影相後感及小 tips 分享 @ 法國婚紗

去法國婚紗影相之前，足足喺 esdlife 蒲咗一個月，日日都上去睇吓各位網友嘅留言，跟進一吓法國婚紗嘅 comments，加上自己影完之後都有少少得著，所以想喺呢度打小小心得出嚟同各位未影／打算影嘅朋友分享一吓。

法國婚紗雖然係一間大公司，但係我發現大部份嘅 staff 都好好人，你要求 d 咩只要係佢哋能力範圍內都會盡量滿足你。有幾樣嘢我覺得值得留意：

呢間公司好搞笑，無論係你揀衫嘅 sales、當日幫你影相嘅 cam man、當日幫你化妝嘅 mua、睇相嘅 sales 甚至你要坐邊張枱揀相都有得 book！所以我就列一列有邊幾個 staff 係 esdlife 大熱，大家都可以參考一吓，咁到大家影相時都會一切順利啦！

揀衫 Sales（免費）

呢個我冇 book，因為我係揀完衫先知可以 book。喺 esdlife 有人讚嘅揀衫 sales 有：Kit，Meli，KK 同埋 Mi。好好彩地，我喺無 mark sales 嘅情況底下由 Kit serve 我。

Camera Man（加 $500 指定費用）

比較出名嘅 cam man 有：Dicky，Frankie，另外阿 June，阿豪都有網友讚。呢 part 我冇比 $500 去指定攝影師，不過影相前我就打電話落去法國婚紗，要求當日盡量安排 Dicky 或者 Frankie 做我 cam man，不過由於我係冇加錢，法國婚紗都只係盡量安排比我，如果當日有人比錢 mark 佢兩個的話，我都冇得怨。雖然我影相當日 Dicky 放假，Frankie 又有 job 喺身，不過好好彩，最後都有阿 June 幫我影。

Mua（加 $500 指定費用）

如果要指定 mua 同樣要比 $500，即係話如果你同時想 mark cam man & mua 的話，請乖乖地放低 $1,000。比較出名嘅 mua 有：Bonny，細 Ling，我個人就認為 Iris 都 mark 得過。我當日都冇 mark 過 mua，不過有幸地最尾一個頭由 Iris handle，感覺都 OK。

揀相 Sales（免費）

呢項係免費 item，擁有師奶性格嘅我當然一早 mark 咗啦！比較多人讚嘅揀相 sales 有：Christine，Judy，Clara。Mark 揀相 sales 時可以同佢哋講：「我要 xxx，xxx（人名） serve 我，咁盡量安排是但一個比我囉。」<--- 咁就得架啦！當你遇到好嘅 sales 時，咁就萬大事都有商量啦，係咪？

揀相地方（免費）

呢項又係免費 item，不過 esdlife 有兩個版本，有人話可以要求入房揀相，咁大家偷影時就方便 d 啦。不過又有網友話每個揀相 sales 都有自己嘅一張枱，你坐邊度係視乎邊個 sales 幫你。其實我覺得揀相地方唔重要，最重要都係遇到好 sales 啫，如果你遇到好 sales 時，話唔定你明目張膽影相佢都扮睇唔到呢 ～

不過我都要講一講，逢親免費嘅 item 法國婚紗都只係「盡量」安排比大家，到時係咪真係你心水嘅人選幫你，係好視乎個 sales 有冇 job 喺身，如果萬一你 mark 咗都唔得，咁就真係冇辦法。

最後我認為，其實如果你本人好抗拒港式 style 嘅婚紗相，咁就真係唔好喺呢類大公司影相啦！因為佢哋一定有好多 standard pose／招牌景，基本上佢哋之前搵 model 試過晒公司每個景，知道點影係最靚，自然就會應用喺客人身上啦，咁就會變得好倒模式啦。至於我自己反而好阿 Q 咁諗，我係香港人，當然要影返 d 港式 style 嘅婚紗相啦，而且我本身唔太抗拒 standard pose 及招牌景，只要招牌得嚟個 mood 又 OK 我就會 buy，所以仲諗緊去唔去影嘅朋友們，可以先諗諗自己介唔介意呢類「倒模式」style，咁會容易 d 決定。

以上嘅少少心得希望幫到各位啦！

偷影 の 園景篇 @ 法國婚紗

2008 年 10 月 24 日（星期五）（續）

呢一刻真係想引用古巨基一首歌：「誰時時矇查查　誰常常矇查查　矇查查」

你哋睇唔掂嘅話去攞個放大鏡啦！

接住落嚟睇最後嘅一個造型：bell shape 大拖尾婚紗 + 頭花

拍攝景點：園林景、折翼天使、月亮、大門口教堂鐘及水池景等等

溫馨提示：相中人乃豬扒一件，為閣下著想，如有不適，請立即終止觀看。

呢張...... 真係辛苦男朋友，我就好舒服咁坐喺張櫈度擺 pose，不過由於地理問題，男朋友係要 "gut" 高對腳，阿 June 仲要話唔夠高唔夠高，結果佢差唔多好似人哋跳芭蕾舞咁用趾尖企喺度，但係又唔可以比人睇得出用雙手撐住個 body 喎，猛要佢隻手放鬆 d，個樣仲要扮晒 enjoy，我記得當時我 feel 到男朋友係全身震晒架！影完之後佢條腰仲抽筋抽咗一陣！老公，辛苦晒！！！既然你付出咗咁多努力，我當然要買呢張相啦，係咪？（搵笨嘅係...... 張相根本影唔到男朋友隻手有幾鬆，哈！）

