拎相簿 @ 美麗佳人

2009 年 1 月 17 日 (星期六)

出咗世、出咗世、出咗世啦！講緊就係我第二輯婚紗相「美麗佳人」嘅制成品啦！

其實早於 31-12-2008 我已經收到佢哋嘅電話通知我 d 相拎得啦，比預期嘅取相日期足足早咗半個月。但係一向懶惰嘅我又遲遲都唔去拎相（睇怕冇乜邊對準新人可以咁懶，但係其實我都掛住 d 相架！），而且一路都未諗到點樣去拎相，因為 d 相真係超重，問朋友借車？ Call 貨 van？搭的士？結果比我等到另一位同我同日結婚，一樣住屯門元朗區，又一齊 join 咗美麗佳人嘅 blog 友「寶妮」都要去拎相，所以我哋就約埋一齊去，寶妮男友就問咗朋友借車，咁就輕鬆好多啦！喺呢度要多謝寶妮及佢未來老公呀！！！拎完相我哋仲一齊去咗元朗嘅「泰屋」食飯，一路食一路傾，最終係 11:00 先埋單走人...... 哈，我哋兩 pairs 人傾咗好耐，其實仲有好多話題未傾，但...... 我哋總會有下一次嘅飯局，到時再傾啦！

左起：（真名唔公開啦）寶妮男朋友，寶妮，Jenny，歐陽生

To Mr. Au Yeung：見相後請從速減肥，你睇你自己嘅身形！！！兩個字：「恐佈」！

返到屋企，第一時間梗係影相啦！我呢輯相係三輯之中最貴，所以禮品都特別多，咪睇呢度只係一袋嘢 + 油畫 + 一盒嘢，其實好重，好多嘢架！

環保袋入面有 4 盒大大小小嘅嘢 + 一隻已執相 CDR

全家總動員大晒冷！！！

好，宜家我哋逐樣解拆......

24 x 30 油畫

一見到幅油畫真係好開心，原來擁有一幅屬於自己嘅油畫嗰種感覺係好難形容，總之就好好好開心啦！今次呢幅油畫個色係沉咗 d（因為係日落景），好在我另外兩輯嘅油畫會 sharp d，咁就可以兩種氣氛都有齊啦！

本來我仲未決定喺緣美傳說晒邊幅油畫，而且仲想晒大頭相，不過有咗呢一幅做藍本，我發覺油畫真係唔好晒大頭，我覺得自己呢一幅嘅比例已經 ok，太大真係會嚇親自己架。

呢個係我個油畫框，冇記錯好似係 upgrade 油畫時免費任揀款式。美麗佳人 d sales 話平時打掃時，只需要用雞毛掃掃吓佢就 ok 啦喎！

幅油畫都算叫做大幅，有我上半身咁大喎。

12 x 18 大水晶相簿

12 x 18 <--- 就咁睇數字大家可能未必知幾大本，但係我一拎上手，有我上半身咁大，而且係超超超重！所以各方親朋戚友，恕我無能力抬出嚟比你哋欣賞啦，留返擺酒當日先啦！我諗...... 連四大長老都要當晚先有機會睇到啦！

50" 海報

其實紙盒入面啡色嗰卷先係海報，白色嗰卷係簽名布嚟架！

呢幅海報有成 50" 長，即係 1:1 咁滯！

大家睇我行埋去幅海報身邊就感受到 1:1 啦。

哈哈...... 我特登影一影花球條絲帶，agnes b. 個名好突出呀...... 係咪以為我買咗個 agnes b. 花球呢？錯錯錯，我 DIY 架咋！哈，混水摸魚成功！

48" 簽名布

由男朋友做臨時 model，拉長塊簽名布比我影相！我都滿意幅簽名布啦，起碼兩邊張相唔會阻太多位，都有足夠空間比賓客簽名，而且美麗佳人幫我用咗藍色做底色，可以襯返喺沙灘時嘅藍天白雲，唔錯唔錯！呢張我會擺酒用，註冊嗰張用法國婚紗簽名布。

4 x 5 水晶掌中本 2 本（其實即係兩本 4 x 5 相簿）

稍嫌佢左邊嗰本有少少曝光，不過唔緊要，尚算可以接受。

左起：10 x 12 水晶相架 + 8 x 10 相連相架 + 謝咭 100 張

10 x 12 大相我揀咗呢張，不過...... 真係好討厭，佢哋 cut 咗我條拖尾......

 

8 x 10 相連相架，宜家睇返覺得個相架唔係好襯幅相添......

仲有呢一疊謝咭！佢哋一拎出嚟比我 check 時我仲以為係一副啤牌，當時我仲心諗：「點解我有一副啤牌嘅？」睇真 d 先知道原來係謝咭 100 張。

5 x 7 相連水晶架兩張

左邊嗰張再一次地有少少曝光，但依然尚可接受。

8 x 10 散相連 UV coating 兩張

討厭...... 左邊張相我其實幾鐘意，因為真係似一串魚蛋，不過竟然 cut 咗我第三粒魚蛋嘅一半...... 嘿！！！算啦...... 有時又真係要就返佢哋 d 尺寸嘅......否則就唔會成日比人 sell upgrade 油畫啦，因為會 cut 頭 cut 尾嘛！

謝咭 boxset 禮盒一盒（每款共有 300 張）

個盒都幾見得吓人咁喎......

打開之後就係右上嗰幅相咁樣啦！

最後係已執相 CDR 一隻，好開心佢用咗油畫嗰幅相做 Disc Cover，好鐘意呢個封面呀！

遲吓等我影少少大相簿嘅相出嚟比大家睇吓美麗佳人嘅排版。如果你問我睇點佢哋 d 排版，我覺得 OK！或者因為我要求低啦，佢唔好留太多白邊我已經認為冇問題，但見識過緣美傳說 d 排版之後，我相信美麗佳人其實可以再做得好 d。

好，又到評分嘅時候。宜家拎埋相，應該同美麗佳人唔會再有咩瓜葛，不過唔洗擔心，我唔係唔滿意佢哋嘅服務，總括嚟講我仲覺得唔錯添。Sales 方面可能係我好彩，由落單到收相都係一 d 較好口碑嘅 sales serve 我，所以我從來冇對過呢間公司黑過面。服務都算叫 OK，我見 esdlife 呢排都已經少咗人鬧佢哋。制成品方面我知我真係好彩，總叫做樣樣都滿意（除咗有兩張相有少少曝光，但仍然可以接受），其實我咁講，因為我識得有朋友仔嘅相唔得，仲係好明顯地唔得，宜家仲同 d sales 嘈緊，希望佢可以成功爭取到啦！