我的晚裝鞋

一講起晚裝鞋 ....... 我真係掙扎咗好耐！我覺得晚裝鞋一定要比婚紗鞋更 sharp，但係 sharp 即意味住要 "勁"，可能係 "勁閃"，可能係 "勁靚"，但係都未知著咩色晚裝，咁顏色方面又點揀好呢？其實我已經一早打算買銀色，夠百搭吖嘛！不過，我係咪真係需要買？因為我打算咁安排我當晚嘅晚裝鞋：

如果租淺色晚裝，最多咪著返對婚紗鞋去襯囉，如果租深色晚裝，深色 ／ 黑色鞋囉，另外我肯定會租一套紫色晚裝，作為紫色 fans 嘅我，屋企當然有一對紫色高踭鞋啦，得三套晚裝，就咁諗都諗到晒點襯，咁仲要買鞋咩？不過 ....... 女人點都係貪靚嘅動物，有咁大個藉口比自己去 shopping，又邊會咁理智吖？所以，我決定咗去買一對銀色鞋用嚟襯晚裝，而且仲已經喺旺角中心敗咗佢返嚟啦！

鞋踭高度絕對符合我嘅要求，唔太高又唔太矮！

呢對晚裝鞋價錢 OK，原價 HK$138，經媽咪出口講價，用咗 HK$130 成交。講價成功其實都係因為我哋買咗兩對！媽咪見我試得咁開心，個款又 OK兼且平日又著得返，所以佢都要咗一對一模一樣！講真我又唔太介意嘅，都係鞋一對啫！同媽咪一樣咪一樣囉，最緊要真係平時可以著得返。

頭先講開租衫，前幾日忽然撩起條筋，好想擺酒當晚著一套全黑色 a-line 晚裝出場，頭飾仲要用埋黑色嘅羽毛配一塊網紗，幾咁詭異、神秘 ...... 好可惜，呢個 idea 係唔可以進行，我驚比人（尤其係長輩）話我辦囍事著黑色 ...... 而且我只會租三套晚裝，根本冇咁多 quota ，當晚亦無咁多時間比我去玩呢 d 嘢 ~ Jenny，你醒吓啦！