我又要讚攝影師阿 June 啦！我拎咗以下呢張相比佢做 reference，因為我影相前知道自己有一件類似嘅婚紗，所以要求阿 June 幫我影張差唔多嘅出嚟，結果佢又再一次交到功課喎，good！

reference photo --- 注意：相中人唔係我嚟架！

其實附近只係一堆草，醒目嘅阿 June 就把握呢堆草幫我影咗呢一幅出嚟！呀，點知出嚟又幾靚、幾似喎，不過我呢張最終都冇要到，因為仲有張個 mood 更加好嘅，仲晒大咗做油畫添！

呢張輪到我辛苦啦！話說著住條大拖尾嘅婚紗其實都幾重，呢度仲要係斜坡嚟架！男朋友就有舊木比佢坐住，至於我...... 首先比條拖尾嘅重量扯咗少少身向下，再者我著住對高踭鞋，當時笪地係泥嚟架，我對鞋嘅鞋踭就插晒入 d 泥入面，基本上我好似被固定咗咁，郁都郁唔到，仲要擺 pose...... 好在，影出嚟嘅效果唔錯啫！

仲有呢張，好靚呀，始終都覺得一條大拖尾嘅婚紗要咁嘅角度去影先係最靚！大家見到個地下嘛？泥地 + 斜坡 ～

例牌背景 (1)，例牌 pose (1)，呢張我冇要，因為我要咗張合照。

例牌景 (2)，例牌 pose (2)，呢張係唯一一張月亮相，買佢嘅原因純粹因為呢個景一張都冇。

例牌景 (3)，例牌 pose (3)，呢張最終好似無要，因為個 pose standard 得嚟冇乜特別。

呢張冇要，因為我認為呢個景唔應該加插 snoopy 入去，仲要隊埋個鏡頭面前，唔係好 match 喎！

呢張我本身好鐘意，不過最終都冇要，因為要咗下面嗰張，嗰張正 d ～

就係呢張啦！我都話架啦，我偏向鐘意 d 唔望鏡頭嘅 pose 架嘛！

見到呢張相時，我第一時間揸住喺手同男朋友講：「呢張一定要要！」點解？景靚，effect 靚，表情靚，意境又靚，最最最緊要係拖尾靚！！！！！！！！

呢張...... 都唔係好記得有冇要啦！

又扮 cute，真係想打鎚你......

呢張好似都冇要，係咪呢？我都唔記得啦！

呢張又係指定要影嘅，我同男朋友都好鐘意呀，必買之選！

呢張都有要，好 moody，而且當時個天開始日落，sales Christine 初時仲以為呢張做咗 effect 添呀！

偷影部份已經全部完滿結束，多謝各位捧場！(P.S. 請問有幾多個嘔咗架？）

本來 3 個月後就有相拎，不過因為夾咗個農曆新年，宜家要等 4 個月呀，又進入「等」嘅階段啦！

偷影 の 晚裝篇 @ 法國婚紗

2008 年 10 月 24 日（星期五）（續）

因偷拍關係，以下相片會繼續比較矇查查，敬請原諒。

今次睇嘅係我第二套衫：藍色晚裝 + 藍色頭飾

拍攝景點：法國婚紗 studio 景

溫馨提示：相片中人乃豬扒一件，為閣下著想，如有不適，請立即終止觀看。

呢張我見到即 out...... 都係嗰句，忍唔住有條茂利喺度發姣囉！

呢張個背景平平無奇，如果冇記錯好似都 out 咗，況且我手頭上有好多呢 d 角度！

呢度先讚一讚攝影師阿 June，我帶咗以下呢張相比佢做 reference，叫佢同我影張差唔多 mood 嘅出嚟，佢又真係交到功課比我喎！Thanks June！

Reference photo --- 注意：相中人唔係我嚟架！！！

呢個先係我嚟架！超鐘意啦，完全影到我要求嘅嘢，試問呢張又點可以放過呢？我仲晒大咗做 10x12 添呀！

其實喺我著呢件衫影相時，攝影師阿 June 有好幾個 pose 都要我摺高條裙影我對豬腿...... 我實在唔明點解要咁做，唯一解釋就係......... 可能當時阿 June 太肚餓，見到一對咁有肉地嘅豬腿時想影低留念！

大家有冇見到豬右脾嘅小腿被圈起？因為我要求執瘦佢！！！！！！！點解我要執？因為男朋友揀咗呢張相呀，我初時仲諗住 out 添...... oh my god！

你想點呀？又扮 cute！！！所以呢張好似都係 out 咗。

好好地咁坐喺度咪好囉...... 呢張唔記得有冇要到 lu！

一見到呢張相，男朋友就問我：「你幾時影咗張裸照架？點解好似冇著衫咁嘅？」為免令到呢輯相涉及色情成份，呢張我係 out 咗嘅 ～

呢張係我最鐘意嘅相片之一，一人坐一邊，有 d 「幾米 --- 向左走向右走」嘅 feel，加上張相嘅四周其實做咗少少色 tune，所以我好快就抽起咗呢張，然後同男朋友講：「呢張我一定要！」不過我啱啱望真 d 先發現，男朋友個 pose 好似人哋搭巴士訓著咗咁囉，-_-"

呢張...... 好似有要又好似冇要，因為有好多同類型嘅 pose，都唔係記得太清楚！

晚裝偷影部份暫告一段落，待續......

