選擇困難症之花球篇

唉，花球呀花球，我到宜家都未決定用邊款好！我嘅選擇困難症幾時先會康復？

join 就 join 咗 Dreams Wedding 做花球，但係其實我最鐘意都係 Miracle 嘅款！每次上去 Miracle 個網頁睇款都總會有啱心水，無奈真係地點唔啱，我被迫要放棄 join 佢，如果唔係...... 我諗呢個 item 我會 book 得最快手囉！

呢個、這個、那個、嘩...... 幾靚呀！如果我 join 咗 Miracle 後我諗我都會幾頭痛！特別鐘意呢三款，不過歐陽生又話麻麻地...... 點解我同佢嘅 taste 永遠都唔一樣？如果佢一口話 OK 的話，我相信我唔洗打呢篇 blog 尋求意見！

11 月結婚，好多花店都話 11 月係大牡丹嘅當造花期，既然係咁，我都唔放過呢個咁難得嘅機會，上網搵吓大牡丹嘅款，都有啱心水嘅！

唔知點解我覺得牡丹唔係款款都會令人嘩嘩聲，要佢開花開得適中先靚，否則就會變得好老土。

除此之外，其實繡球 & 風信子都係我杯茶，不過相對地真係鐘意頭三款多 d！

究竟點揀好呢？

頭三款真係好靚呀，好啱我嘅要求，不過男友又話麻麻地，唔理佢意見好唔好呢？

揀牡丹又點呢？當造期喎...... d 花應該唔會太差啦，不過又驚 Dreams Wedding 買唔到開花開得適中嘅牡丹比我，到時做咗個老土花球出嚟的話我死都唔會拎上手架喎！！！

揀花球又要唔要留意影相嘅效果呢？粉紅大牡丹應該冇問題啦，我係擔心萬一我 confirm 要紫色嗰兩款後，影相出嚟會太沉色唔夠 sharp！

定係我顧慮得太多，四個字：「自己鐘意」就算呢？

有關花球...... 我宜家唯一決定咗嘅只係......

露　　腳　　款

毫無難度的一個決定！