪車之後，又係試車嘅時間啦！阿達載咗我同男朋友喺元朗兜咗一個圈，整體感覺 --- 良好。喺行車期間，我留意過，車速都 keep 住行到 6x 公里喎，阿達仲話行高速公路可以去到 8x 公里添，咁絕對冇問題啦！之後阿達話喺 09 年會換過個 engin 同埋加重避震，咁坐喺入面嘅乘客都坐得舒服 d，聽到呢個消息真係放心晒！

至於冷氣方面，我當日真係冇試過，不過我就搞低咗個窗，車箱入面都已經好通風，但係就要留意結婚當日會唔會吹亂晒個頭囉。不過呢樣我反而唔太擔心，既然阿達話會換過個 engin，咁就唔怕唔夠力開冷氣啦！

但係，無可否認車箱係窄咗 d，宜家我都唔打算叫伴娘跟車啦，唯有安排佢坐工作人員車啦。仲有一樣最緊要嘅係，新郎盡量要坐司機後面，因為司機個位大 d，導致右邊嘅乘客座位窄 d，如果新娘係著鋼紗款婚紗，就要坐左邊客座啦，因為嗰個位先夠放個鋼紗。如果著 A-line 婚紗的話，基本上影響唔大，左右兩邊都坐得。

總括嚟講，架車係 100% 合格。好嘢，結婚當日有靚車坐啦喂！

最後梗係要同呢一架「全港只有一架」嘅 MG 影返張相啦！

再嚟團體大合照，今次同埋小惠 + 佢老公一齊影相。

*****************************************************************

睇咗咁多張相都係夜景，不如我就 post 少少日頭影嘅相比大家睇吖，其實色差方面都唔算好大！