偷影 の 室內篇 @ 法國婚紗

2008 年 10 月 24 日（星期五）（續）

經過一晚嘅辛勞，終於 cut 好晒當日偷影 + 明影嘅相辦啦！點解要 cut？因為我偷影時為咗方便，一次過影幾張相，但係為咗大家睇得冇咁辛苦，我就勞煩男朋友幫我裁晒每張相出嚟啦！不過都係嗰句，始終當時作賊心虛，加上每次偷影嘅時間都唔充裕，d 相大部份都影得比較矇，希望大家見諒啦！由於我偷影嘅相片多過 20 張，超過 yahoo! blog 嘅上限，所以分開幾篇出啦！

宜家先睇我第一套衫：a-line 婚紗 + 皇冠

拍攝景點：室內景，如 Bar 景，鋼琴景，梳化景等等

溫馨提示：相中人乃豬扒一件，為閣下著想，如有不適，請立即終止觀看。

呢張相係所有相中最清楚嘅一張！如果無記錯，最頂嗰張好似被我 out 咗，實在頂唔順自己咁含情脈脈......

呢張喺第一 around 時被我 out 咗，但係男朋友好鐘意呢張，仲指明要晒做 2R 銀包相，可憐嘅佢淪為相中嘅大配角。

每 pair 新人都會企喺三角鋼琴前擺嘅 standard pose，不過我由細到大都好鐘意鋼琴，加上琴邊有我嗰對 snoopy 公仔，所以......好似冇 out，我都唔係太記得啦！

呢張又係 standard pose，有影過法國婚紗嘅準新娘都一定有咁影過，不過我又幾 buy 呢個 pose，我覺得好 moody，佢哋仲做埋黑白 effect，開正我嗰瓣，所以最終我都揀咗！

本人嚟講好鐘意呢張，不過男朋友當時話要 out 架，但係我實在唔捨得（我特別鐘意 d 唔望鏡頭／合埋眼嘅 pose），最後喺我威迫利誘下要咗啦！哈！驟眼睇好似大家互不瞅睬，不過其實我同男朋友只係合埋眼，懶係 enjoy 緊 d 陽光咁咋 ～

呢張...... 好似被我 out 咗啦，因為睇真 d，我其實擺咗一個好高難度嘅 pose，條腰屈到 S 型唔似 S 型，有 d 勉強。

呢件衫只係影到咁多，待續......

揀相日 @ 法國婚紗

2008 年 10 月 24 日（星期五）

等到頸都長，終於可以去法國婚紗揀相啦！唔知點解自己都幾期待呢輯相，或者因為影完無幾耐，心入面嗰團火仲未熄，而且真係覺得當日同個 cam man 夾得到，所以都覺得 d 相會影得靚。

約咗 6:45 到，今次我哋好準時呀，冇遲到。Serve 我嘅 sales 叫 Christine，一見到佢時望望佢個名牌，Wow~ Assistant Manager，咁即係話到事啦，好嘢！可能因為佢係 Assistant Manager 嘅關係，佢坐嗰張枱係比較入少少，咁仲好，一陣偷影起上嚟會容易好多。Christine 好 nice，我同男朋友同佢唔知點解有好多嘢傾，成個揀相過程充滿住歡笑聲，好在尋日唔算多客人喺到，否則真係失禮街坊！

坐低後，先睇合照，睇園景 --> 室內景（即係 Bar、鋼琴、梳化） --> studio 景 --> 水池景，再嚟睇我嘅單人相、男朋友嘅單人相，黑白相及對相等等。Christine total 拎咗 132 張相比我哋揀，其實應該唔只咁少，不過我相信佢哋一定有篩選過先拎比個客睇。

揀相途中 Christine 一共行開咗 5 次，有 2 次係有電話搵佢，1 次有個客上嚟搵佢拎 CD，1 次斟水比我哋飲，仲有 1 次佢去廁所（嘩，比 Christine 見到我數住佢行開幾多次，真係可能會嚇死佢，^^）。喺呢 d 時候，我即刻叫男朋友把握時間偷影，我哋主力偷影一 d 唔會揀嘅相，不過由於作賊心虛，時間又唔充裕，所以 d 相大部份都好矇，但係不得不讚男朋友......佢總共同我偷影到 20 張，仲有 13 張係借相辦返嚟，所以我 total 影咗 33 張相。講開借相辦，真係要讚吓 Christine，佢超級好人，話說法國婚紗規矩最多只可以比客人借 10 張出街（視乎你買嘅張數決定比你借幾多走），每張仲要收返 $500 按金，臨走時我向 Chirstine 提出要借相辦，佢好似唔太贊成，因為佢覺得咁樣會延遲咗我收相嘅日期（因為你還相嗰日先會同你落 Order 做相），男朋友呢個時候好醒目，佢問 Christine：「咁不如你借比我哋 5 分鐘吖。」我搭訕：「係咯，我好快還返比你，唔洗驚遲咗收相，又唔洗比按金，我哋借一借去廁所影張相就比返你。」Christine：「咁呀...... 其實呢度唔比影相嘅，如果比你影，我就違規，咁......當我乜都睇唔到囉，比你借 5 張啦。」呢個時候，我就摷咗足足 13 張出嚟係咁影係咁影（當然係明正名順地影啦），男朋友就同 Christine 雞啄唔斷，我影完 13 張都唔夠喉架，不過算啦，13 張已經好多，所以 Chirstine 真係抵讚！

