再。遊台北 (前言)

2012 年果然係我嘅破財年，定係叫佢做「旅遊年」會開心 D 呢？

5 月 - 海南島三亞
9 月 - 澳門
11 月 - 台北
12 月 - 關島

當我嘅澳門遊只係出咗 Day 1，又啱啱 confirm 咗另一個 trip 啦。一年內就有機會外遊四次，實在係好好好難得嘅一年。

從未試過 3 日內做好晒 (1) 決定、(2) 編行程、(3) 買 package.....

其實今次係有 d 倉卒... 話說我本身係大新銀行信用咭客戶，早前收到宣傳單張銀行與萬福旅行社合作，推出咗一個遊台北嘅 promotion。

什麼 [國語 tone]？真係好平喎，3 日 2 夜 + 來回長榮航空任何航班。佢仲有另一個 promotion，去台北淨機票竟然只需 $900 (未連稅)？？？

淨睇價錢已經好吸引，隨口問問老公去唔去，點知佢話冇所謂，就促成咗呢次嘅台北遊。

至於點解我開個 heading 叫做《再。遊台北》.... 實不相瞞，2010 年曾經同老爺奶奶、歐陽生細佬及其女友去過一次，可惜嗰次由於人數太多，未能去到自己想去嘅地方，例如九分。上次未能盡慶，更加令我勤力 d 編排下今次只屬我哋兩公婆嘅台北遊。

講返個 package，上萬福網站先知道原來酒店選擇有接近 20 間。鎖定酒店地區一係西門町，一係台北車站，為咗住得舒服 d，我揀咗 d comments 比較好，亦較多香港人住過嘅酒店。原本係「意舍西門町」及「萬事達酒店 - 西門館」之爭，但歐陽生一睇，佢已經唔鐘意意舍西門町。之但係萬事達酒店 - 西門館亦冇晒房，唯有選同一集團嘅中華館啦。西門館較新淨，而中華館係第一分店所以可能會有少少舊，但位置只差一條街，其實都冇乜所謂。

酒店內有免費 wi-fi，包埋早餐，睇官網相好似都 OK，希望唔好呃我。

除咗喺西門町嘅住宿外，我亦都 stay behind 一日去北投試一試浸溫泉。其實之前喺北海道 honeymoon 已經浸過一次，已有心理準備北投絕對唔可以同日本相比，但總想滿足一下條日本癮 (鬼咩，宜家仲講緊日本有幅射影響，真係好想去又唔敢去)。

選擇溫泉酒店嘅條件好簡單，歐陽生話一定要有露天溫泉。北投設有露天溫泉嘅酒店只有兩間：(1) 水都溫泉會館 (4 星) (2) 北投春天酒店 (5 星)。歐陽生一望就愛上咗水都嘅露天溫泉，好彩仲有房，book 咗一間「水都套房」，房內設有私人溫泉，真係隨時隨地浸，浸到你甩皮都仲得，亦有 wi-fi，包早餐，我自己搵 agent book 只係 HK$890 (連稅)。

 

至於行程方面，有幾個地方唔少得嘅.... 包括上次想去而最終冇去到嘅 (1) 淡水漁人碼頭 + 情人橋、 (2) 淡江中學、(3) 九分 + 十分 + 菁桐 + 平溪、(4) 美麗華百樂園等等，暫時行程已經編好，應該係我決定得最快嘅一次：

Day 1 (07:30 起飛)
香港 > 台北 > 淡水老街 > 淡江中學 > 漁人碼頭 + 情人橋 (睇日落) > 美麗華百樂園坐摩天輪 (睇夜景) > 士林夜市

Day 2
酒店 > 菁桐 > 平溪 > 十分 (放天燈 + 瀑布) > 九分 (晚飯) > 酒店

Day 3
酒店 > 北投溫泉 > hot spring time

Day 4 (21:50 起飛)
北投 > 台北車站 > 血拼時間 > 香港

銀行嘅 Promotion package 內仲送埋一本最新嘅台北旅遊天書 (HK$108) + 兩張悠遊咭 (內含 NTD 50)。Yeah！連買旅遊書嘅成本都慳返，今次真係令我慳唔少呀！






值得一讚嘅係萬福旅行社。今次係我第一次搵佢哋買 package。職員好有禮貎，亦好幫得手。我下午 3:00 左右打去落 booking，5 點前已經收到晒 e-ticket + hotel voucher 啦。仲識得自動自覺幫我劃咗機位，request 咗要 king size bed，醒！臨收線仲提我記得出發前上去攞返本旅遊天書 + 悠遊咭添。不過 stay behind 嗰一晚溫泉酒店 quote 價就貴咗少少 lu，但仍然抵讚！

大新 3D2N package $4,060/2人 (連稅) + stay behind 溫泉酒店 $890/晚 (連稅) = $4,950

$2,475/人，我 2010 年去嗰次，淨係機票都已經 $1,99X 啦，再住民宿 $4XX/晚，今次真係好抵呀！

之後再去埋位於上環嘅【台灣觀光協會香港辦事處】拎咗兩份拌手禮，每份有 2 張價值 NTD50 嘅夜市消費券，yeah，total 又慳咗 NTD200 啦！



職員仲送咗 4 張 7-11 Wi-fi 咭比我，原來只需要輸入咭背面嘅 login name + password，咁當日全日 24 小時就可以用 7-11 嘅 Wi-Fi，7-11 咁多分店，咪即係等於隨時上網咁滯？yo ho ho~~~