男朋友的最後一個單身生日

2009 年 1 月 23 日（星期五）

Happy Birthday！

今日係男朋友告別單身行列最後一個生日。喂，你後悔嗎？一齊都已經太遲啦，哇哈哈！

以前男朋友生日，我只會順佢意去某一間佢指定要去嘅餐廳食飯，而我...... 都好似好多年未送過生日禮物比佢啦！唔係因為我懶，冇心思，只係佢鐘意埋 d 嘢貴到抽筋（按：記得某一年佢同我講過佢睇中咗一隻六十幾萬嘅錶 @_@，咁當然佢唔係 expect 我買比佢，佢只係想證明佢幾咁有 taste 啫）！我又買唔到 d 衫褲鞋襪比佢，因為佢真係好鬼奄尖，所以通常都係食餐飯就當慶祝架啦！

今年適逢係佢最後一年單身生日，我突然間好想比個 surprise 佢，知道佢好鐘意食德國菜，所以已經早於一星前喺赤柱美利樓 2 樓嗰間德國餐廳訂位。

開飯啦！

我哋 order 咗個唔知乜乜德國腸拼盤（Menu 上仲寫明話足夠 2-3 人食，不過只係得 6 條腸，一個人勉強都食得晒，仲分 2-3 個人？）

唔知邊碟菜跟埋嘅凍薯仔沙律

仲嗌咗個好出名嘅農夫飽，不過我食落又唔係好識欣賞佢有咩咁好味，但係之前睇 openrice.com 講明係必 order 嘅前菜！

仲有就係烤咸豬手，呢味又係講到明必 order，之前入咗嚟食兩次都冇機會嗌，所以今次就試啦！送到嚟時會有專人幫你拆骨，good！佢拆緊嗰碟就係我哋架啦！

豬皮好脆，熱辣辣食真係好正！網上 d 人講到話好咸，但係我哋又唔覺喎！

食到呢度其實我哋已經好飽啦！但係生日又點可以冇得切生日蛋糕呢？呢一點其實係我嘅堅持，我成日都覺得生日點都要有個蛋糕，唔理係一件件嗰 d cake 都好吖，總之要有得食 cake，所以個 waiter 就突然間捧個蛋糕出嚟啦！<-- 呢個就係我送比男朋友嘅 surprise 啦！

其實中間發生咗段小意外......

話說男朋友本來準備叫埋單，走之前先去一去廁所啦！佢行開咗之後，突然間個 waiter 捧住個蛋糕連埋嗰度唱 live band 嗰個女 singer 走埋嚟，見到我哋少咗個人就「咦」咗一聲，個女 singer 都好無奈，我就話佢行開咗去廁所，隔離枱有個女仔就搭嗲：「唔緊要唔緊要，一陣再嚟過！」嗰一刻我覺得有 d 瘀，好在唔係我生日啫，否則真係咩 surprise 都冇晒！仲話自己好有呢方面嘅經驗......

男朋友去完廁所返嚟，就重頭嚟過，呢一 take 當然係 100% 成功啦！

最搞笑嘅係，男朋友真係冇諗過我會比 surprise 佢！當個 waiter 將個蛋糕放喺枱面時，男朋友竟然問我：「係咪我哋架？」個 waiter 聽到都驚自己擺咗烏龍，佢問：「你哋係咪有人生日？」我唯有話：「係呀，係我哋架！」

之後就點蠟燭，女 singer 就叫我一齊唱生日歌，唱唱吓連附近幾張枱嘅人都一齊唱，哈.......超爆笑！我其實一早知道男朋友有少少介意咁嘅情況下切蛋糕，佢一向都唔太鐘意咁樣，佢當時仲做口型咁同我講：「都話唔好唱歌咯！」不過為表我今次 surprise 嘅誠意，我唔理佢嘅「唔太鐘意」，都照樣安排搵人唱歌，哈...... 有時我都幾任性架！

唱完歌個女 singer 仲叫我哋嚟個 birthday kiss -_-"，呢個時候，我見到男朋友竟然有 d 怕醜...... 個女 singer 就話：「唔怕啦，快 d 啦！」就係咁，我哋就喺幾張枱嘅見證吓咀咗一嘢...... 唉～

食食吓男朋友終於問我：「你點樣拎個蛋糕過嚟架？」

其實我之前暗中拜託一位 blog 友（為咗保密，我都係唔開佢名啦）幫我拎個蛋糕去餐廳先！所以喺呢度要多謝呢位 blog 友嘅俠義相助啦！

其實食完個咸豬手，我哋兩條友都已經有九、十成飽，我心知個蛋糕一定食唔晒，但係又唔可以暗示男朋友唔好 order 太多嘢食......唯有照頂硬上，結果個蛋糕只係食咗 1/4 就要拎返屋企啦！

最後，希望你鐘意我為你安排嘅一餐啦！話你聽吖，以後嘅生日都冇 surprise 架啦，哈哈哈！