好啦，係時候講吓出血程度...... 其實出血程度尚算 OK，都唔覺比人搵笨，所以放血都放得幾開心。

我 total 要咗 66 張相，package 本身包 22 張，即係我只係買多咗 43 張相...... 心水清嘅朋友一定會發覺 22 + 43 = 65，唔係 66 喎！無錯！因為 Christine 竟然送咗一張比我呀，多謝 Christine！話說有一張係我嘅大頭單人照，揀相時我好快已經 out 咗呢張，我塊面咁長，好忌要大頭架嘛，而且我同男朋友都覺得嗰張麻麻地，咁當然 out 啦！Christine 見到我 out 呢張時，佢話：「咦，你做咩唔要呢張呀？呢張影得你好靚，你笑得好 sweet 喎。」我：「係呀？不過我唔係咁鐘意大頭相喎。」Christine 拎上手左睇右睇，好似好唔捨得咁，仲話：「唉，真係唔要呀？好可惜喎。」我就問佢：「咁不如你送比我啦！」佢竟然好爽快咁答：「好呀！呢張我送比你！」嘩，估唔到我竟然有呢 d 意外收穫！

最後我哋埋單用咗 $10,000，有以下嘅嘢：

(1) 原 8x12 full page 相簿 (入 19 張相)
upgrade 到 12x12 design 水晶相簿 + 水晶內頁 + uv coating (入 45 張相)
(2) 原 5x5 相簿 (入 15 張相)，需同大相簿同款
upgrade 到 6x6 np 相簿, 同大相簿唔同款 + uv coating (入 21 張相)
(3) 原 16x20 油畫包框
upgrade 到 20x30 油畫包框
(4) 原 10x12 相一張連 uv coating (不連架)
用以下 (5) 的相架 upgrade 到連架
(5) 原 8x10 相 2 張連 uv coating (一張連架一張唔連架)
放棄其中一個架 upgrade 上 (4)
(6) 原 5x7 相 2 張 (一張連架一張唔連架)
要多一個架做對相
(7) 20x30 簽名布不變
(8) 4 張銀包相
(9) 44 個 files

撇除之前用 $2,880 upgrade 張 coupon，咁即係話，其實我買 43 個 files 要 $110 x 43 = $4,730，我宜家比多 $5,270 有以上嘅嘢，聽落都好似 OK 咁喎。

呢本就係 12x12 design 水晶相簿，男朋友一見到呢本相簿就話要做呢本，Christine 介紹呢本叫水晶相簿時，我當堂打咗個突，因為有網友話我聽呢本相簿好似係法國婚紗最靚及最貴嘅相簿之一，老...... 老...... 老公你真識揀呀...... 滴汗！！！（啱啱見到網友嘅留言，呢本相簿單買要 $7,xxx，吓，咁我咪抵咗好多？？？）

仲有個盒入住添，今勻可以變身做喼神啦！

另外嗰本 6x6 相簿就 exactly 係咁嘅樣（冰公主唔好意思，借你張相一用）

雖則今次又用咗 5 位數字埋單，而且仲全部做晒相簿、uv 及 upgrade 油畫（真敗家！），不過睇得出佢哋真係好好人嘅。我同 Christine 講，我嘅要求係 (1) 唔 keep 散相，全部要入相簿 (2) 我 budget 只有 $7,000（其實特登講少咗）(3) 做唔做 uv／做晒細相簿都冇問題 (4) 唔一定要 design，結果佢就 quote 咗呢個價比我，其實講真都合乎心目中嘅 budget。記得當初 Christine 第一個 offer 係 $12,xxx，有以上 (1)-(9) 樣嘢，但係全部相包相架，我同佢講 d 相架根本唔值錢，我遲 d 打算返大陸買，然後再割愛多 6 張相，叫佢平多少少比我，佢第二個 offer 係 $10,660，有晒以上 (1)-(9)，我叫佢再平少少，提議佢減到齊頭一萬，結果 Christine 好爽快地 OK 咗，我之前喺 1st offer 割愛嗰 6 張相仲比埋我添。初時我同男朋友唔想加咁多相都係因為驚法國婚紗係大公司，offer 一定冇咁優惠，所以想 control budget，不過又估唔到原來佢哋都幾好，所以遇到一個好 sales 簡直事半功倍！

其實我覺得 sales 都係人，都係打份工啫，只要你對佢 nice d，唔好板起塊面，咁 sales 好多時都無乜所謂，平到的話都平比你（之前真係聽過有網友成日覺得 d sales 係衰人，全程黑面）。

總括嚟講，今次成個法國婚紗之旅由 join package 到揀相我都十分之滿意，最鐘意都係佢哋嘅笑容，基本上我見到每個 staff 都會笑住咁對你，冇人黑面或者態度唔好。而且，真係好喜歡佢哋可以揸住 d hardcopies 喺手咁揀相，我哋一眼就會睇得出有邊 d pose 相似，要 2 揀 1 等等！不過 Christine 話好快佢哋會改為用電腦揀相啦，始終因為晒相出嚟成本貴又浪費。

仲有一件事呀，尋日同 Christine 傾好咗，各位朋友，如果你哋有興趣 join 法國影相的話，可以落 expo 搵佢落單，你話係趙小姐（即係小妹）及歐陽生（即男友）介紹，咁就會有比較好 d 嘅 offer 架啦！雖然唔知係咪真，不過既然有心 join 的話，試吓搵佢都無妨嘅。

