2009 年 7 月 11 日（星期六）
話說上一篇講到懷疑自己患上咗婚前焦慮症，但係我都冇理會，繼續我嘅生活。所以買咗 19:20 戲飛去 UA Times Square 同男朋友拍住拖睇《殺人犯》見吓我第二個 honey，慰藉吓我嘅心靈。見未夠鐘開場，就喺 Times Square 行陣街先，一心以為自己呢排咁慳，點都唔會破財啦，點知真係出事...... 幾時都話我嘅燒錢能力係超乎想像之外......
第一站《b + ab》：
我一向都幾鐘意呢個牌子，好多時都喺呢度買衫，所以當日唔洗 15 分鐘，我已經睇中三件衫。本來我已經好決絕咁話一件都唔買，拖住男朋友走出店外，不過多得歐陽生嘅嬌縱，引誘我諗清楚、諗清楚...... 我依然拉住佢走，本來一毫子都唔洗比，佢又無端端拎起一條裙話好睇，拼喺我身上... 咦，又 OK 喎！但考慮到買晒三件就差不多 $1,000，我仍然話要出去冷靜一下（嗰下真係覺得自己好叻）！歐陽生再做魔鬼...... 當日《b + ab》做緊 promotion，所有貨品 50%，用 HSBC credit card 再有額外 95 折，仲有仲有，買滿 $400 仲可以落 Times Square HSBC counter 登記，有 10% 回贈...... 諗起一切一切嘅 promotion，我又受唔住引誘...... 最終拎住其中兩件去排隊 fitting，不過仍然覺得自己好叻，因為好果斷地唔要其中一件，最後兩件埋單，盛惠 $499！
第二站《agnes b.》：
唉～ 最衰都係男朋友，本來相安無事離開 Times Square 架啦，條友仔話想搵廁所，路經 agnes b. 時，當然會駐足觀賞一下，OMG，出事 again！去咩廁所呢........（請容許我無理一下）
agnes b. 朱古力又出咗四款新口味啦，兩次...... 我已經兩次拉開男友想走，喺我回頭望一望 d 朱古力之際，sales 又成粒朱古力咁隊埋嚟叫我哋試吓，又話買滿幾錢有咩送，HSBC 又有咩優惠等等..... 我知，頭先都衰咗一鑊啦！望一望嗰盒有齊 26 種味道嘅朱古力，我就幻想緊自己食住 b 仔朱古力，攤喺梳化睇電視個情景，再望望個價錢牌，$388，咦，差 $12 又有 HSBC 10% 回贈啦！係咪買得過呢？喺我猶疑之際，男朋友不斷示意我買嚟食，又話適當時候要氹吓自己開心，又話自己之前有幾錢幾錢回贈等等....唉，咁咪又衰多鑊囉！盛惠 $404 再送多一條毛巾...
卒之，離開 Times Square 準備入戲院前，我話咁快就振興咗香港經濟將近 $1,000，錢...... 真係易洗！
散場後仲有下文，話說我想買對黑色高踭鞋返工著，經過某某鞋舖，旋風式咁睇中咗一對，又旋風式咁 fit 咗，得咗，今次唔係好貴，盛惠 $200！
歐陽生呀歐陽生，下次我話走就真係好走啦，唔係你成副身家都會比我敗晒...... 唔好睇少我，我絕對有呢個能力架！
沒有留言:
張貼留言