2009 年 9 月 12 日（星期六）
仲有兩個月左右就結婚，都係時候去試紅酒啦！我對紅酒嘅認知唔多，睇勻 esdlife 個個都讚金都隔離嘅新翹行（STC）好正，所以我都 target 咗佢。
上到去受到頗尊貴嘅招呼，雖然佢哋 office 細細，不過 d staff 都有板有眼幾 pro 吓，紅酒款式都好齊。
Serve 我嘅並唔係傳說中嘅夏生，只係一個 2x 歲嘅後生仔。講真，睇外表我完全唔會信佢有料到，不過原來佢係太子仔...... 失敬失敬！試酒嘅時間比我預期中快，成個過程大約試咗 8 支酒左右，我同男朋友好快就揀到最得人鐘意嗰兩款。
(1) 2006 年 Merlot 智利出產 HK$49／支
* photo copy from STC's website
呢支真係超級 fruity，我相信個個人都啱飲，而且價錢係好好好平！
(2) 2006 年 Mixed 法國出產 HK$59／支
* Sorry，呢支我搵唔到相
呢支入口 dry 過上面嗰支少少，不過依然算係易入口，我估係適合對紅酒有少少認識嘅賓客。
其實我哋都掙扎緊要 (1) 定要 (2)，講真兩支都 within budget，兩支入口都 OK，問下個 staff，佢就話 (1) 最多人訂，因為易入口嘛...... 不過因為智利出產，冇乜人欣賞，結果我哋就訂咗 (2) 嗰款，因為貪佢 dry 返少少，個樽身都靚仔 d，加上係法國出產，啱晒用嚟塞住 d 唔知頭唔知路，以為紅酒係法國出產先係正貨嘅親戚，廢事佢唱我話我唔比法國紅酒佢飲！
宜家訂咗 24 支，婚前一日會自己送上酒樓，計埋酒樓每圍 1 支就應該夠晒飲。我哋冇要到回收服務，因為計過數，佢哋只會回收 5 支，我倒不如自己喺屋企吹喇叭算數。比訂金時 check 單先知，原來唔要回收服務每支仲會平多 HK$2 添，即係 HK$57／支。
****************************************************************************
試完紅酒我其實都 wing wing 地，男朋友就冇乜事，所以都係去食晚飯唔好周街行。我哋揀咗去意粉屋食，一埋枱我就 [目及] 到隔離枱椅底有隻應該死咗嘅曱甴（因為佢郁都唔郁），我就一路坐低一路同男朋友講有曱甴喎，個帶位 waitress 話佢會幫我整走佢，之後經理聽到「曱甴」二字即刻飛奔過嚟話由佢處理屍體，又調咗我去另一張枱。
OK 啦，settle down 以為乜事都冇，打開 menu 揀嘢食啦。Order 好就等上菜，突然間有一客雞翼喎，我同男朋友先係對望，明明冇嗌雞翼... 咁就叫個 waitress 過嚟話佢知送錯嘢，點知佢同我哋講呢客雞翼係經理送比我哋食，wakakakaaaa
之後仲受到貴賓式招待，明明坐緊一張二人枱，隔離就係通道，個經理見我哋一袋二袋，特登搬張椅寧願塞住條通道都比我哋放袋，認真唔話得！
其實呢間意粉屋我哋一路都幫襯開，係 OK 嘅，不過個經理咁做亦係應該嘅，我一個屈尾十打電話去衞生署報串的話，佢都好長手尾！