仲有最最最緊要嘅一件事，尤其是阿闊太太你呀，我建議你 book Christine 做你嘅揀相 sales（法國婚紗都幾得意，join 咗之後，每一 part 都可以 book 你心水嘅 sales serve 你，最搞笑係連試衫／揀相 sales 都有得 book），因為 Christine 真係超好人呀！記住啦！（其他網友有需要都可以搵佢架，都係話係我介紹就得架啦！）

我偷影咗 33 張相，要睇相的話就要留意下一篇啦！

相簿價錢大比拼

今晚就去法國婚紗放血啦！

其實今次已經係我第三輯婚紗相，budget 超晒標不特止，相簿及買相嘅數量簡直遠遠超出自己想像範圍！計一計...... 影完三輯婚紗相後，我會有一本 12x18 大水晶相簿，3 本 8x12 中相簿，2 本 5x7 細水晶相簿及 1 本 5x5 細相簿。其中一本 8x12 及一本 5x7 係法國婚紗包嘅，不過我今日放工就去揀相，唔想再比 sales sell 我 upgrade 大相簿或者加頁等等，我情願自己出去做本細細地 5x7 留念算數啦！其實婚後都未必會經常拎出嚟睇，不過我唔係咁鐘意 keep 散相，所以我都願意加錢入晒相簿。

呢個星期我好努力咁上 esdlife 法國婚紗相條 thread 度參考吓各姊妹們嘅 offer，發覺法國婚紗 d sales 真係隨口 up 架咋！有個網友想做一本細相簿，個 sales 話細相簿最多只可以入 15 張相，由於佢加咗 3x 張相，結果要做幾本細相簿。但另一個網友佢加咗 7x 張相，佢都唔洗 bargain，個 sales 自動同佢講一本細相簿可以入到 53 張相，嘩...... 一個話入到 15 張，一個話入到 53 張，個差距都好大吓喎，所以我決定自己上網搵資料，如果法國婚紗嘅 offer out budget 的話，我就會自己出去做相簿。

見呢排喺公司真係好得閒，我就上網搜集咗幾間可以造相簿嘅公司，比較一下佢哋嘅成品及價錢。問咗幾間大家都熟悉嘅公司，今次列入考慮範圍嘅公司有：

Star Photo（星輝）、Photo Plus（相靚 d）、專業制作、Amazing Grace（星映傳情）、Picasso 同埋純美新娘

雖則我話想做一本 5x7 相簿，不過原來金都嗰幾間公司最細都要做 8x12，為咗公平起見，我唯有用 8x12 做今次嘅比較啦！

星輝 Star Photo（葵芳區）

·            $860

·            加頁 $72/頁

·            最少放 22 張相，最多放 3x 張相（10 頁）

·            無縫相簿

·            包 coating

·            包 design

·            如不要 design 相簿或自己排版均可享有 85 折

Photo Plus 相靚 d（旺角區）

·            $900

·            加頁 $50/頁

·            最多可放 40 張相

·            有縫相簿（如要無縫相簿加 $300）

·            包 coating

·            Full page 相簿

·            如要 design 相簿加 $300（加 $300 後自動 upgrade 為無縫相簿）

Amazing Grace 星映傳情（金都商場）

·            $880

·            加頁 $50/頁

·            可放 22 張相

·            有縫相簿（如要無縫相簿加 $300）

·            包 coating

·            Full page 相簿

·            如要 design 相簿約 $2,388（可放 120 張相，包 coating 但必須為有縫相簿）

專業制作（金都商場）

·            $980

·            加頁 $4x/頁

·            可放 24 張相

·            有縫相簿

·            包 coating

·            Full page 相簿

Picasso（金都商場）

·            $1,400

·            加頁 $(不詳)

·            可放 30-35 張相（大約 20 頁）

·            無縫相簿

·            包 coating

·            包 design

純美新娘（金都商場）

·            $680

·            加頁 $(不願透露，唔好加太多喎)

·            可放 24 張相

·            有縫相簿

·            包 coating

·            Full page 相簿

·            如要 design 相簿加 $200（design 相簿最多可放 80 張相，但依舊係有縫相簿）

～．～．～．～．～．～．～．～．～．～．～．～．～．～．～．～

就咁睇，好似係 Star Photo 同埋純美新娘最抵。所以如果貪方便，可以諗吓純美新娘，始終喺旺角區嘛。不過如果話葵芳都算近，咁 Star Photo 當然係不二之選啦！至於我自己，其實我未必會再做 8x12 咁大本啦，或者做返 5x7，又平 d，又易收藏 d！

希望以上嘅資料幫到我之餘都幫到大家啦！（我真係好神心咁逐間公司打去問價架）

婚紗相後記

終於影晒我一生人之中所有嘅婚紗相啦，無可否認，的確係有失落嘅感覺！

其實我覺得影婚紗相好好玩，有得扮靚，有得著靚衫，又有得影靚相。每影完一輯之後我一 d 都唔覺得攰（男友都係），反而我覺得好好玩，每次都好唔捨得，最最最辛苦都只係我隻腳掌，因為要全日著住高踭鞋，唔多唔少有 dd 刮腳，真係辛苦咗隻腳咯 ～

啱啱 blogger send 咗佢男朋友幫我哋影嗰張合照，呢張正過我男朋友影嗰張好多，我哋兩個都精神 d，對眼都大 d 啦！Thank you 你呀阿闊（唔知點解鐘意咁叫你）！

