2009 年 1 月 3 日（星期六）
話說今日係媽咪嘅姑姐娶新抱，即係媽咪嘅表弟結婚啦，同我都冇乜關係！以往一個同我咁疏堂嘅親戚有婚宴，我通常打死都唔去，一來可以幫媽咪慳返 d 人情錢，二來同男朋友兩個匿喺屋企睇十大勁歌金曲頒獎典禮仲好，不過因為自己都搞緊呢壇嘢，所以我都出席咗呢次嘅婚宴當係取經！
設宴地點喺屯門市中心皇上皇集團 --- 皇廷酒樓。
環境：歐陸式設計，同中港城帝廷皇宮差唔多。全場只有兩條柱，擺多過 25 圍就會有幾張枱睇唔到個台，但係都有電視機直播台上情況。
食物：no good！份量細，好似冇乜試過去婚宴竟然食唔飽，媽咪都話連一向細食嘅我都竟然由乳豬食到紅豆沙，老實講，我做冬食飯嗰餐都仲飽過佢（我一圍都只係 12 人咋）。尾段嘅食物稱唔上「熱」，尤其是個飯...... 簡直可以以「凍」嚟形容。紅豆沙更加不堪一提，好稀，似食緊紅豆水多 d，淡，冇甜味，劣作！其實仲有其他劣作我都已經唔提，一間酒樓要處理近 30 圍枱食物的確唔易，不過我覺得今次連合格都不如囉！
服務：一般！侍應警覺性唔夠，我表弟倒瀉咗杯汽水，個侍應生竟然扮時運高睇唔到，要人出聲要求拎毛巾抹身佢先出現，呢樣真係勁！散席時由於好多親戚想去洗手間，大家唯有坐喺個位度等齊人先走，個侍應驚死冇得收工咁，一於喺你面前執碗執碟，幾驚佢倒瀉嘢！
評論完呢 d，都係時候講講我取經結果。以下係一 d 親身經歷，各位都可以考慮吓究竟仲出唔出現喺自己嘅婚宴入面。
座位編排
一對新人雖然好體貼咁編咗個座位表，每位賓客簽到後會有兄弟姊妹話你聽你要坐幾號枱，可惜唔知點解新人計錯數。我媽咪嗰邊一共有 7 兄弟姊妹，新人竟然將呢 7 兄弟姊妹 + 2 個唔識嘅人合共 9 人編埋同一圍。一圍 12 個位，雖然佢哋都已經好醒目咁留返 3 個位用嚟走盞，可惜，每個家庭唔只派一個代表，淨係我呢家已經有 3 個出席啦，試問一張 12 人枱又點坐到 7 兄弟姊妹 + 2 個唔識嘅人呢？衰就衰在佢自己派帖係請人哋「闔府統請」。後來我哋唯有叫 d 兄弟出聲，叫嗰 2 個唔識嘅人轉坐第二枱，又好在媽咪嗰 7 個兄弟姊妹唔係全部出席，咁先夠位坐。
結論：所以緊記，編排座位的確係一個好大嘅難題，雖然冇乜可能逐個賓客打去問人出唔出席，不過都要盡量預好 d，<-- 講咗等於無講，暫時我都諗唔到有咩更好嘅方法。
注意賓客入座情況
新人預計開 28 圍，後來開咗 30 圍，又後來因為發生咗上面件事，多得兄弟姊妹團將 d 賓客左塞右塞咁坐，最終慳咗一圍錢，開咗 29 圍。不過因為咁樣，就將 d 賓客一圍一圍咁搬前，e.g. No. 21 搬 No. 20，No. 22 搬 No. 21，結果後排嘅賓客都未坐好，酒樓已經熄晒燈等新人 march in。喂，我（甚至其他賓客）都未坐定，我仲搬緊自己隻杯去隔離枱架...... 熄晒燈又黑忟忟，好唔方便。
結論：新人自己當時一定留意唔到呢 d 情況，唯有拜託兄弟姊妹醒水少少，盡量唔好令到 d 賓客不便。
伴娘要醒目，要「照顧」但非「拎」新娘婚紗拖尾
