緣美傳說油畫 + 我的油畫大合照

2009 年 7 月 15 日（星期三）

經過緣美傳說嘅三催四請，我同男朋友終於捨得上去拎埋幅油畫。返到屋企睇一睇日曆，原來我影咗呢輯婚紗相都有接近一年嘅時間，人哋一早做好咗幅油畫，宜家先肯上去拎，會唔會有點兒過份？

呢張就係緣美傳說嘅油畫啦，經過一輪投票之後，最終都決定用呢張相。我一路都以為佢哋送 16 x 20，點知一拆出嚟先知瀨嘢，原來係 20 x 24！

影完緣美傳說張油畫之後，好無聊咁拆晒三幅油畫出嚟影個大合照。當我正埋怨呢三幅油畫體型過大，唔知點處置時，男朋友就話：

- 其實都唔錯吖，三幅油畫有三種唔同顏色框，包括金、銀、白都齊晒！

- 其實都唔錯吖，你三款婚紗都著齊晒，包括 a-line（中）、大拖尾（左）、bell-shaped（右）！

- 其實都唔錯吖，我三款禮服都著齊晒，包括黑、白、灰！

又係喎，冇諗過咁啱得咁橋樣樣都好似齊晒咁！怨氣即刻一掃而空，轉個頭我就拎住幾幅油畫入房左拼拼、右拼拼，睇吓掛邊幅最適合。

女人...... 幾時都係最五時花、六時變嘅動物！