宜家影完晒相，其實我都有少少得著：

(1) 著住大件頭嘅婚紗 e.g. bell shape 真係唔適宜去廁所，因為件婚紗實在太龐大，加上廁所嘅空間又細，所以我已經知道我結婚當日如無必要都唔會點去廁所，除非自己 confirm 咗件 a-line 婚紗啦！

(2) 之前男朋友啦，試衫 d 姐姐仔啦，甚至我自己都覺得自己結婚時著 a-line 婚紗好 d，不過影完法國呢輯相之後，慢慢地發覺原來自己鐘意 d details 好勁嘅婚紗，仲要加埋個大拖尾，感覺好似...... 搵到 my dream wedding gown 啦喎！不過尋晚同男朋友講起，佢依然故我，想我結婚時著 a-line 婚紗多 d，仲話 a-line 都有大拖尾啫～ 不過 anyway，我唔會 foul a-line 婚紗嘅，或者因為暫時未遇到一件有叮一聲感覺嘅 a-line 婚紗啦，所以口味依然偏向 bell shape + 勁 detail + 大拖尾嘅婚紗，即係好似呢 d 咁：

(3) 之前單方面地諗住喺結婚一周年時去影多輯婚紗相，不過我知道我到時都係唔會心息，因為我真係真係覺得去影相好好玩。既然總有一日要接受冇得再影相呢個事實，倒不如趁宜家去接受算數。前幾日仲諗通咗，其實每去影一輯相都要比人放血，不如將 d 錢慳埋喺今次買多 d 靚相仲好啦，還掂 d 相都影咗出嚟，要忍手唔買喎......都好浪費啫........嘻嘻，喂喂，你聽唔聽到呀？Hello？

影相日 @ 法國婚紗 (下)

2008 年 10 月 20 日（星期一）（續）

喺 bar 景影咗好耐好耐之後，阿 June 終於都肯放我哋去換第二套衫。其實我諗我遇著阿 June 呢個 cam man 真係好好彩！佢好盡力不特止，佢係唔會吝嗇自己公司嘅景點。喺轉造型之前，佢明明話影最後一張，影完之後又話想影多張，如是者我好似影多 2-3 張先去轉造型，對我嚟講係好事定壞事呢？

返到去化妝間就坐低等人嚟幫我，值得一讚係所有 mua 都好好人，你想點整佢哋都做得到，又唔洗花太多時間等 mua，因為基本上佢都唔理你係邊個跟開，總之見有人坐咗喺度就會問你影到邊個階段，即刻會埋嚟幫你架！我第二個 mua 唔知佢叫咩名，因為佢冇介紹自己，我相信呢個係比較 cool 嘅一個 mua。其實佢都只係幫我換晚裝，轉頭飾同埋襯飾物咁大把，之後同佢已經再冇交涉過。

至於男朋友方面，佢就唔洗換衫，所以佢就周圍走（因為法國婚紗個影樓都幾大架），仲走去幫 blogger 偷影，呀～ 又成功比佢影到 4-5 張喎，叻仔！轉完造型之後我又藉詞話要去換返對晚裝鞋，又走去開 locker，當然......其實又係去偷影造型之嘛！男朋友話好鐘意我呢個晚裝 look，佢話襯埋去法國 d 佈景時好靚喎！

喺我自己匿埋喺廁所偷影時，男朋友就拎部電話出嚟幫對 Snoopy 公仔影相，阿飛見到就同我男友講呢度唔比影相，影造型就話唔得啫，原來所有攝影都一律唔准，不過阿飛都算好人，佢同我男朋友講：「其實係完全唔比影相，不過你要影我會扮睇唔到，但係記住要小心 d 閉路電視。」果然好好人呀！不過我都係唔敢太張揚，始終嗰度有好多人行嚟行去。

我扮去完廁所後，竟然見到嚟揀相嘅另一位 blogger，我又同佢打招呼，阿 June 見到我又撞到朋友，佢問：「又係你 d 朋友呀？乜你咁多朋友嘅？」乜唔係你哋多客咩？我 d 朋友好多都幫襯你哋喎......-_-"

晚裝造型（呢件衫）

塊面長到嚇死人，我個樣都係唔適宜低炒架啦！

呢個 look 落咗去地牢嘅 studio 影相。幾時都話阿 June 唔孤寒，佢真係所有景都同我影齊，有 d 我見其他網友都冇影到嘅佢都幫我影埋，但係我唔想出血喎，我一早已經血流不止啦！呢個 look 話咁快就影完，我諗用咗一個鐘左右，之後又去轉第三個造型啦！

上返去化妝間，今次嗰位 mua 叫 Iris，即係朝頭早幫 blogger set 頭嗰位。又係換返件 bell shape 婚紗先開始補妝轉髮型，整整吓阿 May 又返埋嚟幫手，佢就負責插頭花，Iris 就幫我 set 頭。其實我買咗好少頭花咋，不過都用唔晒，所以要買頭花嘅朋友仔，真係唔洗買太多。

男朋友呢個時候又去換衫，今次佢揀咗件白色西裝 + 黑色褲，以往我成日覺得白西裝襯黑西褲唔好睇，不過今次男朋友好醒目，搵到一件白色西裝係有黑邊 pattern，襯返黑褲反而會 match d，佢換完衫走埋嚟搵我時我都話：「咦，呢件好好睇喎！」其實我一直都想佢著一黑一白，多 d 變化嘛，不過佢又唔想加錢租白褲，好在咁啱又搵到件襯黑褲都好睇嘅西裝，好嘢！

