充實澳門遊 @ Day 3

2012 年 10 月 1 日 (星期一)

今日係國慶日，澳門街上多咗好多人呀。見住足 3 日都未有機會去酒店泳池游水，所以尋晚做咗一個好沉痛嘅決定。。。就係要較鬧鐘早起...

「早起」對歐陽氏夫婦嚟講係一件苦事，我哋兩都係夜晚唔願訓，朝早唔願起身嘅人。呵呵~

其實都唔係好早，10 點左右起身，見天色還好就拿拿臨換衫落樓。

由於國慶當日其實溫度下降咗少少，所以落水都會覺得有 d 涼。有見及此，就先過咗去隔離嘅熱水「宅姑池」暖暖身。

浸到咁上下先落泳池玩浪...

其實我唔係怕醜所以要長期笠住件 Tee，而係我堅怕曬。雖然睇得出當日冇乜陽光，但係我就係一個咁唔見得光嘅人。好啦，最後我都除咗件 Tee，始終都係阻住游水。

睇下我玩浪玩得幾開心...

個池並唔係無間斷咁有人造浪，依我當日粗略統計，應該每隔 15 分鐘左右就有一次，每次大約 10 -15 分鐘就停。而且每次有人造浪之前，個池都會響一響警報，提醒唔鐘意玩浪嘅人稍為離開一陣，相當體貼呢。



一直都以為間房係 12 點 check out (正常都應該係 12:00 架嘛)，咁咪大安旨意玩到 11 點幾先上房，就算梳洗完都唔會過咗 check out 時間。不過我想時間鬆動少少，所以打落 customer service 要求 late check out，點知佢話原來佢哋嘅還房時間係 11 點，我已經遲咗。不過，佢都好好人，自動比我哋 delay 到 12:30 先交房。

check out 完當然後醫肚。

唔想出新馬路嗰邊，所以選擇留返喺氹仔。

第一樣要搵嘅美食一定係豬扒飽。手信街有好多檔，不過見呢間特別多人排隊就一於揀佢，點知就上咗當。。。麻麻地好食。



出發前同事 K 千叮萬囑叫我幫佢買金桃酥，不過佢又冇講邊間，點知喺排隊買豬扒飽期間就發現原來喺正隔離。



嘩，條人龍洗唔洗咁長呀。照排啦，雖然未試過，但見咁多人買應該唔會太差，所以仲買咗一盒比媽咪，一盒比奶奶。



除咗豬扒飽，其實我仲有葡撻未 K.O.，呢兩款食物都係我去澳門必食 items。

行過見到呢間，又幫襯咗，不過又中招，始終都仲未遇上我最愛嘅葡撻，下次一定要試瑪嘉烈葡撻 + 大利豬扒飽！



買完呢 D 手信之後，仲有大量手信未買。所以最後都係選擇咗坐 shuttle bus 過去新馬路。

去到新馬路其實都係邊行邊食，去咗 NaRaYa 潮聖，不過冇乜收獲。

但係見到胡椒餅呀~~~ 我都唔知係咪前世中咗胡椒毒，所有 item 有「胡椒」呢兩個字我都唔會放過。歐陽生仲串我：「吓？嚟到澳門都食胡椒餅？」

味道 OK 喎，但係我更期待下星期喺台北試到更好味嘅胡椒餅！



之後又入咗澳門歷史博物館參觀。博物館免費開放，不過就唔比影相。

 

由於今日要睇煙花，所以不適宜太晏食晚飯，從博物館離開後即刻搵餐廳。歐陽生話想食葡國菜，比較過「公雞」、「小飛象」後，選擇咗呢間：

 

入到餐廳感覺良好，老闆都好好服務。我哋一共點咗 (1) 馬介休球 (2) 葡式海鮮燴飯 (3) 葡國燒乳豬 (4) 特色飲品

本來仲想再嗌多個餸，不過老闆話驚我哋食唔晒，我哋都唔想浪費，真係唔夠先再叫啦。

店內裝修亦都好有特色。老闆好鐘意撩 + 整蠱食客。佢明明識講廣東話，又扮只係識聽英文。原來老闆自己係葡國廚師，所以佢煮嘅嘢都有返咁上下水準，呢餐我同歐陽生都好滿意。

老闆非常熱情，仲送到我哋出門口。見我哋影相，佢仲擺埋 pose 叫我地幫佢影添。

醫好肚立即出發趕睇煙花。

煙花準時 9 點開始，但係因為一直都等唔到車，我哋行去觀景點途中已經放緊 lu。

只怪之前冇做好功課邊度睇煙花最好，所以求其搵咗個無遮無掩嘅地方睇埋餘下嘅少少就算。




因為要搭 11:30 船返香港，經歷咗頭先咁難坐車嘅經驗，10 點嗰場煙花已經冇時間睇，都係乖乖地坐船打道回府算了。