升呢日之《march in 篇》@ 我係歐陽家大少奶

弊啦弊啦，下個星期四就出發去沙巴，今日仲未 post 晒 1121 d 相出嚟，我話過要 post 晒先好走架，努力努力！

2009 年 11 月 21 日（星期六）

上回講到入新娘房換婚紗準備 march in + 開飯，化妝師同我轉好 march in look 後，我已經靜靜雞同老公一齊行咗秘密通道去大門口。婚前一路都好期待呢刻，點知有幾位嘉賓襯酒樓侍應打點緊時去廁所，喺大門口撞到我哋 standby，就起勢咁要影相影相（因為攝影師都喺門口同我哋影緊花絮），結果係咁影，都唔記得咗緊張下添！

MC 準備好, 兄弟姊妹都企好位準備放花炮啦... 多謝呢 2 位司儀啦，多謝你哋嘅第一次，呢個第一次一 d 都唔算差！

睇片啦... 成長片段時間... 雖然出品係差咗少少，但希望大家睇完都會有 DD 印象啦~~~ 哈... 好鐘意我愛爹同愛娘個樣...（下面嗰 pair）

差不多要 march in 啦，我哋 2 個仲喺大門口盲中中係咁講緊笑影緊相，裡面做到邊一 part 我已經完全零 idea，只知道突然「嘩」咗一聲, 後來問返媽咪先知大家睇到我同郭富城嗰張合照... XD

突然間, 我身邊嘅酒樓經理話：「進場啦」我先知道原來播完片要行啦... march in 音樂都已經播緊, 渣渣臨影返 2 張相先啦！

(P.S. 冇乜幾可可以將心口兩舊肉谷到咁行, 要睇好宜家睇飽佢啦... XD)

我同老公即刻入戲... wakakaka，講笑啫，呢刻係堅開心嘅！

唔知大家有冇留意，其實我有 2 個頭紗。註冊時用嗰個係正常長度，march in 時係拖地頭紗。點解會咁呢？話說法國婚紗係有長頭紗借用，嗰陣我仲未 confirm 婚紗時已經諗住借一個拖地頭紗，點知自己最後會揀咗呢件婚紗... 如果有個大紅蝴蝶結再加長頭紗就好似太 over，真係要多謝法國婚紗嘅阿 Mi，佢私底下幫我 fight 多個頭紗返嚟唔洗我 15/16 (婚前最易有嘅病 ^_^")。我同化妝師商議後，就決定註冊時用 standard 嗰款，march in 時要 grand d，就用個拖地頭紗啦！Yeah!!! 多謝阿 Mi 幫我完成心願！

我認為一個字：「靚」(要嘔請隨便 n_n)

(註冊嗰個 standard 頭紗)

上到台，又做下 d 例牌嘢，切蛋糕，祝酒等等

好啦，要講嘢啦，終於到咗全晚最緊張嘅一刻啦~ 其實我冇乜蝦碌情況出現，所以事後 d 朋友都話我講得大方 + 淡定 (我知我不嬲都係吖, thanks!)。反而身邊嗰個就即刻甩晒轆...

佢超搞笑，喺我講講下嘢佢已經暴露咗緊張嘅神情出嚟，我初時都唔為意。我好順利咁完成後，輪到佢啦... 佢竟然立即拎部 ipod touch 出嚟，原來佢將所有要講嘅嘢寫晒落去... 但最最最好笑嘅係佢勁甩咀囉... 部 ipod touch 拎咗幾次出嚟都好似唔知自己要講咩咁，睇下氹到台下 d 人幾開心! 我可以 100% 肯定佢哋唔係笑緊我囉！

不過... 落淚嘅情況一定少不免。本來我都冇事嘅，一路都好地地，點知一到佢致辭時，佢未開聲已經抹眼淚.... 我最記得我媽咪即刻對住佢話：「咁渣架你，我個女都未喊你喊先？」

佢講呀講，本來都忍得住嘅我... 當佢一講到臨結婚前我點樣辛苦準備呢樣準備嗰樣時（可以 refer 返我個臨結婚前嘅 blog 就知我曾經真係頂到爆），我就即刻忍唔到（下圖上排中間嗰幅大相就係我嘅死忍樣...）

多謝老公多謝我，從來唔會擺呢 d 嘢喺口中嘅佢，當住咁多人面前多謝我，其實我係有 d surprise... 一路以嚟，佢都係採取「心照」嘅策略，我以為佢過咗就算架啦！

最後搞到 2 條友一齊喺台上面喊... 為咩呢？我成日都想堅持唔喊，就係想開開心心，結果都係堅持唔到落去～

深情一吻後... 再祝酒，大家就可以開始醫肚啦！！！

睇下 d 嘉賓幾入戲.... Cheers~~~~

一坐低，仲未有得食住，影下相，餵食乳豬等等，做埋呢 d 先准醫肚呀！

搞掂呢 part 後，我不忘走到姊妹嗰枱同佢哋乾返一杯先，多謝你哋咁辛苦呀，天寒地凍要幫我做姊妹... Thanks again~~~

(註：我就話去同 d 姊妹飲杯啫，大家留意張相嘅左下角，老公唔知幾時已經攝咗喺度，留意下... 只係頭盤 --- 乳豬咋!!!)