我搞掂晒之後，當然......又係偷影嘅時候，我又話要去換返對婚紗鞋乘機又去開 locker，呢個時候阿 June 突然出聲，佢話呢對晚裝鞋襯婚紗好睇 d，建議我唔好換。我心諗，咁咪冇得偷影囉？唔制，之後我話：「但係我都想去個廁所先喎！」哈，女仔要去廁所，佢都奈我唔何，好嘢，又過關啦！

著住呢件婚紗

好明顯我揸機好有問題，原本想影吓 d 頭花，可惜我整嚟整去都就唔到一個啱嘅角度去影，著住件咁龐大嘅婚紗又轉唔到身咁滯，影完兩張都急急腳返出嚟算數。

去完廁所出嚟就去咗影園景。園景 d 蚊多到嚇死人，雖然我記得帶蚊怕水，可惜我唔記得噴！！！不過我已經算好彩，我只係比蚊咬咗 5 啖，我見有 d 女仔仲慘，個背脊被蚊咬咗好多啖，真係見到都想同佢 "R"，哈！

著住呢件婚紗時，我特登叫阿 June 影多 d 我條大拖尾，因為我真係好鐘意呀！佢都好識做，知我鐘意條拖尾仲同我影咗張「疑似陳慧琳婚紗相」添，唔知出嚟嘅效果點呢？影到一半，阿 June 叫阿飛 call 定車，原來要去另一邊 studio 影水池景。其實咁近...... 行過去都得啦，不過可能佢哋錫住自己公司d 婚紗，好在...... 其實車程同步行過去都差唔多，感覺上唔會被人 dum 時間咁～ 喺呢個時候又撞到 blogger，原來佢啱啱影完水池景返嚟呀，佢個造型好靚喔！

去到水池，其實已經有兩 pairs 人影緊相，有一 pair 已經抹緊腳準備走，我哋就喺池邊影少少相先，到有一 pair 走咗之後先除鞋上去玩。影吓鞦韆，影吓踢水，影吓少少 sweet d，浪漫 d 嘅 feel 咁，嗰時太陽伯伯都收工 lu。影影吓見到門口有 pair 人行入嚟，咦，原來係 blogger 呀，佢影完啦！我嗰陣其實影埋踢水都影完啦，不過男朋友見到有張木枱，又問阿 June 嗰度影唔影得。阿 June 問我哋係咪想影，如果想影都可以，不過要比少少時間佢執一執個景，所以當我同男朋友抹腳時阿 June 就執枱，原本話影幾張，影影吓話「最後一張啦，努力，加油」、「咦，呢度都幾好喎，不如影多張啦」結果最後一張後又有最後一張.......影到 6:xx 終於可以坐返車返去收檔。

入到去化妝間，我唔係好捨得件婚紗同個妝，不過都冇辦法，始終要交返件衫比人架，不過我就要求唔落妝，只係除咗對假眼睫毛就算。法國 d mua 都好好，佢知你影完要走，都會問你想問樣整返個頭，我見之後都只係去食飯，就話紮一半就算，但係 Iris 就幫我紮一半之餘又同我紮咗個髻仔，好 OK 呀！一路紮個頭時就要填一份問卷，主要係要客人評分有幾滿意自己 d 造型，最後仲要幫攝影師／助手／mua 比分...... 我最怕要同人比分，本來想比佢哋個個都 100 分，但係男朋友話好假，結果我每人比咗 90 分，因為真係好滿意呀！

踏出法國婚紗門口時，男朋友竟然同我講：「死啦，我覺得今次呢輯相會好貴添！」<--- 哈！連佢咁都講喎，好嘢，我可以大安旨安去放血 lu，喂喂喂，有邊個貧血呀？

宜家約咗今個星期五（24/10）去揀相。原本想約星期六／日去揀，因為好驚到時我哋會揀好耐，阻住人收工就唔好啦！不過法國揀相 d 期都好 full，最快嘅星期六／日竟然要等到 8/11，心急嘅我實在等唔切，算啦，耐 d 就耐 d 囉，到時同 sales 鬥耐力，仲吓你趕收工先定我趕返屋企先～

影相日 @ 法國婚紗 (上)

2008 年 10 月 20 日（星期日）

今日係我去影最後一輯婚照嘅日子，唔知點解好似好緊張咁，較咗鬧鐘 9:30 起身，但係我 8 點幾個人已經醒醒地，唔想再訓落去，結果個鬧鐘未響我已經起咗身。

第一站先去咗元朗開心廣場隔離間花店買頭花。入到去我同個老闆娘講要買頭花，佢問我要咩花，我就話我唔識襯叫佢幫我襯，點知佢又好似唔知點入手好，淨係問我肯唔肯要紅襯白？？？吓？咁算啦，我主動話比個花球佢睇，點知老闆娘見到我個花球就掛住同男朋友研究，佢話唔信個花球係男朋友自己整，結果花咗好多時間去討論個花球多過我要買頭花！後來我都係唔等佢，自己揀花算數！我見自己個花球係紫色 + 白色，所以都向住呢 d 顏色去襯，我同老闆娘講話要花仔，佢又好似唔明咩叫花仔，結果我全部都自己嚟（當然男朋友有幫眼嘅）。揀揀吓，老闆娘問我想買幾多錢，我話唔需要太多，$30 乜都夠啦！點知埋單時佢真係收我 $30，不過 d 花少到死，我覺得比人呃囉！