呢個錯誤我覺得身為伴娘嘅真係要留意一下。新娘子著咗件拖尾婚紗 march in，而 march in 時唔知點解個伴娘全程幫新娘子抽起個拖尾，搞到新娘子露咗少少腳出嚟，整體變得好唔靚，好唔 elegant！我認為好多新娘千辛萬苦，克服選擇困難症 confirm 咗件拖尾婚紗，都係想 march in 時靚靚啫，伴娘就全程拎住個拖尾，破壞晒條裙啦！
結論：雖然個拖尾可能會太長驚比人踩到，不過我認為伴娘可以 follow 住新娘，「照顧」住個拖尾，而唔洗「拎」住個拖尾，咁 march in 時就可以靚靚啦！
即場證婚
宜家越嚟越多新人選擇喺設宴地方即場證婚，無疑呢個決定係可以等多 d 賓客一齊做見證，自己 & 賓客又唔洗走嚟走去觀禮，不過真係要鄭重提醒大家，control 氣氛真係好緊要，呢方面要靠個證婚律師及司儀。以我今次呢個婚宴為例，證婚時，普遍只有頭 3 枱賓客真係有留心睇住個儀式，第 4 枱開始已經各有各玩，各有各吹水，仲各有各嗌肚餓，問你死未。我真係好唔想自己嘅註冊儀式會咁不被人尊重，所以寧願趕少少都要喺下午註冊。
結論：不妨同證婚律師 / 司儀傾好，如果一見到有賓客唔合作，可以先停低唔出聲，然後用和平少少嘅語氣要求賓客保持肅靜，尊重返呢個儀式，否則就大家遲開席，遲散席。
間場遊戲
今次呢個婚宴真係娛樂性豐富，由婚宴開始直至散席一刻，台上都不斷有人 entertain 大家，今次呢個仲勁，一路食一路有唔同嘅遊戲玩都不特止，敬完酒仲有魔術表演添！我阿爸仲話：「點解宜家 d 婚宴有咁多嘢玩？我感覺似去咗食春茗飯多 d 喎！」無可否認，我認為係應該要有 d 小遊戲嘅，不過睇魔術表演都係第一次。媽咪都有問我會唔會有呢 d 環節，我話如無意外我都唔會有。我曾經留意過魔術進行期間各賓客嘅反應，其實真係一般咋！最投入都係 d 小朋友囉，掌聲少之有少，可能大家都仲醫緊肚啦！如果係朋友幫手客串就冇乜所謂，不過如果係出錢請人嚟表演，其實真係不必啦！因為我發現魔術表演只有坐得前嘅賓客先睇得清楚，最諷刺嘅係...... 永遠有機會坐得最前嘅只係長輩級人馬，佢哋係唔會欣賞...... 咁就真係唔請好過請啦！
結論：小遊戲我認為真係要有，但要選擇適合老中青賓客嘅遊戲，或者咁個投入性先會大 d，魔術呢 d 都真係唔洗啦！
旅遊巴接載賓客
今次個 case 好特別！由於新人雙方家長及大部份親友都係住屯門元朗天水圍區，所以設宴地點都揀返喺屯門。一對新人散席時都租咗架旅遊巴接送親友去元朗天水圍，可惜停站地點令到大家兩頭唔到岸。當司儀宣佈有旅遊巴時，姊妹點人數...... 原來只有 8 個人有興趣搭，不過咁都冇計，比咗錢租咗都冇辦法，架車都要照開。
結論：好好統計吓係咪真係要租旅遊巴，亦要統計要租一架定兩架。再同大家分享一個經驗，幾年前呢班親戚入面又有某一位擺囍酒，地點係尖沙咀牡丹樓，佢哋都租咗兩架大巴返屯門元朗，結果每架大巴只有一半人坐。好不幸地，我自己喺銅鑼灣擺酒，媽咪已經出聲叫我租大巴啦，不過我暫時諗住只租一架...... 住屯門元朗嘅朋友仔，睇到我呢句說話後，當日記得早 d 報名坐車啦，哈！
雖然好似懶勁咁學人寫評語，不過希望呢 d 經驗可以幫到大家，亦令大家諗諗究竟自己需唔需要咁做，慳得一蚊得一蚊嘛！^^
沒有留言:
張貼留言