喜帖 confirmed @ Joy's Card

2009 年 7 月 22 日（星期三）

今日放工後同男朋友以 9 秒 9 速度趕去中環打乙型肝炎針，因為人哋收工時間係 6:30，所以真係要快！喺呢度要特別多謝 1121 網友醒咗我一個好抵嘅 offer 去打呢支針！

點解我話好抵呢？HK$150 / 3 針，第一個「抵」！Kinetics 開我 HK$600 / 3 針喎，差咁遠！另外因為之前做咗婚前檢查，有埋驗血報告顯示我哋兩個都冇抗體，但係份報告得 3 個月有效期，過咗 3 個月先去打針就要再驗過。宜家我出示份驗血報告就可以慳返 HK$100 驗血費，兩條友呢度慳多 HK$200，第二個「抵」！所以想打乙型肝炎針嘅朋友，隨時通知我，我可以 forward 份申請表比大家！

不過緊記，打緊預防子宮頸癌針嘅人唔可以同一個月之內打乙型肝炎針！所以記得計清楚 d 月份，一個月唔可以打兩種針架！我計一計...... 自己今年之內都會比護士拮針六次......（3 針卉奸康，3 針乙型肝炎）

==============================================================

up 完廢話，就入正題 --- 喜帖！

打完針都未夠 6:30，所以搭叮叮去灣仔 Joy's Card 揀埋帖。酒樓已經包咗 250 張帖，條數計落都應該夠。喺 Joy's Card 足足擾攘咗一個鐘，我哋得出 3 款心水：

第一款（下稱「囍字帖」）：

第二款（下稱「嫁娶帖」）：

封面有「嫁」、「娶」兩款，我哋仲話如果男家派帖就用「娶」做封面，女家派帖就用「嫁」做封面。

內頁：

由於呢張相唔係 Joy's Card，所以款式有少少出入！我哋喺 Joy's Card 睇到嗰張係內頁冇印花，亦冇「執子之手，與子偕老」嘅字，更加冇底下嗰 d 公仔！

帖底：

Joy's Card 嗰張個帖底只有一個大「囍」字，亦冇嗰 d 印花。

第三款（下稱「通花帖」）：

由於 Joy's Card 網上嘅款式唔齊，第三款其實唔係咁嘅樣！我唯有向大家形容一下......

試想像將帖面呢個花轉做通花，然後移去張帖嘅正中心位置，多少少金色（基本上係金多過紅），咁就差唔多啦！

其實我自己最鐘意係「通花帖」，而「嫁娶帖」就係我哋 book 酒席嗰日八卦望吓 d 帖時已經睇中。男朋友都係鐘意「嫁娶帖」多 d，由於同佢意見分歧，我哋就分別用 3G 打比自己嘅母親大人，睇下佢哋覺得點！當時 Joy's Card 成間舖頭 d 人都聽住我哋兩條友白白痴痴咁玩 3G，真失禮！

結果...... 未來奶奶及未來叔仔話「通花帖」好娘（可能太多金色啩？），「囍字帖」都還好，佢哋一致贊成用「嫁娶帖」。至於我媽咪呢，佢因為唔得閒，草草咁答咗我話要「嫁娶帖」，因為佢見過實物，又覺得呢個 design 好得意。（註：打緊 blog 時隔離位個同事裝到我個 mon，都話張「通花帖」好娘...... 乜我 d taste 真係咁差咩？）

由於冇人支持我用「通花帖」，結果我唯有就範，所以「嫁娶帖」就成為我哋嘅喜帖啦！雖然冇得 order 最心儀嗰款帖，不過呢個「嫁娶帖」我都 O O 地 K 鐘意嘅，希望收到帖嘅朋友都唔會嫌醜怪啦！

揀完款，就要填資料及揀埋顏色。張帖本身有血紅及皇帝紫兩種色，我哋決定咗用紫色（Wow，正！），男朋友話皇帝紫感覺上 grand d，字體顏色就揀咗燙銀色字。另外為咗要呼應帖面「嫁娶」二字嘅氣勢，內文字型我哋一致決定用呢隻：

好似好有霸氣咁喎，哈哈！

最後比埋差價就鬆人，下個星期二有稿睇，一個月後就有得攞帖！

當填到乾宅電話、坤宅電話時，我一路都以為係填父母嘅電話，但 Joy's Card 就話係視乎邊個請得多人，就用邊個嘅電話。既然係咁，唔好煩 lu，填返我同男朋友嘅聯絡電話！想問一問大家，其實係咪咁樣去決定填咩電話號碼架，我硬係覺得填父母嘅電話正統 d 喎？