（哈，好似去拜山咁！）

紫色嗰 d 唔知咩咩，純粹想襯返我個花球 d 紫玫瑰，右邊嗰條就係所謂嘅 ivy 葉，老闆娘聲稱係荷蘭 ivy 葉，我個 mua 都話呢隻葉幾靚，唔錯！嗰兩朵白色花叫桔梗，仲有少少滿天星。老闆娘提醒我呢度有 d 花好扯水，所以最好搵水養住，臨走時仲不忘問我要唔要買鮮花花球，真係識撈！

我哋到咗法國婚紗門口時大約係 11:45，早咗 15 分鐘到，見仲有少少時間，喺法國門口啪咗盒百力滋先入去，因為我早餐只係食咗一件蛋治咋，驚會肚餓。點知食食吓見到同我同日結婚嘅 blogger，其實我哋一早知道今日會一齊去影相，真係橋，同一日結婚，同一日去影相，仲要約埋同一個時間，真係有緣，所以即刻把握機會同佢影返張合照先！

我個樣超殘，男朋友又唔知點解發覺唔到我個樣......好有問題，眨咗眼喎老友......唉，算啦，我又冇即時睇吓張相影成點，結果四條友一齊入咗去法國準備一日嘅拍攝之旅啦！

入到去 receiption 就放低 $20 按金換條 locker key 返嚟，去到 locker 個位見到...... 嘩，好迫啫，嗰度大約有 10 個 lockers 左右，但係空間奇細，一次過又有幾對新人一齊埋 locker 拎嘢，影親相大家都一袋二袋，淨係等空位攝入去都要等幾分鐘。

首先女仔要拎 girdle + 粉樸 + 眼睫毛，男仔就要恤衫 + 粉撲，之後拎晒嘢就去休息室等 mua 嚟搵自己（感覺上好似等嗌籌咁）。不過唔洗一分鐘，我同 blogger 嘅 mua 都嚟搵我哋，我嗰個叫阿 May。我哋先去換衫，我估法國婚紗應該有幫客人諗過影咩景就著咩衫，而佢哋今次咁樣安排都係我心目中一早想要嘅，即係室內 bar 景、鋼琴景、紅梳化及書房景著 a-line 婚紗，地牢嘅 studio 就著藍色晚裝，園景著 bell shape 婚紗。我仲以為自己第一個造型係園景，仲懶醒咁拎埋 d 頭花出嚟，知道影咗室內景先就同阿 May 講叫佢幫我搵水插住 d 頭花先，保持新鮮嘛。

換完衫就去化妝，阿 May 問我想點 set，我當然做足功課講晒比佢知我嘅要求啦！起初仲以為三個造型都會全部由阿 May 幫我，等我仲一輪咀講晒比佢聽我之後想點 set 添！點知一轉造型時都先知根本唔係由原本個 mua 跟返，有邊個 mua 得閒就嗰個去負責，都幾搞笑。

當我化妝 set 頭時，另一邊箱男朋友就去咗男賓部揀禮服及化妝。原來 d 男禮有好多款網上係冇架，所以唔需要怕揀唔到，男朋友仲話有粉紅色添呀，全部掛得出嚟比人揀嗰 d 都係唔洗加錢架！之後就輪到佢化妝，佢哋當然好快搞掂啦，結果又係打機時間囉！

1 小時後......................我終於都搞掂晒啦，咁我就乘機話要換婚紗鞋，拎公仔、花球、襟花及 reference photo 又走去開 locker，其實就想去廁所偷影造型（因為 locker 同廁所係相連），後來比我成功偷影到兩張。

（其實我係著住呢件婚紗架！）

始終都做緊 d 唔見得光嘅嘢，而且我係用手機偷影，實在冇辦法影全身相，唯有速戰速決，影得樣衰少少都收貨啦！

我個面型實在唔容許我紮晒 d 頭髮上去，結果我只好叫 mua 幫我將 d 頭髮 set 埋一邊。個人嚟講幾鐘意呢個造型，因為我之前影嗰 2 輯婚紗相，共 5 個造型連試妝時都未試過戴皇冠，所以貪得意試吓。

眼見 blogger 都差唔多搞掂啦，不過我哋當然各有各影啦！偷影完，有條友走埋嚟介紹自己，原來佢係我哋個助手，叫阿飛，我即刻問佢攝影師係邊個，因為之前 esdlife 話有幾個 cam man 都唔掂，我好驚自己遇著呢幾個 cam man，好在，我個 cam man 叫阿 June, esdlife 都有好幾個人係阿 June 影，大家都話唔錯，我即時安樂晒！

好，之後就真正出發去影相啦！首先落一樓影咗 bar 景先，阿 June 同我哋試咗幾張造型相，又試吓燈光咁，叫我同男朋友傾吓計就得，又研究吓大家點笑先最靚。開始影之前，阿 June 問我哋有冇邊個景特別鐘意想影得多 d，男友老實不客氣咁話 bar 景，結果........ 我哋真係影咗好耐，影影吓突然見到 blogger 換咗第二套衫落嚟影 bar 景，我仲影緊第一套衫咋！不過睇得出阿 June 都幾細心，係一個幾有要求嘅人，而助手阿飛都照顧周到，幫我整頭紗、鋪裙等等，又不時留意住男朋友件男禮，一郁咗就走埋嚟幫佢整返好。

加插少少影 bar 景嘅花絮...

（擺 pose 中...）

其實同場仲有兩 pair 人影緊，即係 total 有 3 pairs，其實我覺得咁樣冇咁尷尬，大家都係嚟影相。